Chitak iskꞌul yaꞌ Job yilni isyaꞌtajil chiyaqꞌle
30
Yalnipaxo yaꞌ Job:«Yajaꞌ wal tinanh xin, haꞌ ebꞌnaj tzehto insatajan chitzebꞌi ebꞌnaj winhan;
haꞌ ismam ebꞌnaj tuꞌ maxhtikꞌa wochehan waqꞌaꞌkojan ebꞌnaj istanheꞌ inwakaxan iskꞌatanh metx txꞌiꞌ.
2 Wal xin ¿bꞌaytet yinh wal yokniko ebꞌnaj wuhan,
yu machi hunu isqꞌabꞌ ebꞌnaj ay yip?
3 Yu mebꞌaꞌil yebꞌ xin yu wahil, yuxin ischukil ebꞌnaj yijbꞌakꞌo isbꞌa,
elkanh ebꞌnaj isto ebꞌnaj bꞌey txꞌotxꞌ machi yahaw, bꞌay qꞌejholo xiwkilal yekꞌi.
4 Ebꞌnaj tuꞌ ekꞌ ebꞌnaj sayo kꞌahla itah xolaj telaj, islohni ebꞌnaj,
ishokꞌnipaxokanh ebꞌnaj xeꞌ te teꞌ isnhusuꞌ yu isqꞌaxhni.
5 Tzumbꞌelaxilo ebꞌnaj yul konhobꞌ yu anma,
yah yaw anma yinta ebꞌnaj hakaꞌto elqꞌom ebꞌnaj.
6 Ehikꞌo ebꞌnaj satla witz yulaj xabꞌ istiꞌla haꞌ nixhte haꞌ,
yebꞌ yulaj chꞌen nhachꞌen ay sat txꞌo txꞌotxꞌ, yebꞌ xolaj chꞌen nimeta chꞌen.
7 El yaw ebꞌnaj xolaj telaj, iskutxbꞌan isbꞌa ebꞌnaj yalanh yenhel teꞌ txꞌix.
8 Ebꞌnaj tuꞌ, iskꞌahol ebꞌnaj machi yelapno yehi,
machi xin isbꞌi ebꞌnaj, matxa istzano ebꞌnaj yehikꞌo sat txꞌo txꞌotxꞌ tiꞌ.
9 Yajaꞌ wal tinanh xin, haꞌ ebꞌnaj tuꞌ chibꞌuchwa winhan,
chinyaqꞌni bꞌinahojan ebꞌnaj yu maxil tzotiꞌ.
10 Chiyahwa ebꞌnaj winhan, kat ishitzilo ebꞌnaj inkꞌatanhan,
kat istzubꞌliko ebꞌnaj yinh insatan.
11 Matxa welapnojan yul sat ebꞌnaj, yuto kaw ayayo isyaꞌtajil wibꞌanhan yu Komam Dios,
chiyaqꞌni ekꞌoyaꞌ ebꞌnaj wanmahan.
12 Chihul anma machi yelapno inkꞌatanhan,
chinyaqꞌni aykꞌayojan, chiyoche kinyaqꞌni kꞌayotojan.
13 Chismajchen ebꞌnaj inbꞌehan, kat yiqꞌni iskꞌul ebꞌnaj kinyetanan,
machi mak xin chinkolnilojan yul isqꞌabꞌ ebꞌnaj.
14 Hakaꞌto holan iskꞌul chꞌen kꞌubꞌ bꞌay chꞌokti lemna ebꞌnaj wibꞌanhan,
tonhka bꞌiskꞌulal wehan.
15 Hak tuꞌ yu yaykꞌay xiwkilal wibꞌanhan, iskꞌaykanh inmayan hakaꞌ isto jaqꞌeqꞌ,
iskꞌaypaxokanh inqꞌalomalan hakaꞌ iskꞌaykanh moyan.
16 Haꞌ tinanh xin kaw bꞌiskꞌulal yekano wanmahan,
xayiqꞌkanokanh yip isyaꞌtajil winhan.
17 Haꞌ isyaꞌil yabꞌil tuꞌ chiꞌokapno yul inbꞌajilan,
machi xin chituki isyaꞌil yet aqꞌbꞌalil.
18 Matxa anmaho hinan yu isyaꞌtajil,
haꞌ isyaꞌtajil tiꞌ hakaꞌ istxꞌanhal xil inqꞌapan sutaniko yinh innuqꞌan.
19 Komam Dios, kinqꞌojnayojan xol tzꞌotzꞌew, lahan inxahan yebꞌ pojoj yebꞌ tanh.
20 ¡Mamin, chꞌeliko wawan tawinh, yajaꞌ mach chawabꞌe tzet chiwalan! Chinhulan tasataj, yajaꞌ machi kam hakꞌul winhan.
21 Kach meltzoko howal winhan, chinhatzumbꞌenikꞌojan yu yip haqꞌabꞌ.
22 Hakaꞌto chinyijtojan jaqꞌeqꞌ hawu, chinistzikobꞌtanhenan nime jaqꞌeqꞌ, kat kinhakꞌaytzenilojan.
23 Wohtajan tato lanhan yul naj kamikal winhan hawu,
naj tꞌinhantikꞌa yul yinh sunil anma itzitz.
24 Wal Komam xin ¿Tom mach chato isqꞌabꞌ kat iskolnilo huneꞌ mak lanhan iskam tuꞌ?
¿Tom machi kolwahi yet chiꞌel yaw mak lanhan iskami?
25 ¿Tom machi kinoqꞌan yinh anma aqꞌlen isyaꞌtajil?
¿Tom machi wiqꞌ bꞌiskꞌulalan yinh anma ayko yinh manhtzetal? Hoꞌ, wiqꞌ bꞌiskꞌulalan.
26 Hayet ayinikojan wechmanan inchahnihan iskꞌulal, yul isyaꞌtajil wibꞌanhan.
Hayet ayinikojan wechmanan issajilqꞌinal, yulpaxo qꞌejholo winhan.
27 Toxanhe chitinhxi wanmahan,
matxatikꞌa chixewninoj, haxanhetikꞌa isyaꞌtajil chiwilan.
28 Haꞌ innimanilan qꞌejbꞌikaniloj, yajaꞌ maxhtaj yu yoj tzꞌayik;
yel wawan xol anma ta chikolwa winhan.
29 Wuxhtanhe hinbꞌahan yebꞌ noꞌ oj, yebꞌpaxo noꞌ avestruz.a
30 Haꞌ innimanilan qꞌejbꞌiloj, yaykꞌaypaxo ischibꞌehal,
yebꞌ xin kaw chinhilnhon inbꞌajilan yu qꞌaꞌ.
31 Haꞌ warpahan ishel yul isnuqꞌ, bꞌiskꞌulalxa chala,
yebꞌ insuꞌan meltzopaxiko yul isnuqꞌ hakaꞌ oqꞌil,» xhi yaꞌ Job.