4. YET ISKOLNI ISBꞌA YAꞌ JOB
(29:1–31:40)
Isnahti yaꞌ Job tzalahilal yil yet yalanhtokanoj
29
Islahniko yaꞌ Job istzoteli, yalni yaꞌ hakaꞌ tiꞌ:2 «¡Ayxikꞌa chimeltzo hunteqꞌan tzꞌayik wilan yet yalanhtokanoj,
hakaꞌ yet kiniskꞌubꞌanan Komam Dios.
3 Yet chistzejni istzejtah yibꞌanh inwiꞌan,
kat xin ismujli istzejtah yul inbꞌehan yet chinbꞌelwihan xol qꞌejholo.
4 Hakaꞌ hunteqꞌan tzꞌayik yet tzeh hinan, yet ayayo iskꞌulal iskꞌul Komam wibꞌanhan,
hakaꞌ yet istanhen Komam bꞌay kinehikꞌojan.
5 Yet ayko Komam Dios inkꞌatanhan, Komam Sunil Chisje Yu,
yebꞌ yet hoyaniko ebꞌnaj inkꞌaholan inkꞌatanhan.
6 Yet inbꞌelwikꞌojan xol yojomal noꞌ lech;a
yet yelti yojomal teꞌ aceite yul iskꞌul chꞌen chꞌen!
7 Hayet tuꞌ chinbꞌeykꞌojan yul istiꞌ ispultahil konhobꞌ,
yet chinwatxꞌenayo hinbꞌahan yul intzꞌonhobꞌalan bꞌay chiwilan tzet chꞌeliko anma.
8 Hayet chinyilnihan ebꞌnaj tzehtaj, chishekꞌnilo isbꞌa ebꞌnaj yul inbꞌehan,
haxa yet chinyilnipaxojan ebꞌnaj ichamtaj,
kat yah linhno ebꞌnaj insatajan.
9 Hakpax tuꞌ ebꞌnaj yahaw konhobꞌ chisbꞌej ebꞌnaj istzoteli,
chaniko ebꞌnaj isqꞌabꞌ ismajilo istiꞌ yet chinyilnihan ebꞌnaj.
10 Chipaxpaxo yip yul isnuqꞌ ebꞌnaj winaj kaw ay yelapno yet chinyilnihan ebꞌnaj,
kat yahkanto lakꞌno yaqꞌ ebꞌnaj yul ishomal istiꞌ.
11 Haꞌ anma chꞌabꞌen intzotelan chalni tato kaw saqꞌal wetan,
haxa anma chinilnihan kaw kꞌul chu istzotel winhan.
12 Yuto kinkolwahan yinh anma mebꞌaꞌ qꞌanni tzetaj ye tuꞌ wetan,
inkolwapaxojan yinh nixhte unin machi ismam machi ismiꞌ.
13 Hayet inkolwahan yinh anma kaw iskamxa, yaqꞌ yuchꞌandiosal wetan,
istzalapaxo yanma ebꞌix hunix yuto kinkolwahan yinh.
14 Haꞌ istoholal tzet inwatxꞌehan, hakaꞌ xil inqꞌapan yekoj,
yebꞌpaxo haꞌ iskꞌulal inwatxꞌehan, hakaꞌ hunu corona ayahto yelawilo yinh inwiꞌan.
15 Hanintiꞌan hakaꞌ isbꞌaqꞌ sate wukojan yinh mak mach chu yilni,
oje wupaxikojan yinh mak mach chu yekꞌi.
16 Mame wukojan yul sat anma mebꞌaꞌ,
kolwawom wupaxikojan yinh anma nan konhobꞌal.
17 Inmaqꞌniltijan ye ebꞌnaj winaj txꞌoj isbꞌeybꞌal,
intziknilojan ebꞌnaj yul istiꞌ ebꞌnaj.
18 Chiwalnihan yul wetan: “Haꞌ yul watutan chinkamayojan. Hakaꞌ isbꞌisil yarenahil haꞌ mar, hak tuꞌ isbꞌisil istzꞌayikal chinekꞌan yul sat yibꞌanhqꞌinal tiꞌ,” kinchihan.
19 Lahan hinan hakaꞌ xeꞌ teꞌ qꞌebꞌtaj chiyayto xeꞌ istiꞌla ha haꞌ,
kat yay yal chew yibꞌanh isqꞌabꞌ teꞌ, machi xin chikꞌaykanh yal chew tuꞌ yibꞌanh xaj teꞌ.
20 Haꞌ inmayan yiqꞌkanh yip,
yiqꞌnipaxo yip teꞌ litꞌ ayko yul inqꞌabꞌan.
21 Sunil anma abꞌen tzet walan, yechma,
yokpaxo tukno yabꞌen kuybꞌanile walan.
22 Hayet lahwi intzotelan machi hunu mak taqꞌwi yinh tzet walan,
haxa tzet waltuꞌan xin nanhkꞌulal txumchalo yu.
23 Yechma anma intzotiꞌan yinh sunil iskꞌul, hakaꞌ yechman anma haꞌ nhabꞌ yinh waresmahil.
24 Hayet intzebꞌihan yebꞌ anma, machi ischah yabꞌe yul yanma tato yeli kintzebꞌihan yebꞌi;
machi xin isbꞌej yilni istzalahilal insatan.
25 Lahan wekojan xol anma hakaꞌ hunu naj rey chiꞌijbꞌan issoldado.
Hayet yoqꞌ anma yu bꞌiskꞌulal, kinokan waqꞌaꞌan yaqꞌlobꞌal iskꞌul,» xhi yaꞌ Job.