3. CHAL-LAX KꞌUL-LA TZOTIꞌ YINH HELANILE
(28:1-28)
Chissayikꞌo naj winaj helanile
28
»Yinh kaw isyelal, ay mina bꞌay chiꞌilaxahti chꞌen plata,aypaxo bꞌay chiwatxꞌelaxilo chꞌen oro.a
2 Chꞌen hierro xol txꞌo txꞌotxꞌ chiꞌilaxilti chꞌen,
haxa hunxa majan chꞌen chꞌen chitxiklaxi kat yeliko chꞌen cobrehal.
3 Haꞌ ebꞌnaj winaj matxa yelapno qꞌejholo yul sat,
chiꞌayto ebꞌnaj yul holan kaw nahat yehayto yich,
haꞌ xol qꞌejholo tuꞌ xin chissayilo ebꞌnaj chꞌen chꞌen.
4 Chisqꞌajati ebꞌnaj mina kaw nahat yehilo yinh konhobꞌ,
bꞌey txꞌotxꞌ nahulnhebꞌilkantoj, bꞌay matxa anma chꞌekꞌi.
Yinh txꞌanh lasu chꞌekꞌ tꞌunhla ebꞌnaj, nahat xin yelo ebꞌnaj yinh yet anmahil.
5 Haꞌ sat txꞌo txꞌotxꞌ tiꞌ chꞌel tzet chikolo;
haxa yalanh txꞌotxꞌ xin meltzobꞌiliko yinh hakaꞌ qꞌa qꞌaꞌ.
6 Haꞌ bꞌey tuꞌ ay chꞌen zafiro, haxa pojoj xin oro.
7 Haꞌ bꞌay ay mina tuꞌ machi noꞌ chꞌik chiꞌekꞌi,
mach ohtabꞌilopaxo yu noꞌ usmij.
8 Maxhto xin chisxanhobꞌtanhe noꞌ howla noqꞌ bꞌey tuꞌ, nitam noꞌ bꞌalam xaꞌekꞌ huneloj.
9 Haꞌ ebꞌnaj tuꞌ xin chitzꞌujnilti chꞌen yax chꞌen, kat yetaxkanto yich witz yu ebꞌnaj.
10 Chishol ebꞌnaj sat pahaw, kat yelilo haꞌ haꞌ yul chꞌen, kat yilni ebꞌnaj yu sat yinh tzetaj kaw ay istohol.
11 Chismajchekanh ebꞌnaj isnuqꞌ ha haꞌ,
kat yinilti ebꞌnaj xol sajilqꞌinal tzet ewanyehi.
12 Yajaꞌ wal helanile ¿bꞌaytuꞌwal chitita?
¿Bꞌaytuꞌwal chiꞌilchapaxo yitzꞌatil wiꞌe?
13 Naj winaj, mach yohtajo naj hanta yelapno helanile tuꞌ, mach chiꞌilchapaxo xol ebꞌnaj winaj ay yul sat yibꞌanhqꞌinal tiꞌ.
14 Haꞌ nimeta xabꞌ chalni hakaꞌ tiꞌ: “Haꞌ helanile mach winhojan aya,” xhi.
Chalnipaxo haꞌ mar: “Haꞌ helanile mach winhopaxojan aykoj,” xhi.
15 Haꞌ helanile mach chu ishel-len isbꞌa yebꞌ chꞌen oro,
haꞌ istohol huneꞌ helanile ekꞌbꞌal sata istohol chꞌen plata.
16 Haꞌ helanile machi qꞌoji isloqꞌcha yu chꞌen oro titna bꞌey Ofir,
maka yu chꞌen ónice kaw kꞌulchꞌan yil-laxi, maka yu chꞌen zafiro.
17 Mach chu islahbꞌalax helanile yebꞌ chꞌen oro maka yebꞌ chꞌen diamante.
Mach chu ishel-laxpaxto yu elawile oro kaw kꞌulejchꞌan jilni.
18 ¿Tzet cheyute heyalni yibꞌanhilo chꞌen coral yebꞌ chꞌen perla?
Haꞌ helanile ekꞌbꞌal kꞌulchꞌan sata sunil chꞌen chꞌen kaw kꞌulejchꞌan yil-laxi aykanh istohol.
19 Mach chu islahbꞌalaxpaxo yebꞌ chꞌen topacio, chꞌen chitit bꞌey Etiopía;
mach chu istohlalax helanile tuꞌ yu chꞌen oro, chꞌen kaw kꞌul.
20 ¿Bꞌaytuꞌwal chitit helanile, chal tuꞌ? ¿Bꞌaytaxka tuꞌ chiꞌilchalo yitzꞌatil wiꞌe?
21 ¡Ebꞌabꞌil yul sat sunil tzet itzitz, ebꞌabꞌilpaxilo tet noꞌ chꞌik chꞌekꞌ satkanh!
22 Abadónb yebꞌ naj kamikal halni hakaꞌ tiꞌ: “Haꞌ helanile tuꞌ hul isqꞌumal jabꞌehanh yu kotxikinanh,” xhi.
23 Yajaꞌ wal Komam Dios yohta isbꞌelal helanile, hanhe Komam yohta bꞌay chiꞌilchahi.
24 Yuto yil Komam bꞌay chikachnakan apno txꞌo txꞌotxꞌ,
yilnipaxo Komam sunil tzet ay yalanh satkanh.
25 Hayet yaniko Komam Dios yip jaqꞌeqꞌ,
iswatxꞌenpaxkano Komam ismalil ha haꞌ,
26 yebꞌ xin iswatxꞌekano Komam haꞌ nhabꞌ yinh istxolal,
isyenikano Komam bꞌay chikachna yekꞌ kꞌuh yet chimaqꞌwahi.
27 Hayet yilni Komam helanile, isyenikanilo Komam.
Yilwen Komam tato kaw ay yelapnoj yebꞌ xin tato kaw kꞌul.
28 Yalni Komam Dios tet naj winaj: “Haꞌ hexiw wetan haꞌ ton helanile,
haꞌ hepohnilo hebꞌa xol istxꞌojal, haꞌ xin yitzꞌatil wiꞌe,” xhi Komam,» xhi yaꞌ Job.