Yal yaꞌ Job isyaꞌtajil chitit yibꞌanh ebꞌnaj txꞌoj
27
Islahnipaxiko yaꞌ Job yalni hakaꞌ tiꞌ:2 «Chiwaqꞌ bꞌinahojan isbꞌi Komam Dios, Komam Sunil Chisje Yu,
Komam mach isje iswatxꞌeꞌ istoholal hakaꞌ chiwochehan,
chikꞌahbꞌilo wanmahan yu.
3 Chiwalnihan tato yinh sunilbꞌal istiempohal itzitz wanmahan,
yebꞌ yet chaqꞌni Komam Dios jaqꞌeqꞌ inhiqꞌaꞌan yu intxaman,
4 mach istxꞌojal chꞌelti yul intiꞌan,
machipaxo leqꞌtiꞌal chiwalan yu waqꞌan.
5 Mach bꞌaqꞌinhal chiwalan tato haꞌ ye heyu hex tiꞌ,
wal hinan mach inbꞌejan walnihan isyelal masanto kamikal.
6 Tꞌinhan wekojan yet chiwalnihan tato tohol inbꞌeybꞌalan,
machi xin chiwabꞌetojan tzet cheyala, haꞌ kaw wanmahan chihalni tato machi inmulan.
7 Haꞌ ebꞌnaj ayko ishowal winhan,
lahanojabꞌ chu istanhilo ebꞌnaj hakaꞌ ebꞌnaj txꞌoj isbꞌeybꞌal, yebꞌ ebꞌnaj mulum.
8 Haꞌ ebꞌnaj txꞌoj isbꞌeybꞌal waxanhka tenanto yeleqꞌ ebꞌnaj,
¿bꞌaymi tet chꞌok yipo iskꞌul ebꞌnaj yet chiꞌilaxilo iskawil ebꞌnaj yu Komam?
9 ¿Chimyabꞌe Komam Dios yet chꞌeliko yaw ebꞌnaj yinh Komam,
yet chihul isyaꞌtajil yibꞌanh?
10 ¿Tom chiyaqꞌ tzalaho iskꞌul ebꞌnaj yinh Komam Dios,
Komam Sunil Chisje Yu? ¿Tom xin yinh sunilbꞌal tiempo chiꞌah yaw ebꞌnaj yinh Komam yu chikolwa Komam yinh ebꞌnaj?
11 Hanintiꞌan, chexinkuyan tinanh yinh hanta yip isqꞌabꞌ Komam Dios,
machi webꞌahan teyet tzet nabꞌil yu Komam Sunil Chisje Yu.
12 Sunil hex tiꞌ xaheyila, yajaꞌ
¿tzet yinh xin haꞌ tzet ye tuꞌ mach yelapno cheyala?
13 Haꞌ huneꞌ chiyaqꞌ Komam Dios yinhbꞌalo ebꞌnaj machiswalil,
yebꞌ huneꞌ chischah ebꞌnaj txꞌoj isbꞌeybꞌal ispajo selel tet Komam Sunil Chisje Yu.
14 Waxanhka kaw chipohchakanh yuninal ebꞌnaj, yaj chichꞌelaxkamo yu chꞌen espada xol howal,
haxa nixhte yuninal ebꞌnaj xin chiyaqꞌle wahil.
15 Haxa ebꞌnaj chito kolchalo xol howal, haxa howla yabꞌil chiꞌaqꞌnikamoj,
haxa yixal ebꞌnaj chikan hunixal, machi oqꞌ ebꞌix yinh ebꞌnaj.
16 Waxanhka ebꞌnaj txꞌoj chistenbꞌa ebꞌnaj chꞌen plata hakaꞌ isbꞌisil pojoj,
yebꞌ waxanhka kaw nimankano xil isqꞌap ebꞌnaj hakaꞌ istenikanh tzꞌotzꞌew yulaj bꞌeh,
17 haꞌ qꞌap xilqꞌape tenan tuꞌ, haxa anma kꞌul isbꞌeybꞌal chiꞌaniko yinh,
haxa chꞌen plata tuꞌ xin, haxa anma kꞌul iskꞌul, haꞌ chipohnikanh chꞌen yinh.
18 Haꞌ ebꞌnaj txꞌoj isbꞌeybꞌal chiswatxꞌe yatut, yajaꞌ nabꞌ yetaxto,
lahan hakaꞌ yatut noꞌ chꞌik, yebꞌ xin lahan hakaꞌ nixhte pat xol awal.
19 Chꞌay hilno ebꞌnaj yinh islahobꞌal aqꞌbꞌal xol sunil isqꞌalomal,
haxa yet chꞌel iswayanh ebꞌnaj xin matxa tzet ay ebꞌnaj.
20 Chiꞌok xiwkilal yinh ebꞌnaj hakaꞌ yet chonhxiw tet haꞌ nime haꞌ,
haxa yet aqꞌbꞌalil xin chiꞌijlaxto ebꞌnaj yu nime jaqꞌeqꞌ kajtuxkum.
21 Haꞌ nime jaqꞌeqꞌ chitit yinh yetkꞌulal bꞌay chiꞌahilo tzꞌayik chihul yinh ebꞌnaj,
kat ishatxotto ebꞌnaj yu jaqꞌeqꞌ nhabꞌ, kat yilaxilo ebꞌnaj yul yehobꞌal.
22 Chiyayo Komam Dios isyaꞌtajil yibꞌanh ebꞌnaj yu ishowal,
mach xin chiyaqꞌ nimankꞌulal Komam yinh ebꞌnaj,
waxanhka chiyaqꞌle ebꞌnaj yelkanh yul isqꞌabꞌ Komam, yajaꞌ matxa chu iskolcha ebꞌnaj.
23 Haꞌ nime jaqꞌeqꞌ tuꞌ hakaꞌto chispoqꞌ isqꞌabꞌ yinh ebꞌnaj,
kat isxuqꞌabꞌli chistzumbꞌenikꞌo ebꞌnaj.