Yal yaꞌ Job tato haꞌ tzet chal iskꞌul Komam Dios haꞌ chiswatxꞌe
26
Istaqꞌwi yaꞌ Job yalni yaꞌ hakaꞌ tiꞌ:2 «¿Tzet yu hakolwa yinh mak machi nichꞌano yip?
¿Tzet yu hakolwapaxo yinh mak machi yip isqꞌabꞌ?
3 ¿Tzet kuybꞌanile hawaqꞌ tet mak machi isnabꞌal?
¿Hanta helanile hawaqꞌ yohtanheloj?
4 ¿Mak kolwa tawinh hawalni hunteqꞌan tzotiꞌ tuꞌ?
¿Mak espíritu iptzeli tawinh hatzoteli?
5 Haꞌ anma kamom ayayto yichla ha haꞌ chiluylun yu xiwkilal,
hakpax tuꞌ haꞌ mar yebꞌ tzet ayayto xol haꞌ.
6 Haꞌ bꞌay ay kamom anma, mach ayoko yenhel yul sat Komam;
haꞌ bꞌay chikꞌaytzelaxilo isnimanil kamom tuꞌ, mach ewano ye yul sat Komam.
7 Haꞌ txꞌo txꞌotxꞌ ayko yinh yetkꞌulal norte leyanto txꞌotxꞌ yibꞌanh jaqꞌeqꞌ yu Komam,
hakpax tuꞌ sunil txꞌo txꞌotxꞌ tiꞌ matzet ayikto yalanh txꞌotxꞌ bꞌay bꞌatxan yu Komam.a
8 Aykanh ha haꞌ yibꞌanh moyan yu Komam,
machi xin chitzilmoto moyan yalanh haꞌ.
9 Chisnohtzeko Komam moyan yul istzꞌonhobꞌal,
chislebꞌanpaxiko Komam moyan yibꞌanh istzꞌonhobꞌal.
10 Yako Komam yechel bꞌay chikachnakano haꞌ mar,
yebꞌ yechel bꞌay kachan yekꞌ issajilqꞌinal yebꞌ qꞌejholo.
11 Hayet chikachwa Komam Dios, chibꞌilikanh xeꞌ satkanh yu xiwkilal.
12 Yu yip Komam chibꞌilikanh haꞌ mar,
yebꞌpaxo yu ishelanil Komam chitanhilo noꞌ niman Rahab.
13 Haꞌ Yespíritu Komam aniko yelawil satkanh,
haꞌ isqꞌabꞌ Komam chꞌenikamo noꞌ labꞌa chibꞌili yekꞌ xol jaqꞌeqꞌ.
14 Haꞌ hunteqꞌan chiwaltiꞌan hanikꞌnhe chiwaqꞌ bꞌinahojan xol sunil tzet chiswatxꞌe Komam Dios.
¡Haꞌ tzet chijabꞌe yinh tzet chiswatxꞌe Komam,
nichꞌannhe chijabꞌe yu kotxikinanh yajaꞌ hayet chibꞌili yip Komam!
¿maktaxka chitecha yu yabꞌeni?» xhi yaꞌ Job.