Yaꞌ Tola yebꞌ yaꞌ Jair ok ebꞌyaꞌ yahawilo yinh ebꞌnaj Israel
10
Haxa yet tzujanilxa yinta naj Abimelec, haxa yaꞌ Tola ok kolwa yinh anma Israel. Yaꞌ Tola tuꞌ, yikꞌal yaꞌ Isacar ye yaꞌ, haꞌ naj Fúa ismam yaꞌ, haxa ismam icham yaꞌ xin, haꞌ ton naj Dodo. Yaꞌ Tola tuꞌ, haꞌ bꞌey Samir ay yaꞌ, bꞌey chewal txꞌotxꞌ yinh wonhan bꞌay ay ismajul ebꞌnaj titna yinh yaꞌ Efraín. 2 Yaꞌ Tola tuꞌ, 23 (oxebꞌ iskawinaj) habꞌil ok yaꞌ juesal yinh ebꞌnaj Israel. Lahwi tuꞌ iskam yaꞌ, ismujlax yaꞌ bꞌey Samir.3 Lahwi tuꞌ, haxa yaꞌ Jair, yaꞌ galaadita, ok juesal yinh ebꞌnaj Israel yulbꞌal 22 (kabꞌ iskawinaj) habꞌil. 4 Yaꞌ Jair tuꞌ, ay 30 (lahonhebꞌ iskawinaj) iskꞌahol yaꞌ; aypaxo xin 30 (lahonhebꞌ iskawinaj) noꞌ burro yijomal ebꞌnaj. Aypaxo 30 (lahonhebꞌ iskawinaj) konhobꞌ yul ismajul Galaad bꞌay chꞌekꞌ ebꞌnaj ilwal, chito bꞌina tinanh, chihal-lax yinh hakaꞌ tiꞌ: «Iskonhobꞌ yaꞌ Jair,» xhi. 5 Lahwi tuꞌ, iskam yaꞌ Jair, ismujlax yaꞌ bꞌey Camón.
Yaꞌ Jefté iskolilo yaꞌ ebꞌnaj Israel tet ebꞌnaj amonita
6 Wal ebꞌnaj Israel, okpaxo ebꞌnaj iswatxꞌeꞌ istxꞌojal yul sat Komam Jahawil, yok ebꞌnaj yinoyo isbꞌa tet ej yechel tioxh Baal yebꞌ tioxh Astarot. Chinipaxayo isbꞌa ebꞌnaj tet istioxh ebꞌnaj Siria, ebꞌnaj ah Sidón, yebꞌ ebꞌnaj moabita, yebꞌ ebꞌnaj amonita, yebꞌ tet istioxh ebꞌnaj filisteo. Hak tuꞌ yu ishinnikano ebꞌnaj Komam Dios Jahawil; matxa yiyo isbꞌa ebꞌnaj tet Komam. 7 Istit ishowal Komam Jahawil yinh ebꞌnaj Israel tuꞌ, yaniko Komam ebꞌnaj yul isqꞌabꞌ ebꞌnaj filisteo yebꞌ yul isqꞌabꞌ ebꞌnaj amonita. 8 Yulbꞌal 18 (waxajlahonhebꞌ) habꞌil ok ebꞌnaj Israel yalanh yip ebꞌnaj, yok ebꞌnaj yetan sunil ebꞌnaj Israel ayayo isqꞌaxebꞌikꞌto haꞌ Jordán sat txꞌotxꞌ Galaad, yul ismajul ebꞌnaj amorreo. 9 Ebꞌnaj amonita tuꞌ, ekꞌto ebꞌnaj yibꞌanh haꞌ Jordán yu isto ebꞌnaj yanoko howal yinh ebꞌnaj Israel yikꞌal yaꞌ Judá yebꞌ yikꞌal yaꞌ Benjamín, yebꞌ yinh ebꞌnaj yikꞌal yaꞌ Efraín; hak tuꞌ xin kaw yaqꞌle ebꞌnaj Israel isyaꞌtajil.
10 Hak tuꞌ xin yu yah yaw ebꞌnaj Israel tet Komam Dios Jahawil, yalni ebꞌnaj:
—Mamin, hach koDiosalanh, kaw jako komulanh tawet, yuto kach kohinkanojanh, jokanh jinoyo kobꞌahanh tet tioxh Baal, xhi ebꞌnaj.
11 Istaqꞌwi Komam tet ebꞌnaj:
—Hex tiꞌ, kexekꞌyaꞌ yu ebꞌnaj Egipto, yebꞌ yu ebꞌnaj amorreo, yebꞌ yu ebꞌnaj amonita, yebꞌ yu ebꞌnaj filisteo, 12 yebꞌpaxo yu ebꞌnaj Sidonio, yebꞌ yu ebꞌnaj amalecita, yebꞌ yu ebꞌnaj madianita; haꞌ xin yet yah heyaw wetan, kexinkolnilojan yul isqꞌabꞌ ebꞌnaj. 13 Waxanhka kexinkolan yajaꞌ xin kinhehinkanojan, yuxin matxa chinkolwahan teyinh tinanh. 14 Wal xin asiꞌwe iskꞌatanh hetioxh saybꞌililo heyu, kat yah heyaw tet, kat kexiskolni yinh istiempohal chiꞌaqꞌlax ekꞌoyaꞌ heyanma, xhi Komam.
15 Istaqꞌwi ebꞌnaj Israel tet Komam:
—Mamin, kaw xajako komulanh yul hasat, yuxin chisje hawatxꞌen tzet chal hakꞌul jinhanh, yajaꞌ chikoqꞌananh tawet ta chonhhakolanh tinanh, xhi ebꞌnaj tet Komam.
16 Yinilo ebꞌnaj Israel hunteqꞌan komon tioxh tuꞌ xol, yok ebꞌnaj yinoyo isbꞌa tet Komam Dios Jahawil. Hak tuꞌ xin, matxa techa yu Komam tato tonhe chiyilikoj yet chiyabꞌen ebꞌnaj isyaꞌtajil tuꞌ.
17 Iskutxbꞌaniko isbꞌa ebꞌnaj amonita, iswatxꞌenkanh ebꞌnaj iscampamento bꞌey Galaad; iskutxbꞌanpaxiko isbꞌa ebꞌnaj Israel, iswatxꞌenkanh ebꞌnaj iscampamento bꞌey Mizpa. 18 Haꞌ xin ebꞌnaj Israel ay bꞌey Galaad, yebꞌ ebꞌnaj iswiꞌehal xol ebꞌnaj, yal ebꞌnaj hakaꞌ tiꞌ:
«Haꞌ mak chiꞌijbꞌali jinh yinh howal yinh ebꞌnaj amonita tiꞌ, haꞌ chiꞌokkano yahawil jinh hanhonh ayonh bꞌey Galaad tiꞌ,» xhi ebꞌnaj.