«Hach tiꞌ, machi hamajul yinh tzet ay komam tiꞌanh, yuto nan miꞌehal hach,» xhi ebꞌnaj tet yaꞌ.

3 Hak tuꞌ xin yu yel yaꞌ Jefté tet ebꞌnaj yuxhtaj, isto yaꞌ yul ismajul txꞌotxꞌ Tob. Haꞌ bꞌey tuꞌ, iskutxbꞌako yaꞌ hunbꞌulan ebꞌnaj winaj kaw isah, haꞌ xin ebꞌnaj tuꞌ, hun chꞌekꞌ ebꞌnaj yebꞌ yaꞌ.

4 Haxa yet yekꞌto tiempo xin, yok ebꞌnaj amonita howal yinh ebꞌnaj Israel. 5 Yuxin ebꞌnaj yahawil bꞌey Galaad tuꞌ, to ebꞌnaj iqꞌwal yinh yaꞌ Jefté bꞌey yul ismajul txꞌotxꞌ Tob. 6 Yalni ebꞌnaj tet yaꞌ:

—Okanh tzujno jintajanh, kat hawok ijbꞌalo jinhanh yinh howal yinh ebꞌnaj amonita, xhi ebꞌnaj.

7 Istaqꞌwi yaꞌ Jefté tet ebꞌnaj:

—Hex tiꞌ, mach cheyoche kinheyilaꞌan yuxin kinhetzumbꞌelojan texol bꞌey yatut inmaman. ¿Tzet yinh xin hayet ayexxako yinh isyaꞌtajil, kat heyul saywal winhan? xhi yaꞌ.

8 Istaqꞌwi ebꞌnaj yahawil tit bꞌey Galaad:

—Yu ayonhikojanh yinh isyaꞌtajil yuxin chonhhulanh kach kosayaꞌanh. Chijochehanh chaxhto jintajanh, kat hawaqꞌlen howal yebꞌ ebꞌnaj amonita, kat hawok yahawilo jinhanh, hanhonh ayonhanh bꞌey Galaad, xhi ebꞌnaj.

9 Yalni yaꞌ Jefté tet ebꞌnaj:

—Tato cheyoche chinmeltzohan, kat waqꞌni howalan yebꞌ ebꞌnaj amonita; ta xin chako Komam Dios Jahawil ebꞌnaj yul inqꞌabꞌan, ¿Kaw yelmi xin chinokan heyahawiloj? xhi yaꞌ.

10 Istaqꞌwi ebꞌnaj yahawil Galaad hakaꞌ tiꞌ:

—Haꞌ Komam Dios Jahawil chaqꞌ isbꞌa yinh tzet chijalanh tawet tiꞌ, tato hakaꞌ hawalni tiꞌ, haꞌ chikoyijehanh, xhi ebꞌnaj.

11 Hak tuꞌ xin yu isto yaꞌ Jefté yinta ebꞌnaj yahawil Galaad. Yalaxiko yaꞌ Jefté yahawilo yu sunil anma. Haꞌ bꞌey Mizpa iskayeꞌnhe yaꞌ Jefté yalni sata Komam Dios yinh tzet taqꞌwebꞌilxa yu yaꞌ. 12 Lahwi tuꞌ, ischejnito yaꞌ Jefté hunteqꞌan ebꞌnaj chejabꞌ isqꞌambꞌeno tet naj isreyal ebꞌnaj amonita:

—¿Tzet yinh xin ayti hehowal jinhanh, yuto chexhul heyaqꞌaꞌko howal jinhanh sat kotxꞌotxꞌ tiꞌanh? xhito yaꞌ.

13 Istaqꞌwi naj isreyal ebꞌnaj amonita tet ebꞌnaj ischejabꞌ yaꞌ Jefté:

—Yuto hex Israel hex tiꞌ, hayet heyel bꞌey Egipto heyinilo kotxꞌotxꞌanh, chiꞌichiti bꞌey haꞌ Arnón masanta bꞌey haꞌ Jaboc yebꞌ bꞌey haꞌ Jordán. Yuxin aqꞌ meltzoho kotxꞌotxꞌanh tinanh yinh aqꞌankꞌulal, xhi naj.

14 Lahwi tuꞌ ischejnipaxto yaꞌ Jefté hunteqꞌanxa ebꞌnaj ischejabꞌ tet naj isreyal ebꞌnaj amonita, 15 yu yalni tet naj hakaꞌ tiꞌ:

—Hak tiꞌ chu ispajtzen yaꞌ Jefté tawet: “Hanhonh Israelonh tiꞌanh machi hetxꞌotxꞌ xajilojanh, nitam tet ebꞌnaj moabita, nitam teyet hex amonita hex tiꞌ. 16 Hayet jelanh bꞌey Egipto, haꞌ sat txꞌotxꞌ desierto konhtitanh masanta konhekꞌanh bꞌey haꞌ Kajinh Mar, lahwi tuꞌ julanh bꞌey Cades tiꞌ. 17 Yet ayonhanh bꞌey tuꞌ, kochejnitojanh hunteqꞌan ebꞌnaj kochejabꞌanh tet naj isreyal Edom, yunhe isqꞌanni ebꞌnaj tet naj tato chonhekꞌtojanh sat istxꞌotxꞌ naj, yajaꞌ xin mach isje naj. Janipaxtojanh chejabꞌ tet naj isreyal Moab, isqꞌannoj ta chonhekꞌtojanh sat istxꞌotxꞌ naj, yajaꞌ xin mach isje naj, yuxin konhkananh bꞌey Cades. 18 Lahwi tuꞌ, kotohanh sat txꞌotxꞌ desierto, kohoynihanh txꞌotxꞌ Edom, yebꞌpaxo txꞌotxꞌ Moab, japnihanh yinh yetkꞌulal bꞌay chiꞌahilo tzꞌayik yinh Moab, haꞌ tuꞌ xin konhkananh bꞌey isqꞌaxebꞌikꞌti haꞌ Arnón; yajaꞌ mach konhqꞌaxponikꞌtojanh, yuto haꞌ tuꞌ chiꞌichiko txꞌotxꞌ Moab. 19 Haꞌ bꞌey tuꞌ xin kochejtojanh hunteqꞌan ebꞌnaj tet naj Sehón, naj isreyal Hesbón, yunhe yalni ebꞌnaj tet naj tato chonhischakꞌtojanh naj sat istxꞌotxꞌ yu japnihanh bꞌey kotxꞌotxꞌanh. 20 Yajaꞌ xin kabꞌkonkanh iskꞌul naj Sehón tuꞌ jinhanh, mach isje naj ta chonhekꞌtojanh sat istxꞌotxꞌ naj. Wal xin haꞌ huneꞌ yute naj, iskutxbꞌako naj issoldado, istit ebꞌnaj iswatxꞌenokanh iscampamento bꞌey Jahaza, yichiko naj yaniko howal jinhanh. 21 Yajaꞌ xin Komam Dios Jahawil, koDiosalanh hanhonh Israelonh tiꞌanh, yako Komam naj Sehón tuꞌ yul koqꞌabꞌanh, kotanhtzenilojanh naj yebꞌ sunil iskonhobꞌ. Hak tuꞌ yu jinikanikꞌojanh istxꞌotxꞌ ebꞌnaj amorreo ay bꞌey tuꞌ. 22 Hak tuꞌ yu yokkano sunil istxꞌotxꞌ ebꞌnaj amorreo tuꞌ juhanh. Chiꞌichiti bꞌey haꞌ Arnón masanta bꞌey haꞌ Jaboc, chiꞌichipaxti yinh txꞌotxꞌ desierto kat yul yinh haꞌ Jordán. 23 Wal xin yet yalanhtokanoj yilo Komam Dios Jahawil txꞌotxꞌ tet ebꞌnaj amorreo yu yaqꞌnikano jetanh, ¿tzet yinh xin chawoche chawilo txꞌotxꞌ jetanh hunelxa? 24 Ta haꞌ hetioxh Quemos, chiyaqꞌ hunu tzet ye tuꞌ teyet hemajuloj, haꞌ huneꞌ tuꞌ cheyal heyetoj. ¿Tom mach yelo huneꞌ tuꞌ xin? Hakonhpax tuꞌanh sunil tzet xayaqꞌkano Komam Dios Jahawil jetanh, haꞌ chijalanh jetojanh. 25 ¿Tajka chatxumu tato ekꞌbꞌal hach yibꞌanh naj Balac, iskꞌahol naj Zipor, naj isreyal Moab? ¿Hulmi naj aqꞌo howal jinhanh yu txꞌotxꞌ? Machoj. 26 Hanhonh Israelonh tiꞌanh, oxebꞌ cientos habꞌilxa julanh bꞌey Hesbón yebꞌ yulaj yaldeahil yul ismajul Hesbón, yebꞌpaxo bꞌey Aroer yebꞌ yaldeahil, yebꞌpaxo yul sunil ej konhobꞌ ayayo istiꞌ haꞌ Arnón; ¿tzet yinh xin hato tinanh chexok howal jinhanh yu txꞌotxꞌ? 27 Hanintiꞌan, machi hunu istxꞌojal xaꞌinwatxꞌehan tawinh, to hach tiꞌ chawatxꞌe istxꞌojal yuto chaxhhul howal jinhanh. Wal Komam Dios Jahawil haꞌ chiꞌilni yinh kaw istzꞌajanil yinh tzet chonhelikojanh hanhonh Israelonh tiꞌanh, yebꞌ yinh tzet chexeliko hex amonita hex tiꞌ,” xhi yaꞌ, xhi ebꞌnaj ischejabꞌ yaꞌ Jefté.

28 Waxanhka tzetkꞌa chejbꞌanile yato yaꞌ Jefté tet isreyal ebꞌnaj amonita, yajaꞌ machi yabꞌeto naj.

29 Lahwi tuꞌ xin yul Yespíritu Komam Dios Jahawil yinh yaꞌ Jefté, hak tuꞌ yu isto yaꞌ yul ismajul Galaad yebꞌ yul ismajul txꞌotxꞌ yet yaꞌ Manasés, yekꞌpaxo yaꞌ bꞌey Mizpa yul ismajul Galaad; lahwi tuꞌ isto yaꞌ yanoko howal yinh ebꞌnaj amonita. 30 Yalni yaꞌ tet Komam Jahawil yet istaqꞌweniko yaꞌ yibꞌanh hakaꞌ tiꞌ:

«Mamin, ta chawako ebꞌnaj amonita yul inqꞌabꞌan, 31 hayet chinmeltzohan yinh howal xin, maknhetikꞌa chiꞌelti bꞌabꞌel kinischahnojan yul ispultahil watutan, haꞌ chinnhustojan xahanbꞌalil tawet,» xhi yaꞌ tet Komam. 32 Yaniko yaꞌ Jefté howal yinh ebꞌnaj amonita, yaniko Komam ebꞌnaj yul isqꞌabꞌ yaꞌ, 33 kaw xin niman ebꞌnaj amonita tuꞌ ispotxꞌkamo yaꞌ. Istanhtzelo yaꞌ 20 (hunkꞌal) konhobꞌ ayayo xolbꞌal Aroer yebꞌ Minit xolbꞌal tzꞌunubꞌ uva. Hak tuꞌ yu istanhilo ebꞌnaj amonita yul isqꞌabꞌ ebꞌnaj Israel.

34 Hayet ismeltzo yaꞌ Jefté bꞌey yatut bꞌey Mizpa, yelti iskutzꞌin yaꞌ ischahnoj, chiyaniko ix teꞌ pandereta kat iskanhalwi ix. Kaw xin hanhechꞌan huneꞌ iskutzꞌin yaꞌ tuꞌ, machi hunu iskꞌahol yaꞌ, machipaxo hunuxa iskutzꞌin yaꞌ. 35 Yuxin hayet yilni yaꞌ yelilo ix chawal yinh yaꞌ, istzilnito yaꞌ xil isqꞌap, yalni yaꞌ hakaꞌ tiꞌ:

—Ay kutzꞌin, kaw chiꞌok bꞌiskꞌulal yinh inkꞌulan hawu, hach chawiti huneꞌ isyaꞌtajil tiꞌ wibꞌanhan, yuto ay huneꞌ tzet tiꞌ xawaltehan tet Komam, yilal xin inyijenan, xhi yaꞌ.

36 Istaqꞌwi iskutzꞌin yaꞌ tuꞌ:

—Mam, yije winhan hakaꞌ tzet hawalte tet Komam Dios, yuto yako Komam ebꞌnaj amonita yul haqꞌabꞌ; 37 yajaꞌ xin chinqꞌanan tawet, tato chawaqꞌ kabꞌoxa ixahaw wetan, yuto chintohan yebꞌ ebꞌix wet qꞌopohalan yinh iswiꞌ witz, yunhe woqꞌan yebꞌ ebꞌix, yuto chinkaman yalanhto maxhto wichamilan, xhi ix tet ismam.

38 Yaqꞌni yaꞌ Jefté kabꞌ ixahaw tuꞌ tet ix, isto ix iswiꞌ witz yebꞌ hunteqꞌanxa yet qꞌopohal oqꞌoj, yuto chikam ix yalanhto maxhto yichamil ix. 39 Lahwi yekꞌto kabꞌ ixahaw tuꞌ, ismeltzo ix yatut ismam, isyijen yaꞌ tet Komam hakaꞌtikꞌa yalten yaꞌ. Hak tuꞌ yu iskam ix iskutzꞌin yaꞌ Jefté tuꞌ, machi xin winaj yiqꞌ ix.^a 40 Yuxin hunun habꞌil iskutxbꞌan isbꞌa ebꞌix qꞌopo Israel yulbꞌal kanhebꞌ tzꞌayik kat yoqꞌ ebꞌix, chisnaniti ebꞌix iskutzꞌin yaꞌ Jefté, yaꞌ ah Galaad.