—¿Tzet yinh yuxin mach hawal jetanh yet hato hawanoko howal yinh ebꞌnaj amonita? Wal tinanh xin chachkonhustojanh yebꞌ hawatut tiꞌ, xhi ebꞌnaj tet yaꞌ.

2 Istaqꞌwi yaꞌ Jefté tet ebꞌnaj:

—Hanintiꞌan yebꞌ inkonhobꞌan, ay huneꞌ howal koxolanh yebꞌ ebꞌnaj amonita, kexjawtehanh, yajaꞌ xin mach kexhul kolwal jinhanh. 3 Yet wilnihan tato mach kexhul kolwal, inhinni hinbꞌahan intohan yinh howal tuꞌ, wanikojan howal yinh ebꞌnaj amonita, yaniko Komam ebꞌnaj yul inqꞌabꞌan, ¿tzet yinh yuxin haꞌ tinanh chexhul howal winhan? xhi yaꞌ.

4 Iskutxbꞌaniko yaꞌ Jefté sunil ebꞌnaj ay bꞌey Galaad tuꞌ, yaqꞌni ebꞌnaj howal yebꞌ ebꞌnaj Israel titna yinh yaꞌ Efraín, yaqꞌni aykꞌayo ebꞌnaj Galaad tuꞌ ebꞌnaj. Haꞌ ebꞌnaj titna yinh yaꞌ Efraín tuꞌ bꞌuchwa ebꞌnaj yalni ebꞌnaj tato ebꞌnaj ah Galaad elna ebꞌnaj xol ebꞌnaj Efraín yebꞌ ebꞌnaj Manasés; bꞌejbꞌilkano ebꞌnaj Efraín yu ebꞌnaj.

5 Wal ebꞌnaj Galaad tuꞌ, to ebꞌnaj majwal istiꞌ haꞌ Jordán bꞌay kawil yehati yich haꞌ, yunhe mach chischakꞌto ebꞌnaj ebꞌnaj titna yinh yaꞌ Efraín chiꞌekꞌto bꞌey tuꞌ, yet chiꞌelkanh ebꞌnaj. Yuxin hayet chiꞌapni ebꞌnaj Efraín bꞌey tuꞌ kat isqꞌaxponikꞌto ebꞌnaj yalni, kat isqꞌambꞌen ebꞌnaj tet ebꞌnaj tato Efraín ebꞌnaj, taka xin chal ebꞌnaj ta machoj, 6 kat yok ebꞌnaj yilweno ebꞌnaj chalni ebꞌnaj tato chal ebꞌnaj hakaꞌ tiꞌ: Shibolet ta xin Sibolet ta xhi ebꞌnaj, yet ebꞌnaj Efraín ye ebꞌnaj chal tuꞌ, yuto ebꞌnaj tuꞌ mach chu yalni ebꞌnaj huneꞌ tzotiꞌ tuꞌ. Hak tuꞌ yu istzabꞌnayo ebꞌnaj Galaad tuꞌ ebꞌnaj, ispotxꞌnikamo ebꞌnaj ebꞌnaj istiꞌ haꞌ Jordán tuꞌ. Hayet hunel tuꞌ 42 (kabꞌebꞌ yoxkꞌal) mil isbꞌisil ebꞌnaj Efraín tuꞌ kami.^a

7 Yaꞌ Jefté tuꞌ yulbꞌal wajebꞌ habꞌil ok yaꞌ yahawilo ebꞌnaj Israel. Haxa yet iskam yaꞌ xin, ismujlax yaꞌ yul huneꞌ konhobꞌ bꞌey yul ismajul Galaad, bꞌay pitzkꞌana yaꞌ.

8 Yintajilo yaꞌ Jefté xin, haꞌ yaꞌ Ibzán ok yahawilalo ebꞌnaj Israel, yaꞌ ah Belén. 9 Yaꞌ Ibzán tuꞌ 30 (lahonhebꞌ iskawinaj) iskꞌahol yaꞌ yebꞌ 30 (lahonhebꞌ iskawinaj) iskutzꞌin yaꞌ, yaqꞌ yaꞌ mohyo ebꞌix iskutzꞌin tuꞌ yebꞌ hunteqꞌan ebꞌnaj matxa ayto yuh isbꞌa yebꞌi, hakpax tuꞌ ebꞌnaj iskꞌahol yaꞌ, mohyi ebꞌnaj yebꞌ hunteqꞌan ebꞌix matxa ayto yuh isbꞌa yebꞌi. Hujebꞌ habꞌil ok yaꞌ Ibzán tuꞌ yahawilalo anma Israel. 10 Haxa yet iskam yaꞌ Ibzán tuꞌ, ismujlax yaꞌ bꞌey Belén.

11 Lahwi tuꞌ haxa yaꞌ Elón ok yahawilalo ebꞌnaj Israel. Yaꞌ tuꞌ titna yaꞌ yinh yaꞌ Zabulón. Lahonhebꞌ xin habꞌil ok yaꞌ yahawilalo ebꞌnaj Israel tuꞌ. 12 Haxa yet iskam yaꞌ xin, ismujlax yaꞌ bꞌey Ajalón, yul ismajul ebꞌnaj Zabulón bꞌay titna yaꞌ tuꞌ.

13 Haxa istzujanilo yaꞌ Elón tuꞌ, haxa yaꞌ Abdón ok yahawilo ebꞌnaj Israel, iskꞌahol yaꞌ Hilel, ah konhobꞌ Piratón yaꞌ Abdón tuꞌ. 14 Yulbꞌal waxajebꞌ habꞌil ok yaꞌ yahawilalo ebꞌnaj Israel. Ay xin 40 (kawinaj) iskꞌahol yaꞌ yebꞌ 30 (lahonhebꞌ iskawinaj) iskꞌahol ebꞌnaj kꞌahole tuꞌ, ay xin 70 (lahonhebꞌ iskanhwinaj) isburro ebꞌnaj bꞌay chiꞌahtoj. 15 Haxa yet iskam yaꞌ Abdón tuꞌ, ismujlax yaꞌ bꞌey Piratón, ayko yul ismajul istxꞌotxꞌ ebꞌnaj Efraín, yul txꞌotxꞌ chewal txꞌotxꞌ yet naj Amalec.