2 Ay xin huneꞌ naj tiꞌ chiyij Manoa, ay yul konhobꞌ Zora, titna naj yinh yaꞌ Dan; machi xin hunu yuninal naj yebꞌ yixal, yuto machi yunin ix. 3 Isyeni isbꞌa yángel Komam Dios tet ix, yalni hakaꞌ tiꞌ:

«Hach tiꞌ, machi hunu hawunin, yajaꞌ wal tinanh chipitzkꞌahoti nichꞌan unin tawinh, kat hawilno yinh nichꞌan hawunin tuꞌ. 4 Wal tinanh xin mach chawukꞌ vino, maka hunuxa howla ukꞌe, mach chalopaxo tzet ye tuꞌ mach sajoj, hakaꞌ yalni ley. 5 Haꞌ nichꞌan hawunin chipitzkꞌa tuꞌ, mach chiꞌilaxilo xil iswiꞌ, yuto yet Komam Dios yehi yalanhto maxhto chipitzkꞌahi, nazareo chukoj. Haꞌ naj xin chiꞌichiko iskolnilo anma Israel yul isqꞌabꞌ ebꞌnaj filisteo,» xhi yángel Komam tet ix.

6 Isto ix iskꞌatanh yichamil, yalni ix tet naj:

«Ay huneꞌ ischejabꞌ Komam Dios isye isbꞌa wetan, kaw xin kꞌayilo inkꞌulan yet wilnihan, lahan jilni hakaꞌ yángel Komam Dios, mach xin inqꞌambꞌehan mak anmahil, mach xin yalpaxo wetan. 7 Wal xin haꞌ huneꞌ mayal wetan, to chipitzkꞌati wuninan, yebꞌ ta mach chiwukꞌan vino maka howla ukꞌe, mach chinlopaxojan tzet ye tuꞌ mach sajoj hakaꞌ yalni ley. Hayet chipitzkꞌa nichꞌan unin tuꞌ, yet Komam Dios chukoj, yuxin nazareo naj masanto yet chikami,» xhi ix tet yichamil.

8 Istxahli naj Manoa tet Komam Dios, yalni naj hakaꞌ tiꞌ: «Mamin, chinqꞌanan tawet tato chachejti hachejabꞌ tuꞌ jetanh hunelxa, yunhe yalni jetanh yinh tzet wal jutenanh nichꞌan unin chipitzkꞌa tuꞌ,» xhi naj.

9 Ispajtzen Komam istxah naj Manoa, isyeni isbꞌa yángel Komam tet yixal naj hunelxa xol munil, wal naj Manoa tuꞌ machi naj iskꞌatanh ix; 10 yuxin to ix yinh anhe awo tet naj hakaꞌ tiꞌ:

«Abꞌe tzet chiwaltiꞌan, naj tzotel wetan yet hunel, masyepaxo isbꞌa naj wetan hunelxa,» xhi ix.

11 Yah lemna naj Manoa, isto naj yinta ix bꞌay isye isbꞌa naj tuꞌ, yalni naj:

—¿Ham hach tiꞌ kaxhhul tzotelo tet wixalan yet hunel? xhi naj.

Istaqꞌwi yángel Komam tuꞌ:

—Hoꞌ, hanintonan, xhi.

12 Isqꞌambꞌen naj Manoa:

—Hayet chiyijni isbꞌa tzet chawal tiꞌ, ¿tzet chu jaqꞌni chꞌibꞌojanh naj, yebꞌ tzet chijutehanh naj? xhi naj.

13 Istaqꞌwi yángel Komam Jahawil tet naj:

—Isyijeꞌabꞌ ix hawixal sunil tzet halbꞌil tet ix wuhan. 14 Machojabꞌ chukꞌ ix tzet chitit yinh teꞌ uva, maka hunuxa howla ukꞌe, machojabꞌ chislopaxo ix tzet ye tuꞌ mach sajoj, hakaꞌ yalni ley; isyijeꞌabꞌ ix tzet walan, xhi yángel Komam.

15 Lahwi tuꞌ, yalni naj Manoa tet yángel Komam tuꞌ:

—Chiwalan tawet, echma hunepoj, chikowatxꞌehanh hunu noꞌ nichꞌan chiw, kat hawaꞌi, xhi naj.

16 Istaqꞌwi yángel Komam Jahawil:

—Waxanhka chinkanan hunepo tekꞌatanh, yajaꞌ mach chinwaꞌan yebꞌ hex, wal xin chisje henhusni noꞌ chiw tuꞌ yinh xahanbꞌalil tet Komam, xhi. Mach xin yohtajo naj Manoa tato yángel Komam Dios huneꞌ tuꞌ.

17 Isqꞌambꞌenpaxo naj Manoa tet naj yángel Komam Jahawil:

—Hal jetanh tzet habꞌi, haxinwal hayet chiyijni isbꞌa tzet chawal jettiꞌanh, kat jaqꞌnihanh yuchꞌandiosal tawet, xhi naj.

18 Istaqꞌwi yángel Komam Jahawil tet naj:

—¿Tzet yinh xin chaqꞌambꞌe inbꞌihan, haꞌ hinbꞌi tuꞌan kaw kꞌaybꞌalkꞌule yoki? xhi.

19 Yiniti naj Manoa noꞌ nichꞌan chiw yebꞌ sat tzꞌunubꞌ yebꞌalqꞌabꞌehal, yanayo naj yibꞌanh huneꞌ chꞌen niman chꞌen, isnhusni naj yinh xahanbꞌalil tet Komam Jahawil. Isyeni yángel Komam huneꞌ kꞌaybꞌalkꞌule yinh sat naj Manoa yebꞌ yixal, 20 yuto yet yah xaj qꞌa qꞌaꞌ yibꞌanh xahanbꞌal tuꞌ, yilni naj Manoa yebꞌ yixal yah yángel Komam Jahawil xol xaj qꞌaꞌ satkanh; hayet yilni naj huneꞌ tuꞌ yay jahno naj yebꞌ yixal, yay xulno sat txꞌotxꞌ. 21 Hak tuꞌ yu yohtanhenilo naj Manoa tato yángel Komam Jahawil huneꞌ tuꞌ; matxa xin isye isbꞌa yángel Komam tet naj yebꞌ tet yixal naj. 22 Yalni naj Manoa tet yixal:

—Yinh kaw isyelal chonhkamo tinanh, yuto majil yinh Komam Dios, xhi naj.

23 Istaqꞌwi ix tet naj:

—Tato choche Komam Dios konhyaqꞌaꞌ kamoj, machim maschah Komam koxahanbꞌal yebꞌ koyebꞌalqꞌabꞌ, machim xin masye Komam hunteqꞌan tiꞌ jilaꞌ, yebꞌ machim mayal hunteqꞌan tiꞌ jet, xhi ix.

24 Haxa yet yapni istzꞌayikal ispitzkꞌa nichꞌan yunin ix tuꞌ xin, Sansón yako ix isbꞌihoj. Kaw xin saqꞌal ischꞌibꞌ nichꞌan unin tuꞌ, ayayo iskꞌulal Komam Jahawil yibꞌanh. 25 Haxa yet hunel yet ay naj Sansón bꞌey iscampamento ebꞌnaj Dan xolbꞌal konhobꞌ Zora yebꞌ konhobꞌ Estaol, yichiko isyeni isbꞌa Yespíritu Komam Dios Jahawil yinh naj Sansón.