Naj Sansón yebꞌ ix filistea bꞌey konhobꞌ Timnat
14
Yet hunel to naj Sansón bꞌey konhobꞌ Timnat, yul ismajul txꞌotxꞌ Filistea; haꞌ bꞌey tuꞌ yil naj huneꞌ ix iskutzꞌin ebꞌnaj filisteo tuꞌ. 2 Haxa yet ismeltzo naj yatut, yalni naj tet ismam yebꞌ tet ismiꞌ:—Ay huneꞌ ix qꞌopo iskutzꞌin ebꞌnaj filisteo wilan bꞌey konhobꞌ Timnat, chinqꞌanan teyet tato chexto heqꞌanaꞌ ix wixalojan, xhi naj.
3 Yajaꞌ taqꞌwi ismam naj yebꞌ ismiꞌ naj tet hakaꞌ tiꞌ:
—¿Tom machi ebꞌix ix xol jet konhobꞌ, maka xol jet Israelal, yuxin haꞌ ebꞌix iskutzꞌin ebꞌnaj filisteo ebꞌnaj mach ayoko circuncisión yinh chasay hawixaloj? xhi ismam naj yebꞌ ismiꞌ naj tet.a
Istaqꞌwi naj Sansón:
—Haꞌ ix chiwochehan, yuxin haꞌ ix cheqꞌan wixalojan, xhi naj.b
4 Yajaꞌ xin mach yohtajo ismam naj yebꞌ ismiꞌ naj tato haꞌ Komam Dios Jahawil aqꞌni istxumuꞌ naj yiqꞌni huneꞌ ix filistea yixaloj, yu yaniko Komam howal yinh ebꞌnaj filisteo; yuto yinh huneꞌ tiempohal tuꞌ ayko ebꞌnaj Israel yalanh yip ebꞌnaj.
5 Hak tuꞌ yu isto naj Sansón yebꞌ ismam yebꞌ ismiꞌ bꞌey konhobꞌ Timnat. Haxa yet yekꞌto xol teꞌ uva sat txꞌotxꞌ konhobꞌ Timnat, yelilo lemna huneꞌ noꞌ tzehla bꞌalam yinh naj, kaw xin chiꞌel yaw noꞌ; 6 yinhnhena tuꞌ yul Yespíritu Komam yinh naj Sansón, isxitnito naj noꞌ bꞌalam tuꞌ yu isqꞌabꞌ, hakaꞌnhe isxitlaxto hunu noꞌ nichꞌan chiw, hak tuꞌ yuteto naj noꞌ, machi xin tzet ayko yul isqꞌabꞌ naj. Yajaꞌ xin mach yal naj tet ismam yebꞌ tet ismiꞌ tato isxitkamo naj noꞌ bꞌalam tuꞌ. 7 Haxa yet yapni ebꞌnaj bꞌey konhobꞌ tuꞌ, istzotel naj Sansón tet ix qꞌopo chiyoche tuꞌ, yokkano isnabꞌal naj yinh ix. Lahwi tuꞌ ismeltzo ebꞌnaj yatut.
8 Haxa yet yekꞌto hayebꞌ tzꞌayik xin, ismeltzo naj Sansón yebꞌ ismam yebꞌ ismiꞌ yu ismohyi naj yebꞌ ix qꞌopo tuꞌ; ishekꞌnilo isbꞌa naj yul bꞌeh, isto naj yilno noꞌ bꞌalam isxitkamo naj tuꞌ. Hayet yapni naj tuꞌ, ayxakto huneꞌ noꞌ ajan yul ismotx isbꞌajil noꞌ, kaw xin ay iskabꞌil noꞌ ajan tuꞌ. 9 Yinito naj noꞌ ajan tuꞌ, islohni naj noꞌ, isto naj yinh isbꞌel, haxa yet istzujchayo ismam yebꞌ ismiꞌ naj yu, yaqꞌni naj iskabꞌil noꞌ islobꞌ ismam yebꞌ ismiꞌ, yajaꞌ xin mach yal naj tato yul ismotx noꞌ bꞌalam tuꞌ yilti naj noꞌ.
10 Yapni naj yebꞌ ismam iskꞌatanh ix qꞌopo tuꞌ, yekꞌtzen naj Sansón tuꞌ qꞌinh, hakaꞌ qꞌinh chiyekꞌtze ebꞌnaj tzehtaj chimohyi ay bꞌey tuꞌ. 11 Hayet yilni ebꞌnaj filisteo naj Sansón tuꞌ, iskutxbꞌaniko ebꞌnaj 30 (lahonhebꞌ iskawinaj) ebꞌnaj tzehtaj chiꞌok iskꞌatanh naj yinh mohyilal tuꞌ, 12 yalni naj Sansón tet ebꞌnaj:
—Ay hunteqꞌan tzotiꞌ chiwalan teyet, yajaꞌ tato chetxumiloj kat heyaqꞌni ispaj wetan yulbꞌal hujebꞌ tzꞌayik qꞌinh tiꞌ, wal tuꞌ chiwaqꞌan 30 (lahonhebꞌ iskawinaj) qꞌap lino chꞌok heqꞌuxilo, qꞌap kaw ay istohol, hunun heyet hunun hex, yebꞌpaxo 30 (lahonhebꞌ iskawinaj) xil heqꞌap yet qꞌinh chiwaqꞌan. 13 Yajaꞌ tato mach cheyalilo ispaj wetan xin, hex cheyaqꞌ 30 (lahonhebꞌ iskawinaj) qꞌap lino kaw ay istohol wetan, yebꞌpaxo 30 (lahonhebꞌ iskawinaj) xilqꞌape yet qꞌinh cheyaqꞌ wetan, xhi naj.
Istaqꞌwi ebꞌnaj tuꞌ, yalni ebꞌnaj:
—Hal istzotiꞌal jabꞌehanh nanh, xhi ebꞌnaj.
14 Yalni naj Sansón hakaꞌ tiꞌ:
—Haꞌ yinh huneꞌ kꞌuxwawom, haꞌ bꞌay elilo tzet chilolaxi.
Haxa yinh mak kaw ay yip, elilo tzet kaw chiꞌ jukꞌni, xhi naj.
Haxa yinh yox tzꞌayik xin, maxhtikꞌa txumcha ispaj istzotiꞌ naj Sansón yu ebꞌnaj. 15 Yuxin haꞌ yinh ishuj tzꞌayik yalni ebꞌnaj tet yixal naj Sansón tuꞌ:
«Qꞌambꞌe ispaj hunteqꞌan tzotiꞌ tiꞌ tet hawichamil kat hawalnilo jetanh, ta mach xin chachkonhustojanh yebꞌ hamam yebꞌ hanoh. Etzanhem yu heyinilo tzet ayonhanh, yuxin makonhheyawtehanh yinh huneꞌ qꞌinh tiꞌ,» xhi ebꞌnaj tet ix.
16 Isto ix yilno naj Sansón, yok ix oqꞌo yinh sat naj, yalni ix hakaꞌ tiꞌ:
—Hach tiꞌ mach chinhawochehan, wal xin chinhayahan, ay hunteqꞌan tzotiꞌ tiꞌ ay yelapno hawal tet wet konhobꞌan machi xin chawalilo tzet yelapno ye wetan, xhi ix tet naj.
Istaqꞌwi naj tet ix:
—Maxhto chiwalilojan tet inmaman yebꞌ tet inmiꞌan, ¿hatokꞌanabꞌ tawet chiwalaꞌlojan? xhi naj.
17 Yajaꞌ xin yulbꞌal hujebꞌ tzꞌayik qꞌinh tuꞌ, oqꞌ ix sata naj, yuxin yalilo naj ispaj tzotiꞌ tuꞌ tet ix yinh ishuj tzꞌayik tuꞌ, isto ix yalno tet ebꞌnaj yet konhobꞌ tuꞌ. 18 Haꞌ yinh ishuj tzꞌayik tuꞌ, yet maxhto chiꞌay numnahi, isto ebꞌnaj filisteo tuꞌ iskꞌatanh naj Sansón, yalni ebꞌnaj ispaj istzotiꞌ naj tuꞌ hakaꞌ tiꞌ:
—Machi hunu tzet ye tuꞌ tiꞌ, ekꞌna chiꞌ sata noꞌ kabꞌ.
Machi hunu mak kaw ekꞌbꞌal yip yibꞌanh noꞌ bꞌalam, xhi ebꞌnaj.
Istaqꞌwi naj Sansón:
—Tato mach heyako inqꞌopo wakaxan tꞌoko txꞌotxꞌ,
maxhtikꞌam matxumchalo ispaj heyu, xhi naj.
19 Lahwi tuꞌ yul Yespíritu Komam Jahawil yinh naj Sansón, isto naj bꞌey konhobꞌ Ascalón, ispotxꞌnikamo naj 30 (lahonhebꞌ iskawinaj) ebꞌnaj filisteo bꞌey tuꞌ, yinilo naj xil isqꞌap ebꞌnaj, yaqꞌni naj xil isqꞌap ebꞌnaj tuꞌ istoholo ebꞌnaj halni ispaj istzotiꞌ naj tuꞌ. Lahwi tuꞌ ispaxto naj yatut, kaw xin ok ishowal naj yinh iskꞌul yu huneꞌ tuꞌ.
20 Wal ix yixal naj Sansón tuꞌ, haxa tet huneꞌ yamigo naj alaxiko ix.