—Chinoktojan wilaꞌan wixalan yul iscuarto, xhi yaꞌ.

Yajaꞌ xin mach chahlaxikto yaꞌ yul nha yu ismam ix. 2 Yalni naj tet yaꞌ Sansón:

—Wakojan yinh inkꞌulan ta yahbꞌilkano ix hawu, yuxin wakojan ix yixalo huneꞌ hawamigo; yajaꞌ xin chiwakojan huneꞌ isnoh ix txanto yul haqꞌabꞌ kat yok hawixaloj, ekꞌbꞌalto xin kawla ix ix sata isnoh tuꞌ, xhi naj.

3 Istaqꞌwi yaꞌ Sansón tet naj:

—Wal tinanh tato ay istxꞌojal chinwatxꞌehan teyinh hex filisteo hex tiꞌ, mach inmulojan chuko, xhi yaꞌ.

4 Lahwi tuꞌ isto yaꞌ Sansón, istzabꞌnayo yaꞌ oxebꞌ ciento noꞌ wech. Katakꞌonh yu ishunbꞌan yaꞌ noꞌ, isximniko yaꞌ isnhe huneꞌ noꞌ yinh hunxa noꞌ; iskꞌalbꞌaniko yaꞌ antorcha yinh isnhe noꞌ. 5 Istzujbꞌaniko yaꞌ qꞌaꞌ yinh antorcha tuꞌ, isbꞌejtzonto yaꞌ noꞌ xolaj istzꞌunubꞌ ebꞌnaj filisteo. Hak tuꞌ yu istzꞌato ixim trigo tenanxatoj yebꞌ ixim maxhto chikꞌuplaxkanh, istzꞌapaxto teꞌ uva yebꞌ teꞌ olivo.

6 Yok ebꞌnaj filisteo isqꞌambꞌenoj mak anito qꞌaꞌ tuꞌ, yabꞌenilo ebꞌnaj tato yaꞌ Sansón yuto tit ishowal yaꞌ yu tzet utelax yaꞌ yu ismam yixal, yuto yato naj yixal yaꞌ Sansón yinta huneꞌxa yamigo yaꞌ. Isto ebꞌnaj filisteo bꞌey yatut ismam ix tuꞌ, isnhusnito ebꞌnaj ix yebꞌ ismam. 7 Hayet yilni yaꞌ Sansón huneꞌ tuꞌ yalni yaꞌ tet ebꞌnaj filisteo:

—Hak tiꞌ maxeyu winhan, wal tinanh xin masanta chiwaqꞌan ispaj selel tzet maxeyu winhtiꞌan, katto wokan yinh aqꞌankꞌulal, xhi yaꞌ.

8 Istit ishowal yaꞌ Sansón ismaqꞌnikamo yaꞌ ebꞌnaj filisteo, machi xin hunu mak kolchalo yul isqꞌabꞌ yaꞌ. Lahwi tuꞌ isto yaꞌ eho yul huneꞌ chꞌen nhachꞌen ay bꞌey Etam.

9 Yahto ebꞌnaj filisteo sat istxꞌotxꞌ ebꞌnaj Israel, iswatxꞌenkanh ebꞌnaj iscampamento yul ismajul Judá masanta bꞌey konhobꞌ Lehi. 10 Isqꞌambꞌen ebꞌnaj Israel ay bꞌey Judá tuꞌ tet ebꞌnaj filisteo apni:

—¿Tzet yinh yuxin chexhul heyaqꞌaꞌ howal jinhanh? xhi ebꞌnaj.

Istaqꞌwi ebꞌnaj:

—Makonhhulanh kotzabꞌayojanh naj Sansón yu kopajtzenanh tet naj istxꞌojal iswatxꞌe naj jinhanh, xhi ebꞌnaj.

11 Hayet yabꞌen ebꞌnaj hakaꞌ tuꞌ, isto oxebꞌ mil ebꞌnaj ah Judá bꞌey chꞌen nhachꞌen bꞌey Etam bꞌay ay yaꞌ Sansón, yalni ebꞌnaj tet yaꞌ:

—¿Tzet yinh yuxin chapitiko ebꞌnaj filisteo tiꞌ jinh? ¿Tom mach chawohtajoj tato yalanh yip ebꞌnaj ayonhiktoj? xhi ebꞌnaj tet yaꞌ.

Istaqꞌwi yaꞌ Sansón tuꞌ:

—Hakaꞌtikꞌa yu iswatxꞌen ebꞌnaj istxꞌojal winhan, haktikꞌapax tuꞌ yu inpajtzenan tet ebꞌnaj, xhi yaꞌ.

12 Yalni ebꞌnaj tet yaꞌ:

—Hanhonhtiꞌanh, makonhhulanh kach kotzabꞌayojanh kat kach janikojanh yul isqꞌabꞌ ebꞌnaj filisteo tuꞌ, xhi ebꞌnaj.

Istaqꞌwi yaꞌ Sansón tuꞌ:

—Halwe wetan yinh kaw isyelal, mach chinhepotxꞌ kamojan, xhi yaꞌ.

13 Istaqꞌwi ebꞌnaj tet yaꞌ:

—Machoj, mach chachkopotxꞌkamojanh, wal xin tonhe chachkotzabꞌayojanh kat kach janikojanh yul isqꞌabꞌ ebꞌnaj filisteo, xhi ebꞌnaj.

Iskꞌalbꞌan ebꞌnaj yaꞌ yu kabꞌebꞌ txꞌanh lasu kaw akꞌto, yinilti ebꞌnaj yaꞌ yul chꞌen nhachꞌen tuꞌ. 14 Yinito ebꞌnaj yaꞌ bꞌey konhobꞌ Lehi; hayet yilni ebꞌnaj filisteo yaꞌ Sansón tuꞌ, istit ebꞌnaj ischahno yaꞌ, xanhe xin chiꞌawi ebꞌnaj yu tzalahilal. Yinhnhena tuꞌ yul Yespíritu Komam Jahawil yinh yaꞌ Sansón, islinhnito yaꞌ txꞌanh lasu kꞌalbꞌanhe isqꞌabꞌ yaꞌ, hakaꞌ chu islinhmoto txꞌal tzꞌayil lino, hak tuꞌ yu islinhnito yaꞌ txꞌanh. 15 Yinikanh yaꞌ huneꞌ isbꞌajil iskelem noꞌ burro yaxto ayayo bꞌey tuꞌ, ismaqꞌnikamo yaꞌ mil ebꞌnaj winaj yu iskelem noꞌ burro tuꞌ. 16 Lahwi tuꞌ, yalni yaꞌ Sansón hakaꞌ tiꞌ:

17 Hayet lahwi yalni yaꞌ hakaꞌ tuꞌ, isqꞌojnito yaꞌ iskelem noꞌ burro tuꞌ, yaniko yaꞌ Ramat-lehi, isbꞌiho huneꞌ txꞌotxꞌ bꞌay yu huneꞌ tuꞌ.

18 Kaw xin taj istiꞌ yaꞌ Sansón tuꞌ, yuxin ah yaw yaꞌ tet Komam Jahawil, yalni yaꞌ hakaꞌ tiꞌ:

«Mamin, hach kaxhkolwa winhan inqꞌojihan yinh ebꞌnaj filisteo tiꞌ, ¿tom xin chinhawaqꞌ kamojan yu huneꞌ tajintiꞌal tiꞌ, kat kinhawanikojan yul isqꞌabꞌ ebꞌnaj mach kach ohtanheni, ebꞌnaj mach ayopaxiko circuncisión yinh?» xhi yaꞌ.

19 Yinhnhena tuꞌ, iskꞌanhni isbꞌa txꞌotxꞌ, yahilo haꞌ yul huneꞌ holan yu Komam Dios bꞌey Lehi, yukꞌni yaꞌ Sansón haꞌ, yok yip yanma yaꞌ, yiqꞌni yip yaꞌ. Yaniko yaꞌ En-hacore isbꞌiho huneꞌ txꞌotxꞌ tuꞌ, hak tuꞌ xin isbꞌi txꞌotxꞌ tinanh.^a

20 20 (Hunkꞌal) habꞌil ok yaꞌ Sansón yahawil yinh ebꞌnaj Israel tuꞌ, yulbꞌal istiempohal yet ayikto ebꞌnaj Israel yalanh yip ebꞌnaj filisteo.