Yet ayko yaꞌ Sansón bꞌey konhobꞌ Gaza
16
Yet hunel to yaꞌ Sansón bꞌey konhobꞌ Gaza, yilni yaꞌ huneꞌ ix ix txꞌoj ye iswiꞌ bꞌey tuꞌ, yokto yaꞌ iskꞌatanh ix. 2 Hayet yabꞌenilo ebꞌnaj ay yul konhobꞌ Gaza, tato apni yaꞌ Sansón bꞌey tuꞌ, ishoynayo ebꞌnaj konhobꞌ, yaniko ebꞌnaj istanhemal ispultahil konhobꞌ yinh huneꞌ aqꞌbꞌal tuꞌ; machi xin hunu ebꞌnaj bꞌili yuto yal ebꞌnaj hakaꞌ tiꞌ: «Chinhe sajbꞌoloj, kat kopotxꞌnokamoj naj,» xhi ebꞌnaj.3 Yajaꞌ wal yaꞌ Sansón tuꞌ, yiktanhe aqꞌbꞌal way yaꞌ, yahwano yaꞌ yinh chuman aqꞌbꞌal, isjanhnikanh yaꞌ huneꞌ niman ispultahil konhobꞌ tuꞌ, yebꞌ kabꞌebꞌ ispilalil istiꞌ pulta yebꞌ istel pulta tuꞌ, yahnato yaꞌ yibꞌanh iswixikꞌ, yinahto yaꞌ yinh iswiꞌ huneꞌ wonhan ayko satakꞌti witz Hebrón.
Yaꞌ Sansón yebꞌ ix Dalila
4 Lahwi tuꞌ, yok yanma yaꞌ Sansón yinh huneꞌ ix ix chiyij Dalila ay bꞌey akꞌal Sorec. 5 Yuxin to ebꞌnaj yahawil ebꞌnaj filisteo iskꞌatanh ix Dalila tuꞌ, yalni ebꞌnaj tet ix:
—Aqꞌ subꞌchaho naj Sansón tiꞌ, kat haqꞌambꞌenilo tet naj tzet yinh xin kaw ay yip naj, yebꞌ tzet chu koqꞌojihanh yinh naj, kat kokꞌalbꞌananh naj matxa xin chu iskolni isbꞌa naj. Hak tuꞌ xin chijaqꞌanh 1,100 siclo melyu plata tawet hunun honhanh, xhi ebꞌnaj tet ix.
6 Yalni ix Dalila tet yaꞌ Sansón:
—Kaw chinqꞌanan tawet, halilo wetan bꞌaytet yinh chitit huneꞌ hawip kaw nanxa islowi. Aymi tzet chu hakꞌalbꞌalaxi, matxa xin chu hakolnilo habꞌa, xhi ix tet yaꞌ.
7 Istaqꞌwi yaꞌ Sansón:
—Tato chinkꞌalbꞌalaxayojan yu hujebꞌ teꞌ yaxla aqꞌ, hak tuꞌ xin chu ispaxilo wipan, lahan xin chinelikojan hakaꞌ komon anma, xhi yaꞌ.
8 Hak tuꞌ xin yu yiniti ebꞌnaj yahawil ebꞌnaj filisteo hujebꞌ teꞌ yaxla aqꞌ tet ix Dalila, iskꞌalnayo ix yaꞌ tuꞌ yu teꞌ. 9 Ay xin hunteqꞌan ebꞌnaj ebꞌabꞌil isbꞌa yul bꞌay ay ix, yuxin awi ix tet yaꞌ:
«Sansón, chul ebꞌnaj filisteo tawinh,» xhi ix.
Hayet yabꞌen yaꞌ Sansón hakaꞌ tuꞌ, islinhnito yaꞌ teꞌ aqꞌ hakaꞌ islinhlaxto hunu txꞌanh tzꞌayil. Hak tuꞌ xin machi yu yohtanhenilo ebꞌnaj filisteo bꞌaytuꞌwal chitit yip yaꞌ. 10 Lahwi tuꞌ, yalni ix Dalila tet yaꞌ Sansón:
—Kaw chinhawetahan, chawaniko haleqꞌtiꞌal wetan, wal tinanh kaw chinqꞌanan tawet, halilo wetan tzet chu hakꞌalbꞌalaxi, xhi ix tet yaꞌ.
11 Istaqꞌwi yaꞌ Sansón tet ix:
—Tato chinkꞌal-laxayojan yu txꞌanh nime lasu kaw akꞌto maxhto hunelo chiꞌoknikoj, hak tuꞌ xin chu ispax wipan, lahan xin chiꞌeliko wipan hakaꞌ hunu komon anma, xhi yaꞌ tet ix. 12 Iskꞌalbꞌan ix Dalila yaꞌ Sansón tuꞌ yu txꞌanh nime lasu kaw akꞌto, yahwi ix hakaꞌ tiꞌ:
«Sansón, chul ebꞌnaj filisteo tawinh,» xhi ix. Ebꞌabꞌilpaxo xin hunteqꞌan ebꞌnaj yu ix yul huneꞌ cuarto. Hayet yabꞌen yaꞌ hakaꞌ tuꞌ, islinhnito yaꞌ txꞌanh lasu tuꞌ hakaꞌ chu islinhlaxto nixhte txꞌal. 13 Hayet yilni ix Dalila huneꞌ tuꞌ, yalni ix tet yaꞌ:
—¿Tzet yinh xin chalahiko kinhawetanan chawaniko leqꞌtiꞌal wetan? Wal tinanh kaw chinqꞌanan tawet, halilo wetan tzet chu hakꞌalbꞌalaxi, xhi ix tet yaꞌ.
Istaqꞌwi yaꞌ tet ix.
—Tato chachemto hujebꞌ hilan xil inwiꞌan yebꞌ txꞌal txꞌal chiꞌokniko yinh chembꞌal, kat hakꞌalniko yinh teꞌ estaca maqꞌbꞌilayto yul txꞌotxꞌ, chipáxilo wiptiꞌan, lahan xin chiꞌeliko wipan hakaꞌ komon anma, xhi yaꞌ.
Hak tuꞌ yu iswaytzenkanh ix Dalila yaꞌ Sansón, ischemni ix hujebꞌ hilan xil iswiꞌ yaꞌ yebꞌ txꞌal txꞌal chiꞌokniko yinh chembꞌal. 14 Isximniko ix xil iswiꞌ yaꞌ tuꞌ yinh teꞌ estaca maqꞌbꞌilayto yul txꞌotxꞌ, yahwi ix tet yaꞌ hakaꞌ tiꞌ:
«Sansón, chul ebꞌnaj filisteo tawinh,» xhi ix. Yel iswayanh yaꞌ Sansón, yahwano yaꞌ, yahti hokꞌla teꞌ estaca tuꞌ yul txꞌotxꞌ.
15 Yalni ix Dalila tet yaꞌ:
—Kaw tonhe chawala tato chaxhtzala winhan, oxelxa chinhawetahan, mach xin chawaliloj bꞌaytet yinh chitit hawip, xhi ix tet yaꞌ.
16 Kaw xin chilannhetikꞌa yeko ix isqꞌambꞌenilo tet yaꞌ hunun tzꞌayik, naunhe chisqꞌambꞌen ix, yuxin kaw tibꞌayo yu yaꞌ, iskajtzakanh iskꞌul yaꞌ. 17 Yalnilo yaꞌ yinh sunil iskꞌul tet ix hakaꞌ tiꞌ:
—Maxhto hunelo tiꞌ xaꞌekꞌ chꞌen xhilet xol xil inwiꞌan, yuto yet Komam Dios wehan, nazareo hinan yettax inpitzkꞌatijan yinh inmiꞌan, yuxin tato chiꞌilaxilo xil inwiꞌtiꞌan, chipax wipan, lahanxa xin chinelikojan hakaꞌ komon anma, xhi yaꞌ.
18 Hayet yabꞌenilo ix Dalila tato yalilo yaꞌ yinh sunil yanma bꞌaytet yinh chitit yip yaꞌ, yanito ix yawtemal ebꞌnaj yahawil ebꞌnaj filisteo hakaꞌ tiꞌ:
«Wal tinanh titanhwej, yuto mayalilo naj Sansón wetan bꞌaytet yinh chitit yip naj,» xhito ix.
Isto ebꞌnaj yilno ix, iqꞌbꞌil xin chꞌen melyu yu ebꞌnaj.
19 Iswaytzenkanh ix Dalila yaꞌ Sansón tuꞌ sat isbꞌul, yawtenti ix huneꞌ naj yunhe iskꞌupnilo naj xil iswiꞌ yaꞌ Sansón. Iskꞌupnilo naj hujebꞌ majan xil iswiꞌ yaꞌ halbꞌil tuꞌ. Hayet elnaxa xil iswiꞌ yaꞌ yichiko ix Dalila isbꞌahwa yinh yaꞌ yuto matxa yip yaꞌ. 20 Yahwi ix tet yaꞌ hakaꞌ tiꞌ:
«Sansón, chul ebꞌnaj filisteo tawinh,» xhi ix. Yel iswayanh yaꞌ, isnahni yaꞌ tato chito yu iskolnilo isbꞌa yaꞌ yul isqꞌabꞌ ebꞌnaj filisteo hakaꞌtikꞌa yalanhtokanoj; mach xin yohtajo yaꞌ tato haꞌ Komam Jahawil xaꞌishekꞌilo isbꞌa yinh yaꞌ. 21 Yapni ebꞌnaj filisteo yinh yaꞌ, istzabꞌnayo ebꞌnaj yaꞌ, ischꞌotnilti ebꞌnaj isbꞌaqꞌ sat yaꞌ, yinito ebꞌnaj yaꞌ bꞌey konhobꞌ Gaza. Yaniko ebꞌnaj chꞌen cadena yinh yaꞌ yu yok yaꞌ munil yinh chꞌen molino yul preso tuꞌ. 22 Yet lahwi yelkano xil iswiꞌ yaꞌ tuꞌ xin, ichipaxiko ischꞌibꞌ hunelxa.
Iskamikal yaꞌ Sansón
23 Lahwi tuꞌ, iskutxbꞌaniko isbꞌa ebꞌnaj yahawil ebꞌnaj filisteo yu tzalahilal; yaqꞌni ebꞌnaj isxahanbꞌal tet istioxh Dagón, yalni ebꞌnaj xin:
«Haꞌ kotioxh tiꞌ, haꞌ maꞌaniko naj Sansón yul koqꞌabꞌ,
naj ayko ishowal jinh,» xhi ebꞌnaj.
24 Hayet yilni anma huneꞌ tuꞌ, yichipaxiko anma isbꞌitni tet istioxh hakaꞌ tiꞌ:
«Haꞌ kotioxh tiꞌ, maꞌaniko naj Sansón yul koqꞌabꞌ,
naj ayko ishowal jinh.
Naj etanto kotzꞌunubꞌ, yebꞌ txꞌiꞌal jet konhobꞌ ispotxꞌkamo naj,» xhi anma.
25 Hayet lanhan istzala anma tuꞌ, yalni anma:
«Iweti naj Sansón yunhe kotzala yu naj,» xhi.
Yilaxilti yaꞌ Sansón yul preso, yok anma tzebꞌo yinh yaꞌ, islinhbꞌankanh ebꞌnaj yaꞌ yiktabꞌal kabꞌebꞌ isxeꞌ nha.
26 Yalni yaꞌ Sansón tet naj tzeh chixekꞌobꞌtanhen yaꞌ:
«Iqꞌintojan bꞌay ay yoyal xeꞌ nha, kat intzabꞌnihan, kat inqꞌebꞌan hinbꞌahan yinh,» xhi yaꞌ.
27 Kaw xin nohna nha tuꞌ yu ebꞌnaj winaj yebꞌ ebꞌix ix; aypaxikto ebꞌnaj yahawil ebꞌnaj filisteo tuꞌ, aymi xin hunu oxebꞌo mil anma ayahto yinh iskabꞌ piso, yilni yetan ebꞌnaj yaꞌ Sansón tuꞌ. 28 Yah yaw yaꞌ Sansón tet Komam Dios Jahawil, yalni yaꞌ hakaꞌ tiꞌ:
«Mamin, hach inDiosalan, chinqꞌanan tawet ta chinhanatijan, waxanhka haxanhe hunel tiꞌ chawaqꞌ wipan, kat waqꞌnihan ispaj selel tet ebꞌnaj filisteo chꞌotnilti isbꞌaqꞌ insattiꞌan,» xhi yaꞌ. 29 Yaniko isqꞌabꞌ yaꞌ yinh kabꞌebꞌ yoyal ayko yiktabꞌanil nha bꞌay ayayo yalil sunil nha tuꞌ, yako iswatxꞌqꞌabꞌ yaꞌ yinh huneꞌ yoyal, yanipaxiko ismekqꞌabꞌ yinh huneꞌxa yoyal. 30 Yah yaw yaꞌ yinh kaw ip hakaꞌ tiꞌ:
«Kamojinan yebꞌ ebꞌnaj filisteo tiꞌ,» xhi yaꞌ.
Istennikꞌo yaꞌ yoyal nha tuꞌ yinh sunil yip, yaykꞌay yibꞌanh sunil ebꞌnaj yahawil ebꞌnaj filisteo, yebꞌ yibꞌanh sunil anma ayikto bꞌey tuꞌ. Kaw xin niman anma kam yu yaꞌ Sansón yet iskam yaꞌ. Ekꞌbꞌal xin isbꞌisil anma tuꞌ, sata isbꞌisil anma ispotxꞌ yaꞌ yet yalanhtokanoj.
31 Lahwi tuꞌ, yapni ebꞌnaj yuxhta yaꞌ Sansón yebꞌ makta ayto yu isbꞌa yebꞌ yaꞌ, yinito ebꞌnaj isnimanil yaꞌ, ismujni ebꞌnaj yaꞌ xolbꞌal konhobꞌ Zora yebꞌ konhobꞌ Estaol, bꞌay mujan ismam yaꞌ, haꞌ ton naj Manoa. Wal yaꞌ Sansón yulbꞌal 20 (hunkꞌal) habꞌil ok yaꞌ yahawil ebꞌnaj Israel.