—Wal chꞌen 1,100 melyu plata hawala ta elqꞌabꞌiltoj, hatzꞌaktiꞌnhen naj elqꞌom tuꞌ, matzet chal hakꞌul yinh chꞌen, yuto haninan iqꞌnhe chꞌen. Haninan welqꞌatojan chꞌen yajaꞌ tinanh chiwaqꞌpaxojan chꞌen tawet, xhi naj.

Yalni ix miꞌe xin:

—Saqꞌal yet Komam Jahawil, wunin, yuto maxawalilo chꞌen wetan, xhi ix.

3 Yaqꞌni naj chꞌen 1,100 melyu plata tet ismiꞌ, yalni ismiꞌ naj xin:

—Yinh kaw isyelal xawaqꞌan chꞌen tiꞌ tet Komam Jahawil yu iswatxꞌelax huneꞌ tioxh yinh kaw kꞌul, yebꞌ huneꞌxa tioxh chiwatxꞌi yul chꞌen molde, yu huneꞌ tuꞌ yuxin chinqꞌanan iskꞌulal Komam yinh wuninan; yuxin chiwaqꞌ meltzohojan chꞌen tawet, xhi ix miꞌe.

4 Yaqꞌni meltzoho naj chꞌen melyu tet ismiꞌ, yaqꞌni ix 200 chꞌen melyu tuꞌ tet huneꞌ naj chakꞌom plata, yunhe iswatxꞌen naj hunu istioxh ix kaw kꞌulchꞌan, yebꞌ huneꞌxa tioxh chiwatxꞌihati yul chꞌen molde, haꞌ xin bꞌey alaxokto yul yatut naj Micaía.^a

5 Haꞌ huneꞌ naj winaj Micaía tuꞌ xin ay huneꞌ yatut istioxh naj. Iswatxꞌen naj xilqꞌape chiꞌokniko yinh naj sacerdote yinh istioxh naj,^b iswatxꞌenpaxo naj hunteqꞌanxa nixhte tioxh, yaniko naj huneꞌ iskꞌahol yinh sacerdotehal yinh istioxh tuꞌ. 6 Yinh huneꞌ tiempohal tuꞌ machi mak ayko isreyalo ebꞌnaj Israel, yuxin haꞌ tzet chiyoche iskꞌul anma iswatxꞌeꞌ, haꞌ chiyu.

7 Ay xin huneꞌ naj tzeh ay bꞌey konhobꞌ Belén, sat istxꞌotxꞌ yikꞌal yaꞌ Judá, wal naj tuꞌ yikꞌal yaꞌ Leví ye naj; huneꞌ naj tzeh tuꞌ tonhe chihul ekꞌ naj yulaj konhobꞌ. 8 El naj yul konhobꞌ Belén sat istxꞌotxꞌ yikꞌal yaꞌ Judá, isto naj issayno hunu nha bꞌay chiꞌehi. Hayet lanhan yekꞌ naj bꞌey txꞌotxꞌ chewal txꞌotxꞌ, istxꞌotxꞌ yikꞌal yaꞌ Efraín, yapni naj bꞌey yatut naj Micaía.

9 Isqꞌambꞌen naj Micaía tet naj hakaꞌ tiꞌ:

—¿Bꞌaytuꞌwal hapeto? xhi naj. Istaqꞌwi naj:

—Inpetohan bꞌey konhobꞌ Belén, ayko yul ismajul Judá, hanintiꞌan levita hinan, chinekꞌan insayaꞌan bꞌay chinehan, xhi naj.

10 Yalni naj Micaía tet naj:

—Kananhkano bꞌey watuttiꞌan, chaxhok insacerdotehojan yinh intioxhan; hakaꞌ inmaman chawukoj. Chiwaqꞌan 10 (lahonhebꞌ) siclo plata hatoholo hunun habꞌil, chiwaqꞌnipaxojan xil haqꞌap yebꞌ tzet chaloh, xhi naj. Hak tuꞌ yu iskankano naj tzeh levita tuꞌ iskꞌatanh naj Micaía.

11 Kaw xin chitzala naj yu kankano naj bꞌey yatut naj Micaía tuꞌ; hakaꞌ iskꞌahol naj Micaía yuko naj. 12 Yaniko naj Micaía naj tzeh levita tuꞌ issacerdotehoj yinh istioxh, yehkanayo naj yatut naj tuꞌ. 13 Istxumni naj Micaía hakaꞌ tiꞌ:

«Wal tinanh, chiyaqꞌayo Komam Jahawil isyaxil wibꞌanhan, yuto levita naj ayko insacerdotehojan,» xhi naj.