«Asiꞌwej, kat heyohtanhenilo txꞌotxꞌ,» xhi ebꞌnaj. Yapni ebꞌnaj howanh tuꞌ bꞌey chewal txꞌotxꞌ yul ismajul yikꞌal yaꞌ Efraín, yapni ebꞌnaj bꞌey yatut naj Micaía, iskankano ebꞌnaj huneꞌ aqꞌbꞌal bꞌey tuꞌ. 3 Hayet ay ebꞌnaj bꞌey yatut naj Micaía tuꞌ xin, yabꞌen ebꞌnaj yul isnuqꞌ naj tzeh levita tuꞌ, yuxin to ebꞌnaj iskꞌatanh naj, isqꞌambꞌen ebꞌnaj tet naj:

—¿Mak kaxhiniti bꞌey tiꞌ? ¿tzet yinh xin ayachikꞌoj? ¿tzet chasaykꞌoj? xhi ebꞌnaj tet naj.

4 Istaqꞌwi naj:

—Naj Micaía tiꞌ aqꞌni istzotiꞌ wetan yu wokan issacerdoteho naj yinh istioxh, xhi naj. 5 Yuxin yal ebꞌnaj tet naj hakaꞌ tiꞌ:

—Qꞌambꞌe tet Komam Dios tato kꞌul chiꞌeloko huneꞌ kobꞌel tiꞌanh, xhi ebꞌnaj. 6 Istaqꞌwi naj levita tuꞌ tet ebꞌnaj:

—Asiꞌwej yinh aqꞌankꞌulal, haꞌ Komam Dios chiꞌok heyetbꞌihoj yinh hebꞌel, xhi naj.

7 Isto ebꞌnaj howanh tuꞌ bꞌey konhobꞌ Lais. Haꞌ anma ay yul konhobꞌ tuꞌ kaw aqꞌankꞌulal yehi, kaw matzet chal iskꞌul, yebꞌ kaw isah iskꞌul; lahan hakaꞌ anma ay bꞌey konhobꞌ Sidón. Machi xin hunu mak chiꞌaniko howal yinh, mach xin ayokto yalanh yip hunuxa konhobꞌ. Nahat xin yehilo yinh konhobꞌ Sidón, wal xin yet isbꞌa ischukil. 8 Lahwi tuꞌ ismeltzo ebꞌnaj howanh ilom txꞌotxꞌ iskꞌatanh yuxhta bꞌey konhobꞌ Zora yebꞌ konhobꞌ Estaol. Haꞌ ebꞌnaj yuxhta ebꞌnaj tuꞌ qꞌambꞌeni:

—¿Hanikꞌ maꞌeliko hebꞌel? xhi ebꞌnaj.

Istaqꞌwi ebꞌnaj xin:

9 —Ahanhwewanoj, ahojonhweto jaqꞌaꞌko howal yinh ebꞌnaj. Kaw konhekꞌanh kobꞌeytzeꞌanh huneꞌ txꞌotxꞌ tuꞌ, jilanh tato kaw kꞌul txꞌotxꞌ. Machojabꞌ hunu hex chexkan tzꞌonhnoj yinh matzet cheyu, wal xin tonhwej, jiqꞌalo huneꞌ txꞌotxꞌ tuꞌ. 10 Hayet chexapni bꞌey tuꞌ, kat heyilni anma kaw matzet chal iskꞌul, yebꞌ huneꞌ txꞌotxꞌ tuꞌ kaw nimejal yekoj. Haꞌ Komam Dios xin anheko txꞌotxꞌ yul koqꞌabꞌ, huneꞌ txꞌotxꞌ tuꞌ sunil tzet tzꞌajan sat txꞌotxꞌ, xhi ebꞌnaj.

11 Hak tuꞌ yu yel 600 ebꞌnaj Israel yikꞌal yaꞌ Dan bꞌey konhobꞌ Zora yebꞌ konhobꞌ Estaol, iqꞌbꞌil xin ismunlabꞌal ebꞌnaj yet howal. 12 Isto ebꞌnaj yinh howal tuꞌ, yapni ebꞌnaj bꞌey txꞌotxꞌ ismajul yikꞌal yaꞌ Judá, iswatxꞌenkanh ebꞌnaj ismantiado iskawilal konhobꞌ Quiriat-jearim, yetkꞌulal bꞌay chito tzꞌayik. Haꞌ ton huneꞌ txꞌotxꞌ tuꞌ chito hal-lax tinanh ismantiado yaꞌ Dan. 13 Lahwi tuꞌ yel ebꞌnaj bꞌey tuꞌ, yapni ebꞌnaj bꞌey chewal txꞌotxꞌ yul ismajul yikꞌal yaꞌ Efraín, yapni ebꞌnaj bꞌey yatut naj Micaía.

14 Yalni ebꞌnaj howanh bꞌey ilno txꞌotxꞌ Lais tuꞌ tet ebꞌnaj yuxhta tuꞌ:

«Ilwekꞌanabꞌtoj lah, haꞌ yul huneꞌ nha tuꞌ ayikꞌto xil isqꞌap naj sacerdote yebꞌ nixhte tioxh, yebꞌ huneꞌ tioxh ayko chꞌen plata yinh, yebꞌ huneꞌxa watxꞌebꞌil yul molde. Chisje heyilni tzet cheyute,» xhi ebꞌnaj.

15 Hayet yapni ebꞌnaj bꞌey tuꞌ isto ebꞌnaj bꞌay ay naj tzeh levita tuꞌ ayko yul yatut naj Micaía. Hayet yilni ebꞌnaj naj, isqꞌambꞌen ebꞌnaj hanikꞌ ye naj. 16 Wal ebꞌnaj 600, ebꞌnaj yikꞌal yaꞌ Dan, kankano ebꞌnaj istiꞌ pulta, ayko xin ischꞌen ebꞌnaj yet howal yul isqꞌabꞌ. 17 Yokto ebꞌnaj howanh tuꞌ yul yatut naj Micaía, yinilti ebꞌnaj huneꞌ tioxh ayko chꞌen plata yinh, yinipaxilti ebꞌnaj xil isqꞌabꞌ naj sacerdote yinh tioxh tuꞌ yebꞌ hunteqꞌanxa nixhte tioxh ayikto yul nha tuꞌ. Wal naj sacerdote kankano naj istiꞌ pulta iskꞌatanh ebꞌnaj 600 yikꞌal yaꞌ Dan.

18 Hayet yilni naj sacerdote yokto ebꞌnaj howanh yul yatut naj Micaía tuꞌ, yinilti ebꞌnaj huneꞌ tioxh watxꞌebꞌil, ayko chꞌen plata yinh, yinipaxilti ebꞌnaj xil isqꞌap naj sacerdote yinh tioxh yebꞌ hunteqꞌanxa nixhte tioxh, yalni naj tet ebꞌnaj hakaꞌ tiꞌ:

—¿Tzet cheyu tuꞌ? xhi naj.

19 Istaqꞌwi ebꞌnaj:

—Kach hatiꞌ, ako haqꞌabꞌ ismajo hatiꞌ, kata, yuto chachto jintajanh, hakaꞌ xin komamanh chawukoj, kat hawok kosacerdotehojanh. ¿Tom ekꞌbꞌalto kꞌul hawok sacerdotehal yinh huneꞌ naj winaj yebꞌ iskꞌahol, sata hawok sacerdotehal yinh hunmajan ebꞌnaj Israel? xhi ebꞌnaj tet naj. 20 Istzalakanh iskꞌul naj sacerdote tuꞌ. Yinito naj xil isqꞌap yet sacerdote yebꞌ nixhte tioxh, yinipaxto naj huneꞌ tioxh watxꞌebꞌil, ayko chꞌen plata yinh, isto naj yinta ebꞌnaj yikꞌal yaꞌ Dan tuꞌ.

21 Hunxa xin isto ebꞌnaj yinh isbꞌel, isbꞌabꞌi nixhte yuninal ebꞌnaj yebꞌ isnoqꞌ ebꞌnaj yebꞌ tzetaj ay ebꞌnaj. 22 Nahatxa xin chito ebꞌnaj yinh isbꞌel tuꞌ, yet iskutxbꞌanayo naj Micaía ebꞌnaj ayayo iskawilal yatut, isto ebꞌnaj istzujnoyo ebꞌnaj Israel yikꞌal yaꞌ Dan tuꞌ. 23 Hayet yabꞌen ebꞌnaj yikꞌal yaꞌ Dan yahwi naj Micaía yintaj, ismeltzo ebꞌnaj, yok tꞌanhno ebꞌnaj yinh sat naj, isqꞌambꞌen ebꞌnaj tet naj:

—¿Tzet hawehi, yuxin tzetkꞌa anma maxakutxbꞌa? xhi ebꞌnaj.

24 Istaqꞌwi naj Micaía tet ebꞌnaj:

—Maxeyelqꞌato intioxhan watxꞌebꞌil wuhan, maxeyinipaxto insacerdotehan yinh intioxhan, kat hepaxtoj. ¿Tom ayto tzet maxeyakano wetan? kat xin heyalnipaxo wetan: ¿Tzet hawehi? xhi naj.

25 Istaqꞌwi ebꞌnaj yikꞌal yaꞌ Dan tet naj:

—Bꞌej yelti hawaw jintajanh, kꞌuxantaxka ay ebꞌnaj nabꞌ istit ishowal, kat chachistanhtzeniloj yebꞌ hawuninal, xhi ebꞌnaj tet naj.

26 Islahniko ebꞌnaj yikꞌal yaꞌ Dan tuꞌ isbꞌel. Hayet jilni naj Micaía, ta kaw ay yip ebꞌnaj sata naj, ismeltzo naj bꞌey yatut. 27 Yinito ebꞌnaj sunil tzet yilo tet naj Micaía, yinipaxto ebꞌnaj naj sacerdote levita; yapni ebꞌnaj bꞌey konhobꞌ Lais. Wal anma ay bꞌey Lais tuꞌ, kaw aqꞌankꞌulal yehi, kaw matzet chal iskꞌul. Yaniko ebꞌnaj Israel tuꞌ howal yinh anma ay yul konhobꞌ Lais, ispotxꞌnikamo ebꞌnaj anma yu chꞌen espada, isnhusnilo ebꞌnaj konhobꞌ.

28 Haꞌ konhobꞌ Lais tuꞌ kaw nahat yehilo yinh konhobꞌ Sidón yebꞌ xin mach chitxonhwi yebꞌ chiloqꞌwi ebꞌnaj tet hunuxa konhobꞌ, yuxin machi mak kolni ebꞌnaj yul isqꞌabꞌ ebꞌnaj Israel tuꞌ. Konhobꞌ Lais tuꞌ, ayayo yul akꞌal yul ismajul Bet-rehob, yok ebꞌnaj iswatxꞌenokanh konhobꞌ tuꞌ hunelxa, yehayo ebꞌnaj bꞌey tuꞌ. 29 Yaniko ebꞌnaj Dan isbꞌiho konhobꞌ Lais tuꞌ, yuto hak tuꞌ isbꞌi ismam icham ebꞌnaj, haꞌ ton huneꞌ iskꞌahol yaꞌ Israel. 30 Wal ebꞌnaj yikꞌal yaꞌ Dan yakanh ebꞌnaj huneꞌ tioxh ayko chꞌen plata yinh, iqꞌbꞌil yu tuꞌ, yu yinayo isbꞌa ebꞌnaj tet. Yaniko ebꞌnaj naj Jonatán iskꞌahol yaꞌ Gersón issacerdotehoj, wal xin yaꞌ Moisés, ismam icham naj Jonatán tuꞌ. Haꞌ xin naj Jonatán yebꞌ iskꞌahol ok sacerdotehal xol ebꞌnaj yikꞌal yaꞌ Dan masanto yet yilaxto ebꞌnaj preso yul huneꞌxa nan konhobꞌal. 31 Sunil istiempo ayko Yatut Komam Dios bꞌey konhobꞌ Silo, yakanh ebꞌnaj yikꞌal yaꞌ Dan huneꞌ tioxh watxꞌebꞌil yu naj Micaía yul Yatut Komam tuꞌ.^a