Huneꞌ naj levita yebꞌ iskabꞌ yixal
19
Haꞌ yinh istiempohal yet maxhto isreyal ebꞌnaj Israel, ay huneꞌ naj levita ay bꞌey txꞌotxꞌ chewal txꞌotxꞌ bꞌey istxꞌotxꞌ yikꞌal yaꞌ Efraín, kaw xin nahat yekanto sat txꞌotxꞌ chewal txꞌotxꞌ tuꞌ. Yiqꞌni naj levita tuꞌ huneꞌ ix; huneꞌ ix tuꞌ ah konhobꞌ Belén ayko yul ismajul txꞌotxꞌ Judá. 2 Yajaꞌ xin issay ix ismul iskꞌatanh naj, ispaxto ix yatut ismam bꞌey konhobꞌ Belén, wal xin kankano ix kanhebꞌ ixahaw bꞌey yatut ismam tuꞌ. 3 Lahwi tuꞌ yahwano yichamil ix, isto naj ilwal yinh ix, yu istzotel naj yinh aqꞌankꞌulal tet ix, kꞌuxantaxka chito isjeti ix. Tzujan xin huneꞌ naj iskꞌamteꞌ naj yintaj yebꞌ kakꞌonh noꞌ burro; ischahlax naj yu ix yet yapni naj yatut ismam ix tuꞌ. 4 Yet yilni naj ismam ix tuꞌ naj tzeh, yelti naj ischahno naj yinh tzalahilal. Yalni naj tato chikankano naj yatut naj tuꞌ. Hak tuꞌ yu iskankano naj oxebꞌ tzꞌayik yul yatut ismam ix tuꞌ; yaqꞌlax tzet chislo naj, yaqꞌlax tzet chukꞌ naj, yaqꞌlaxpaxo bꞌay chiway naj.5 Haxa yinh iskanh tzꞌayik xin, yahwano sunil makta ay yul nha tuꞌ, wal naj levita iswatxꞌe isbꞌa naj ispaxtoj, yajaꞌ ismam yixal naj tuꞌ yal naj hakaꞌ tiꞌ:
—Estam chexwaꞌkano, maxhto chextohi, haxinwal ay heyip yinh hebꞌel, xhi naj.
6 Yay tzꞌonhno naj yebꞌ ix waꞌoj; lahwi tuꞌ yalni naj mame hakaꞌ tiꞌ:
—Kananhwekano hunxa aqꞌbꞌal, chiwalan tawet, tato kaw chitzalaho hawanma, xhi naj.
7 Yahwano naj yu isto naj yalni, yok ismam ix tuꞌ yalno tet naj:
—Kananhwekano hunxa aqꞌbꞌal tiꞌ, xhi naj. Hak tuꞌ yu yehayo naj hunxa aqꞌbꞌal tuꞌ.
8 Haxa yinh ishowebꞌ tzꞌayik, yinh kaw sahabꞌ sakꞌayal ahwano naj yu isto naj, yajaꞌ xin yal ismam ix hakaꞌ tiꞌ:
—Xewanhnino yalanhto maxhto chextohi, ahojabꞌna tzꞌayik bꞌela, xhi naj. Hak tuꞌ xin yu yok naj waꞌoj yebꞌ ismam yixal.
9 Yah linhno naj yu isto naj yebꞌ yixal yebꞌ iskꞌamteꞌ. Haxa xin naj ismam yixal naj tuꞌ yal hakaꞌ tiꞌ:
—Kaw maꞌah tzꞌayik lah, kananhwekano hunxa aqꞌbꞌal, kat hawaqꞌni tzalaho hakꞌul, haxa yet hekal sahabꞌ chaxhahwanoj, kat hato hawatut, xhi naj.
10 Yajaꞌ xin matxa isjekano naj huneꞌ aqꞌbꞌal tuꞌ, wal xin to naj, yinito naj yixal yebꞌ ischejabꞌ yebꞌ kakꞌonh isburro ayahto isxhila; yapni naj satakꞌti konhobꞌ Jebús, haꞌ ton Jerusalén.a
11 Yet ay naj iskawilal konhobꞌ Jebús tuꞌ, haꞌ tzꞌayik xin xaꞌaynahi. Yalni ischejabꞌ naj tet:
—Tonh bꞌey iskonhobꞌ ebꞌnaj jebuseo ay bꞌey tiꞌ, kat kokankano huneꞌ aqꞌbꞌal tiꞌ, xhi naj.
12 Istaqꞌwi naj levita tuꞌ:
—Machoj, mach chonhkan yul hunu konhobꞌ mach Israeloj, wal xin palan korinhbꞌanto bꞌey konhobꞌ Gabaa, xhi naj. Yalnipaxo naj tet iskꞌamteꞌ:
13 —Haꞌ bꞌey konhobꞌ Gabaa tuꞌ chonhkankanoj, maka bꞌey konhobꞌ Ramá, xhi naj.
14 Hak tuꞌ yu isrinhbꞌanto ebꞌnaj yinh isbꞌel tuꞌ, haxa yet lanhanxa yay numnahi, yapni ebꞌnaj bꞌey Gabaa, haꞌ huneꞌ konhobꞌ tuꞌ iskonhobꞌ ebꞌnaj yikꞌal yaꞌ Benjamín. 15 Ishekꞌnilo isbꞌa ebꞌnaj yinh bꞌeh bꞌey tuꞌ, isto ebꞌnaj yul konhobꞌ Gabaa yu iskankano ebꞌnaj huneꞌ aqꞌbꞌal bꞌey tuꞌ. Hak tuꞌ xin yu yokto ebꞌnaj yul konhobꞌ, yay tzꞌonhno ebꞌnaj yul txonhbꞌal yuto machi mak aqꞌni bꞌay chiway ebꞌnaj.
16 Haxa yet kaw xaꞌah aqꞌbꞌal xin yekꞌto huneꞌ naj icham, ispeto munil. Ah chewal txꞌotxꞌ naj yul ismajul yaꞌ Efraín ay naj yet yalanhtokanoj; wal xin bꞌey konhobꞌ Gabaa tuꞌ ay naj. Haꞌ xin anma ay bꞌey Gabaa tuꞌ, yikꞌal yaꞌ Benjamín ye ebꞌnaj.
17 Hayet yah tꞌanhno icham, yilni icham naj bꞌelwom yul txonhbꞌal tuꞌ, isqꞌambꞌen icham tet naj:
—¿Bꞌay hapeto, bꞌay xin chachtohi? xhi icham.
18 Istaqꞌwi naj tuꞌ:
—Kopetohanh bꞌey Belén, yul ismajul Judá, chonhtohanh bꞌey watutan bꞌay kaw nahat yekanto bꞌey txꞌotxꞌ chewal txꞌotxꞌ yul ismajul ebꞌnaj yikꞌal yaꞌ Efraín. Konhekꞌanh hayebꞌ tzꞌayik bꞌey Belén, haꞌ tinanh xin chintohan bꞌay ay Yatut Komam Jahawil, machi mak xin chiꞌaqꞌni bꞌay chonhwayanh bꞌey tiꞌ. 19 Wal xin ay istelaj koburrohanh iqꞌbꞌil juhanh; iqꞌbꞌilpaxo tzet chinlohan yebꞌ wixalan yebꞌ inchejabꞌan, iqꞌbꞌilpaxo kovinohanh, tzꞌajan lahan iqꞌbꞌil juanh, xhi naj.
20 Istaqꞌwi icham tet naj:
—Matzet chal hekꞌul, tonhwe wintajan, sunil tzet chiꞌokniko hawu chiwaqꞌan tawet, mach chisje inkꞌulan ta chachkankano yul txonhbꞌal tiꞌ, xhi icham.
21 Hak tuꞌ xin yu yinito icham ebꞌnaj yul yatut, yaqꞌni icham istelaj isburro naj, istxꞌahni ebꞌnaj yoj, yok ebꞌnaj waꞌoj. 22 Hayet kaw lanhan istzala ebꞌnaj tuꞌ, yapni hunteqꞌan ebꞌnaj winaj kaw txꞌojkanoj ay yul konhobꞌ tuꞌ bꞌey yatut icham. Ishoynayo ebꞌnaj teꞌ nha tuꞌ, yichiko ebꞌnaj ismaqꞌnito teꞌ pulta, yalni ebꞌnaj tet icham hakaꞌ tiꞌ:
—Ilti huneꞌ naj mahul takꞌatanh tinanh, chijochehanh chonhwayanh yebꞌ naj, xhi ebꞌnaj.
23 Yelti icham yahaw nha tuꞌ tzotelo tet ebꞌnaj, yalni icham tet ebꞌnaj:
—Machoj, hex wet anmahil mach chewatxꞌe huneꞌ istxꞌojal tuꞌ yinh naj mahul watut tiꞌanh. 24 Wal xin ay huneꞌ inkutzꞌinan maxhto yichamil yebꞌpaxo xin yixal naj iqꞌbꞌil yu, chiwaltojan ebꞌix teyet kat hewatxꞌen tzet cheyoche yinh ebꞌix, yajaꞌ wal yinh naj tiꞌ, mach chewatxꞌe istxꞌojal tuꞌ, xhi icham.
25 Yajaꞌ xin mach yabꞌeto ebꞌnaj yinh tzet yal icham. Hak tuꞌ xin yu yanilto naj levita tuꞌ yixal yul calla tet ebꞌnaj, yok ebꞌnaj yetano ix sunilbꞌal aqꞌbꞌal; haxa yet lanhanxa issajbꞌiloj isbꞌejnikano ebꞌnaj ix. 26 Haxa yet lanhanxa issajbꞌilo xin ismeltzokto ix yatut icham bꞌay ay yichamil ix tuꞌ, yajaꞌ hayet yapni ix istiꞌ pulta yaykꞌay ix.b 27 Haxa yet yahwano naj levita, ishajni naj teꞌ pulta yu istoxa naj yinh isbꞌel; yilni naj yixal tuꞌ hichanto ix sat txꞌotxꞌ, aykanto isqꞌabꞌ ix yibꞌanh ismarcohal teꞌ pulta.
28 Yalni yichamil ix tuꞌ tet:
—Ahanhwanoj, tonh, xhi naj, yajaꞌ xin mach taqꞌwi ix.
Yinikanh naj ix, yanahto naj ix yibꞌanh noꞌ burro, isto naj yinh isbꞌel bꞌey yatut. 29 Hayet yapni naj yatut yiniti naj chꞌen cuchillo, ishosnayo naj isnimanil ix bꞌay chischale isbꞌa isbꞌajil, kabꞌlahonhebꞌ yuteyo naj isnimanil ix tuꞌ; yanito naj isnimanil ix tet hunun ismajul ebꞌnaj Israel. 30 Haꞌ sunil mak ilni huneꞌ tuꞌ yal hakaꞌ tiꞌ:
«Yichitax jel, hanhonh Israelonh tiꞌ, bꞌey Egipto maxhto bꞌay chijil yuni hakaꞌ tiꞌ. Tinanh xin kaw kotxumuwej yinh huneꞌ tiꞌ, kat jilni yinh tzet chiꞌelikoj, kat kotzotel yibꞌanhiloj,» xhi ebꞌnaj.