—Halilo tzet ye huneꞌ istxꞌojal tuꞌ, xhi ebꞌnaj. 4 Yalni naj levita, yichamil ix aqꞌlaxkamo tuꞌ:

—Kinapnihan yebꞌ wixalan bꞌey konhobꞌ Gabaa, ayko yul ismajul ebꞌnaj yikꞌal yaꞌ Benjamín; inkanan wayo huneꞌ aqꞌbꞌal bꞌey tuꞌ. 5 Iskutxbꞌa isbꞌa ebꞌnaj ay bꞌey Gabaa winhan; ishoynayo ebꞌnaj teꞌ nha bꞌay ayonh tuꞌanh yinh huneꞌ aqꞌbꞌal tuꞌ yunhe kinismaqꞌnikamojan ebꞌnaj. Haxa wixalan ok ebꞌnaj yetaꞌ; hak tuꞌ xin yu iskam ix yu ebꞌnaj. 6 Winitijan wixal tuꞌan, inpolnayojan ix, wanitojan isnimanil ix yul sunil ismajul ebꞌnaj Israel yunhe heyohtanheni huneꞌ mule yu tiꞌ yebꞌ istxꞌojal yako ebꞌnaj yinh ebꞌnaj Israel. 7 Hanhonh tiꞌ jet Israelal kobꞌa, yuxin haꞌ tinanh chisje hetxumni yebꞌ heyalni tzet chiꞌeliko huneꞌ tiꞌ, xhi naj.

8 Huneꞌnhe xin yute isnabꞌal ebꞌnaj sunil, yahwano ebꞌnaj, yalni ebꞌnaj hakaꞌ tiꞌ:

—Wal tinanh, machi hunujonh tiꞌ chonhmeltzo bꞌey komantiado, machipaxo hunujonh chonhmeltzo bꞌay ayonh. 9 Wal tinanh chonhahweto jaqꞌaꞌko howal yinh konhobꞌ Gabaa tuꞌ; yaj chijayo suerte yu jilni mak chito bꞌabꞌel. 10 Haxa hunun xol lahlahonhwanh ebꞌnaj winaj xol sunil ebꞌnaj Israel tiꞌ chiꞌinito tzet chikolo hanhonh soldadohonh tiꞌ; walonh kosunil xin chonhto jaqꞌaꞌ ispaj tet ebꞌnaj Gabaa tuꞌ, yu istxꞌojal iswatxꞌe ebꞌnaj jinh, hanhonh Israelonh tiꞌ, xhi ebꞌnaj.

11 Iskutxbꞌaniko isbꞌa sunil ebꞌnaj Israel yu yaniko ebꞌnaj howal yinh konhobꞌ tuꞌ; hunxanhe yute isnabꞌal ebꞌnaj sunil. 12 Yanito ebꞌnaj Israel hunteqꞌan ebꞌnaj chejabꞌ yulaj sunil ismajul ebꞌnaj yikꞌal yaꞌ Benjamín, yalni ebꞌnaj hakaꞌ tiꞌ:

«¿Aytam iswatxꞌen ebꞌnaj huneꞌ istxꞌojal koxol tiꞌ? 13 Aweko hunteqꞌan ebꞌnaj txꞌoj isnabꞌal ay bꞌey konhobꞌ Gabaa yul koqꞌabꞌanh, kat kopotxꞌnikamojanh ebꞌnaj, hak tuꞌ xin chiꞌel istxꞌojal koxol hanhonh Israelonh tiꞌ,» xhi ebꞌnaj. Yajaꞌ xin mach yabꞌeto ebꞌnaj yikꞌal yaꞌ Benjamín yinh tzet yal ebꞌnaj Israel tuꞌ. 14 Wal xin tit ebꞌnaj yul hunun konhobꞌ yul ismajul ebꞌnaj Benjamín tuꞌ, iskutxbꞌaniko isbꞌa ebꞌnaj bꞌey Gabaa yu yaniko ebꞌnaj howal yinh ebꞌnaj Israel tuꞌ. 15 26 mil isbꞌisil ebꞌnaj soldado kutxikoj, tit yul hunun konhobꞌ ayko yul ismajul ebꞌnaj Benjamín, ebꞌnaj tuꞌ watxꞌebꞌilxa isbꞌa ebꞌnaj istit yinh howal. Nan xin yepaxo ebꞌnaj 700 soldado kaw helan ah Gabaa. 16 Xol sunil ebꞌnaj soldado tuꞌ, 700 ebꞌnaj, haꞌ ismekqꞌabꞌ chiyaqꞌbꞌalnhe, kaw xin helan ebꞌnaj isqꞌojwahi yu ximich; hayet chiqꞌojwa ebꞌnaj chꞌilwento ebꞌnaj yinh huneꞌ petan yehi, haꞌ huneꞌ nichꞌan qꞌej ayko yiktabꞌal hakaꞌ xil wiꞌe, haꞌ chij yu ebꞌnaj, machi hunu ebꞌnaj chikꞌaywahi.

17 Haxa isbꞌisil sunil ebꞌnaj Israel iskutxbꞌako isbꞌa tuꞌ, 400 mil isbꞌisil ebꞌnaj, kaw xin helan ebꞌnaj yinh howal, nan xin yepaxo ebꞌnaj yikꞌal yaꞌ Benjamín.

18 Lahwi tuꞌ, isto ebꞌnaj Israel bꞌey Bet-el,^a haꞌ tuꞌ isqꞌambꞌe ebꞌnaj tet Komam Dios hakaꞌ tiꞌ:

—¿Mak ebꞌnaj chito bꞌabꞌel yaqꞌaꞌko howal yinh ebꞌnaj yikꞌal yaꞌ Benjamín? xhi ebꞌnaj. Istaqꞌwi Komam Jahawil:

—Ebꞌnaj Judá chibꞌabꞌi yaniko howal yinh ebꞌnaj, xhi Komam.

19 Haxa yet hunxa tzꞌayik xin kaw sahabꞌ ah ebꞌnaj Israel, iswatxꞌen isbꞌa ebꞌnaj isto yanoko howal yinh konhobꞌ Gabaa. 20 Yelto ebꞌnaj Israel yaqꞌno howal yinh ebꞌnaj Benjamín, yuxin hitziko ebꞌnaj yetkꞌulal konhobꞌ Gabaa. 21 Yajaꞌ wal ebꞌyaꞌ Benjamín elti ebꞌnaj bꞌey konhobꞌ Gabaa yinh howal, yinh huneꞌ tzꞌayik tuꞌ ispotxꞌ ebꞌnaj 22 mil ebꞌnaj Israel. 22 Haxa yinh hunxa tzꞌayik yiqꞌ yip ebꞌnaj Israel tuꞌ, isto ebꞌnaj yanoko howal yinh ebꞌnaj yikꞌal yaꞌ Benjamín; haꞌtikꞌa xin bꞌay yaqꞌ ebꞌnaj howal yet bꞌabꞌelal, haꞌ tuꞌ okpaxo ebꞌnaj hunelxa yu yaniko howal; 23 yuxin to ebꞌnaj Israel tuꞌ bꞌey konhobꞌ Bet-el sata Komam Jahawil, yok ebꞌnaj oqꞌo sunilbꞌal tzꞌayik masanto yet yahbꞌal aqꞌbꞌal. Isqꞌambꞌen ebꞌnaj tet Komam Jahawil hakaꞌ tiꞌ:

—¿Chimkonhichipaxikojanh janikojanh howal yinh ebꞌnaj titna yinh yaꞌ Benjamín, ebꞌnaj juxhtajanh tuꞌ hunelxa? xhi ebꞌnaj. Istaqꞌwi Komam Jahawil:

—Ahanhweto heyaqꞌaꞌko howal yinh ebꞌnaj, xhi Komam.

24 Yuxin hitziko ebꞌnaj Israel iskawilal ebꞌnaj Benjamín yet yewihal yinh hunxa tzꞌayik. 25 Haxa yinh iskayel tuꞌ, elpaxti ebꞌnaj Benjamín ay bꞌey konhobꞌ Gabaa yinh ebꞌnaj Israel, ispotxꞌni ebꞌnaj 18 mil ebꞌnaj Israel ay yespada.

26 Yuxin to sunil ebꞌnaj soldado Israel tuꞌ yebꞌ sunil konhobꞌ Israel bꞌey Bet-el sata Komam Jahawil, yok ebꞌnaj oqꞌo sata Komam, machi xin waꞌ ebꞌnaj sunilbꞌal tzꞌayik, isnhusni ebꞌnaj isxahanbꞌal tet Komam, yaqꞌni ebꞌnaj yebꞌalqꞌabꞌe yet aqꞌankꞌulal tet Komam Jahawil. 27 Isqꞌambꞌe ebꞌnaj Israel tet Komam Jahawil hakaꞌ tiꞌ: (Yinh huneꞌ tiempohal tuꞌ, haꞌ bꞌey Bet-el ay isKaxha istrato Komam, 28 haꞌ xin yaꞌ Finees, iskꞌahol yaꞌ Eleazar, iskꞌahol yaꞌ Aarón ayko sacerdotehal.)

—Mamin, ¿chitom jakojanh howal yinh ebꞌnaj jet Israelanh, ebꞌnaj Benjamín tiꞌ hunelxa, mato chikobꞌejanh? xhi ebꞌnaj. Istaqꞌwi Komam Jahawil:

—Ahanhwetoj, yuto yet hekal chiwakojan ebꞌnaj yul heqꞌabꞌ, xhi Komam.

29 Hak tuꞌ yu isto haywanh ebꞌnaj Israel yebꞌa isbꞌa yinhla ishoyanil konhobꞌ Gabaa. 30 Wal hunteqꞌanxa ebꞌnaj soldado Israel ahto ebꞌnaj yu yaniko howal yinh ebꞌnaj Benjamín yinh yoxel. Iswatxꞌen isbꞌa ebꞌnaj yinh howal sata konhobꞌ Gabaa, hakaꞌtikꞌa yet bꞌabꞌelal yebꞌ yet iskayel. 31 Yelti ebꞌnaj Benjamín tuꞌ yinh ebꞌnaj; hak tuꞌ yu ishitzilo ebꞌnaj yinh iskonhobꞌ tuꞌ, ispotxꞌni ebꞌnaj 30 (lahonhebꞌ iskawinaj) ebꞌnaj Israel hakaꞌtikꞌa yet bꞌabꞌelal, yul bꞌeh chito bꞌey Bet-el yebꞌ bꞌeh chito bꞌey Gabaa, bꞌay machi anma chiꞌekꞌi. 32 Haꞌ ebꞌnaj Benjamín tuꞌ xin, halni hakaꞌ tiꞌ: «Makonhqꞌoji yinh ebꞌnaj hakaꞌ yet yalanhtokanoj,» xhi ebꞌnaj.

Wal ebꞌnaj Israel xin, yal ebꞌnaj hakaꞌ tiꞌ: «Hitzojonhweloj nahat yinh huneꞌ konhobꞌ tiꞌ masanta chonhapni istiꞌla bꞌeh,» xhi ebꞌnaj.

33 Kaw yinh anhe yako isbꞌa ebꞌnaj Israel yinh istxolal yu yaniko howal bꞌey konhobꞌ Baal-tamar. Yahpaxto hunteqꞌanxa ebꞌnaj Israel yebꞌa isbꞌa yinhla ishoyanil konhobꞌ Gabaa. 34 Lahonhebꞌ mil xin ebꞌnaj soldado kaw helan yinh howal xol ebꞌnaj soldado Israel aniko howal yinh konhobꞌ Gabaa tuꞌ, hak tuꞌ xin yu islahniko yip huneꞌ howal. Wal ebꞌnaj Benjamín hitzilo ebꞌnaj yinh iskonhobꞌ tuꞌ, mach istxum ebꞌnaj tato ayxako ebꞌnaj yul isqꞌabꞌ ebꞌnaj Israel. 35 Yaqꞌ Komam yip ebꞌnaj Israel isqꞌoji ebꞌnaj yinh ebꞌnaj Benjamín, ispotxꞌnikamo ebꞌnaj 25,100 ebꞌnaj soldado Benjamín iqꞌbꞌil yespada tuꞌ. 36 Hak tuꞌ xin yu yilniti ebꞌnaj yikꞌal yaꞌ Benjamín tuꞌ tato xaꞌaykꞌay ebꞌnaj yul isqꞌabꞌ ebꞌnaj Israel.

Wal ebꞌnaj Israel tuꞌ, kaw nahat elkano ebꞌnaj tet yikꞌal yaꞌ Benjamín, yuto chikawxi iskꞌul ebꞌnaj yinh ebꞌnaj ebꞌabꞌil isbꞌa yu yaniko howal yinh konhobꞌ Gabaa. 37 Yelti lemna ebꞌnaj ebꞌabꞌil isbꞌa tuꞌ, yok ebꞌnaj yul konhobꞌ, ispotxꞌnikamo ebꞌnaj sunil anma ay yul konhobꞌ tuꞌ yu chꞌen espada. 38 Ebꞌnaj yebꞌa isbꞌa tuꞌ, halbꞌilxa yu ebꞌnaj tet hunteqꞌanxa ebꞌnaj Israel ta hayet chiqꞌoji ebꞌnaj yinh konhobꞌ tuꞌ, kat yaniko ebꞌnaj qꞌaꞌ yinh, kat yah topton isnhubꞌal, hak tuꞌ xin chu yohtanhenilo ebꞌnaj tuꞌ tato xaqꞌoji ebꞌnaj yinh konhobꞌ tuꞌ.

39 Wal ebꞌnaj Israel lanhan yel tet ebꞌnaj Benjamín, hayet yilni ebꞌnaj nhubꞌ tuꞌ, ismeltzoti ebꞌnaj yinh ebꞌnaj Benjamín.

Wal ebꞌnaj Benjamín tuꞌ, yalanhto tiꞌ ispotxꞌkamo ebꞌnaj 30 (lahonhebꞌ iskawinaj) ebꞌnaj soldado Israel, ham yalni ebꞌnaj tato xaꞌaykꞌay ebꞌnaj Israel yu ebꞌnaj, hakaꞌtikꞌa yet bꞌabꞌelal. 40 Kaw xin chiꞌah topton nhubꞌ yinh konhobꞌ tuꞌ, yuxin hayet ishakxito ebꞌnaj Benjamín yintaj, yilnito ebꞌnaj isnhubꞌal iskonhobꞌ, kaw nahat chitokano satkanh. 41 Yaniko ebꞌnaj Israel tuꞌ howal yinh ebꞌnaj Benjamín, isxiwkanh ebꞌnaj Benjamín yuto lanhan yaykꞌay isyaꞌtajil yibꞌanh. 42 Yelkanh ebꞌnaj tet ebꞌnaj Israel tuꞌ, isto ebꞌnaj yul bꞌeh chito bꞌey desierto, yajaꞌ matxa yu yelkanh ebꞌnaj yuto ebꞌnaj soldado Israel okto yul konhobꞌ tuꞌ meltzo ebꞌnaj, ismajni ebꞌnaj isbꞌeh ebꞌnaj, istzabꞌlaxayo ebꞌnaj, ispotxꞌlaxkamo ebꞌnaj yu espada.

43 Hak tuꞌ yu iskankano ebꞌnaj Benjamín tuꞌ xolbꞌal ebꞌnaj Israel, istzumbꞌen ebꞌnaj ebꞌnaj, yichiko isqꞌoji ebꞌnaj Israel yinh ebꞌnaj Benjamín bꞌey konhobꞌ Menúha masanta bꞌey Gabaa yinh yetkꞌulal bꞌay chiꞌahilo tzꞌayik. 44 Ispotxꞌnikamo ebꞌnaj Israel 18 mil ebꞌnaj soldado Benjamín tuꞌ. 45 Wal hunteqꞌanxa ebꞌnaj Benjamín tuꞌ, meltzoto ebꞌnaj, yelkanh ebꞌnaj bꞌey txꞌotxꞌ desierto yinh yetkꞌulal chꞌen niman chꞌen chiyij Rimón, howebꞌ mil ebꞌnaj tuꞌ kam yulaj bꞌeh; yokpaxo tzujno ebꞌnaj Israel yinta ebꞌnaj masanta bꞌey konhobꞌ Gidom, ispotxꞌnipaxo ebꞌnaj Israel tuꞌ kabꞌ mil ebꞌnaj Benjamín. 46 Yinh huneꞌ tzꞌayik tuꞌ 25 mil ebꞌnaj soldado Benjamín kami; sunil ebꞌnaj tanhilo tuꞌ kaw helan ebꞌnaj yinh howal. 47 Yajaꞌ 600 ebꞌnaj Benjamín elkanh, isto bꞌey txꞌotxꞌ desierto; kanhebꞌ xin ixahaw ehayo ebꞌnaj yul chꞌen niman chꞌen chiyij Rimón tuꞌ.

48 Ismeltzo ebꞌnaj Israel tuꞌ, yanipaxiko ebꞌnaj howal yinh hunteqꞌanxa ebꞌnaj Benjamín, ispotxꞌni ebꞌnaj anma yul hunun konhobꞌ yu chꞌen espada, ispotxꞌnipaxkamo ebꞌnaj no noqꞌ, yebꞌ sunil tzet ilcha yu ebꞌnaj; isnhusnikanto ebꞌnaj sunil iskonhobꞌ ebꞌnaj Benjamín.