2 Iskutxbꞌaniko isbꞌa sunil konhobꞌ Israel tuꞌ bꞌey Bet-el sata Komam Dios masanta yet aqꞌbꞌalil, yok ebꞌnaj oqꞌoj, chalni ebꞌnaj:

3 «Mam Jahawil, koDiosalanh, hanhonh Israel honhtiꞌanh, ¿tzet yinh yuxin hak tiꞌ chijaqꞌlehanh? ¿tzet yinh yuxin chikꞌayilo huneꞌ majan ebꞌnaj jet Israel tiꞌanh koxolanh?» xhi ebꞌnaj.

4 Haxa yet hunxa tzꞌayik, kaw sahabꞌ ah ebꞌnaj Israel, islatzꞌbꞌakanh ebꞌnaj chꞌen chꞌen mexhahil, isnhusni ebꞌnaj isxahanbꞌal tet Komam yibꞌanh chꞌen, yaqꞌni ebꞌnaj yebꞌalqꞌabꞌe yet aqꞌankꞌulal.

5 Isqꞌambꞌen ebꞌnaj tet hunun hakaꞌ tiꞌ: «¿Mak hunu majan ebꞌnaj jet Israelal mach iskutxbꞌa isbꞌa koxol sata Komam bꞌey Mizpa?» xhi ebꞌnaj. Yuto halbꞌilxa yu ebꞌnaj yaqꞌni bꞌinaho ebꞌnaj isbꞌi Komam Dios tato mak mach chiskutxbꞌa isbꞌa bꞌey tuꞌ, chiyaqꞌkamo ebꞌnaj.

6 Kaw xin bꞌiskꞌulal ye ebꞌnaj Israel tuꞌ yinh tzet yu xol ebꞌyaꞌ Benjamín, yuto yuxhtato isbꞌa ebꞌnaj. Yalni ebꞌnaj Israel hakaꞌ tiꞌ: «Yinh huneꞌ tzꞌayik tiꞌ, makꞌaytzelaxilo huneꞌ majan jet Israelal koxol, 7 ¿Bꞌaymi chijiqꞌati yixal ebꞌnaj Benjamín matokankano tiꞌ, yuto hanhonh xajal yabꞌeꞌ Komam Jahawil yet yalanhtokano tato machi jaqꞌ kokutzꞌin yiqꞌaꞌ ebꞌnaj?» xhi ebꞌnaj.

8 Yalnipaxo ebꞌnaj: «¿Aymi ebꞌnaj Israel mach iskutxbꞌako isbꞌa sata Komam Dios bꞌey Mizpa?» xhi ebꞌnaj. Isnahniti ebꞌnaj tato ebꞌnaj ay bꞌey Jabes-galaad mach apni ebꞌnaj bꞌay iskutxbꞌa isbꞌa ebꞌnaj tuꞌ. 9 Yuto yet yahwi isbꞌi sunil ebꞌnaj kutxiko tuꞌ, machi hunu ebꞌnaj Jabes-galaad taqꞌwi.

10 Hayet yabꞌenilo ebꞌnaj tuꞌ, ischejnito ebꞌnaj 12 (kabꞌlahonhebꞌ) mil ebꞌnaj soldado kaw helan, yalni ebꞌnaj tet ebꞌnaj tato chispotxꞌkamo ebꞌnaj ebꞌnaj ay bꞌey Jabes-galaad, yebꞌ nixhte unin yebꞌ ebꞌix ix ayxa yichamil. 11 Haꞌ huneꞌ wal heyuteni, chepotxꞌkamo sunil ebꞌnaj winaj, yebꞌ xin sunil ebꞌix ix xayiqꞌle winaj, xhi ebꞌnaj.

12 Haꞌ xol ebꞌnaj Jabes-galaad tuꞌ, ilcha 400 ebꞌix qꞌopo maxhto winaj chiyiqꞌle, yiniti ebꞌnaj ebꞌix bꞌey konhobꞌ Silo, ayko yul ismajul txꞌotxꞌ Canaán. 13 Yanito ebꞌnaj Israel ischejabꞌ tet ebꞌnaj Benjamín ay bꞌey chꞌen niman chꞌen chiyij Rimón, yu chiꞌawtelax ebꞌnaj tato ayxa aqꞌankꞌulal. 14 Hak tuꞌ xin yu ismeltzo ebꞌnaj Benjamín tuꞌ, yaqꞌni ebꞌnaj ebꞌix qꞌopo yixalo ebꞌnaj, yajaꞌ xin mach tzꞌajano ebꞌix yinh ebꞌnaj.

15 Kaw xin tzꞌay iskꞌul ebꞌnaj Israel tuꞌ yinh ebꞌnaj Benjamín, yuto etza iskꞌaytzelo Komam huneꞌ majan ebꞌnaj Israel tuꞌ xol yet Israelal. 16 Yalni ebꞌnaj yahawil xol ebꞌnaj Israel tuꞌ hakaꞌ tiꞌ: «¿Bꞌaytuꞌwal xin chonhto jiqꞌaꞌti hunteqꞌanxa ebꞌix ix chiꞌok yixalo ebꞌnaj Benjamín matokankano tiꞌ, yuto kamilo ebꞌix ix yul iskonhobꞌ ebꞌnaj?» xhi ebꞌnaj. 17 Yalnipaxo ebꞌnaj: «Haꞌ ebꞌnaj winaj matokankano tuꞌ, haꞌojabꞌ yinh ebꞌnaj chitit yikꞌal yaꞌ Benjamín, hak tuꞌ xin mach chitanhkanilo huneꞌ majan jet Israelal tuꞌ koxol. 18 Yajaꞌ hanhonh tiꞌ, mach chu jaqꞌni kokutzꞌin yiqꞌaꞌ ebꞌnaj, yuto halbꞌilxa ju: “Kꞌanchꞌan ebꞌnaj chꞌanilo yixal ebꞌnaj Benjamín, yuto chitit istzꞌaktiꞌ Komam yibꞌanh,” konhchi. 19 Wal xin ay huneꞌ qꞌinh chiꞌekꞌtzelax tet Komam hunun habꞌil bꞌey konhobꞌ Silo, ayko yinh yetkꞌulal norte yinh Bet-el, yebꞌ ayko yinh yetkꞌulal bꞌay chiꞌahilo tzꞌayik yinh bꞌeh chito bꞌey Bet-el chiꞌapni bꞌey Siquem, yebꞌ ayko yinh yetkꞌulal sur yinh konhobꞌ Lebona,» xhi ebꞌnaj.

20 Yanito ebꞌnaj yahawil ebꞌnaj Israel tuꞌ tzotiꞌ tet ebꞌnaj Benjamín hakaꞌ tiꞌ:

«Asiꞌwe bꞌey konhobꞌ Silo, kat heyebꞌan hebꞌa xol teꞌ uva iskawilal konhobꞌ tuꞌ, 21 kaw xin helan cheyute hebꞌa. Hayet cheyilni yelto ebꞌix qꞌopo ah Silo kanhalwo yinh hunta bꞌulan, kat heyelti bꞌay ebꞌabꞌil hebꞌa tuꞌ, kat heyelqꞌanto hunun ebꞌix heyixalo hunun hex, kat heto sat hetxꞌotxꞌ bꞌay ay hex. 22 Yajaꞌ ta chihul ismam ebꞌix maka isnoh ebꞌix isqꞌanaꞌ jetanh, chijalanh tet ebꞌnaj hakaꞌ tiꞌ: “Kaw aqꞌwe nimankꞌulal yinh ebꞌnaj, yuto ebꞌix ix jitijanh yinh howal bꞌey Jabes-galaad, mach tzꞌajano eliko ebꞌix yinh ebꞌnaj; yebꞌpaxo xin, maxhtaj hex heyako ebꞌix yixalo ebꞌnaj, yuxin machi hemul yinh,” konhchinhetikꞌahanh tet ebꞌnaj,» xhi ebꞌnaj.

23 Kaw xin ischah iswiꞌ ebꞌnaj Benjamín yinh tzet yal ebꞌnaj, yok ebꞌnaj yinito hunun ebꞌix yixaloj xol ebꞌix elto kanhalwo tuꞌ. Lahwi tuꞌ, ismeltzo ebꞌnaj sat istxꞌotxꞌ, yichiko ebꞌnaj iswatxꞌenkanh iskonhobꞌ hunelxa, yehayo ebꞌnaj yul iskonhobꞌ tuꞌ.

24 Hakpax tuꞌ ebꞌnaj Israel, meltzo ebꞌnaj sat istxꞌotxꞌ ismam icham bꞌaytikꞌa aya sat hunun ismajul.

25 Yinh huneꞌ tiempo tuꞌ, machi mak chiꞌijbꞌan ebꞌnaj Israel, yuxin haꞌ tzet chal iskꞌul ebꞌnaj, haꞌ chilaiswatxꞌe.