LIBRO 5
(Salmos 107–150)
Haꞌ Komam Dios chikolwa jinh yinh ej isyaꞌtajil
107
Jaqꞌaꞌwe yuchꞌandiosal tet Komam Dios yuto kaw kꞌulkanoj,chitzꞌay iskꞌul jinh yinh sunilbꞌal ej tiempo.a
2 Hex kexiskonhobꞌ Komam,
halwekꞌoj ta xakexiskolilo yul isqꞌabꞌ ebꞌnaj aniko howal teyinh.
3 Yuto makexiskutxbꞌati Komam yulajla konhobꞌ ayko yetkꞌulal bꞌay chiꞌahilo tzꞌayik,
yebꞌ bꞌay chito tzꞌayik, yebꞌ yinh norte, yebꞌ yinh sur.
4 Kꞌaynajextikꞌato sat txꞌotxꞌ desierto bꞌay machi bꞌeh,
yuxin mach ilcha isbꞌehal hunu konhobꞌ heyu bꞌay chexehi.
5 Kaw heyaqꞌle wahil yebꞌ tajintiꞌal,
kaw lanhan yel heyanma.
6 Yajaꞌ yet ayexiko yinh isyaꞌtajil tuꞌ yah heyaw tet Komam.
Kexiskolnilo Komam yul isqꞌabꞌ isyaꞌtajil tuꞌ.
7 Kexyaniko yul huneꞌ bꞌeh kaw kꞌul,
kexyinito yul huneꞌ konhobꞌ, heyehayo bꞌey tuꞌ.
8 ¡Bꞌitnhewe Komam yu iskꞌulchꞌanil iskꞌul
yebꞌ yu iskꞌulal chiswatxꞌe yinh anma!
9 Haꞌ Komam chiꞌinilo istajintiꞌal makta chitaj istiꞌ,
kat yaqꞌni noho iskꞌul makta chinhochahi.
10 Ay xin ebꞌnaj ayko xol qꞌejholo yul isbꞌehal kamikal,
ayko preso yebꞌ ayko chꞌen cadena yinh,
chiyaqꞌlen isyaꞌtajil.
11 Hak tuꞌ yaqꞌle ebꞌnaj yuto mach isyije ischejbꞌanil Komam.
Mach yabꞌeto ebꞌnaj tzet yal Komam Dios,
Komam kaw aykano yelapnoj.
12 Yalaxiko munil kaw yaꞌta yibꞌanh ebꞌnaj yu Komam.
Aykꞌay ebꞌnaj, machi xin hunu mak kolwa yinh ebꞌnaj.
13 Yajaꞌ hayet ayko ebꞌnaj yinh isyaꞌtajil tuꞌ,
yah yaw ebꞌnaj tet Komam.
Iskolnilo Komam ebꞌnaj yul isqꞌabꞌ isyaꞌtajil.
14 Yinilo Komam ebꞌnaj xol niman qꞌejholo,
yilaxilo chꞌen cadena yinh ebꞌnaj.
15 ¡Aqꞌwe yuchꞌandiosal tet Komam yu iskꞌulchꞌanil iskꞌul,
yebꞌ yu iskꞌulal chiswatxꞌe yinh anma!
16 Hunteqꞌan chꞌen pulta nabꞌa bronce isxitto Komam.
Hunteqꞌan istel pulta hierro kokꞌ ayiko yu Komam.
17 Yu istxꞌojal ebꞌnaj yebꞌ yu ismul,
yuxin ay yabꞌil yibꞌanh ebꞌnaj yebꞌ isyaꞌtajil.
18 Matxatikꞌa isje iskꞌul ebꞌnaj waꞌoj,
kaw ayxatikꞌako ebꞌnaj yul isqꞌabꞌ kamikal.
19 Yajaꞌ hayet ayko ebꞌnaj yinh ej isyaꞌtajil tuꞌ
yah yaw ebꞌnaj tet Komam.
Iskolnilo Komam ebꞌnaj yul isqꞌabꞌ isyaꞌtajil.
20 Istzotel Komam yanhcha ebꞌnaj,
iskolni Komam ebꞌnaj yul isqꞌabꞌ kamikal.
21 ¡Aqꞌwe yuchꞌandiosal tet Komam yu iskꞌulchꞌanil iskꞌul,
yebꞌ yu iskꞌulal chiswatxꞌe yinh anma!
22 ¡Haltewe xahanbꞌal tet Komam,
haꞌ ton hebꞌitnhen isbꞌi,
kat heyalnikꞌo tzetaj iswatxꞌe Komam yinh tzalahilal!
23 Haꞌ hunteqꞌan ebꞌnaj txonhwom chiꞌekꞌ yibꞌanh haꞌ mar,
to ebꞌnaj yul isbarco yibꞌanh haꞌ.
24 Haꞌ yibꞌanh haꞌ mar tuꞌ
yil ebꞌnaj tzetaj watxꞌebꞌil yu Komam
yebꞌ ej kꞌaybꞌalkꞌule yibꞌanh haꞌ.
25 Hayet istzotel Komam istit huneꞌ niman jaqꞌeqꞌ nhabꞌ yibꞌanh haꞌ.
Kaw xin nahat chiꞌah haꞌ yu jaqꞌeqꞌ tuꞌ.
26 Hayet ayko ebꞌnaj yul teꞌ barco,
kaw nahat chiꞌah teꞌ satkanh kat istopaxo teꞌ yich haꞌ yu jaqꞌeqꞌ tuꞌ.
Isxiwkanh ebꞌnaj tet jaqꞌeqꞌ.
27 Isluylunkanh ebꞌnaj hakaꞌ ukꞌum,
haꞌ ishelanil ebꞌnaj tuꞌ matzet yaliloj.
28 Yajaꞌ hayet ayko ebꞌnaj yinh isyaꞌtajil tuꞌ
yah yaw ebꞌnaj tet Komam,
iskolni Komam ebꞌnaj yul isqꞌabꞌ isyaꞌtajil.
29 Ismeltzoniko Komam huneꞌ niman jaqꞌeqꞌ nhabꞌ tuꞌ
yinh wexhnhabꞌ istukayo haꞌ mar tuꞌ.
30 Hayet yilni ebꞌnaj ispaxtzꞌinhnahi istzalakanh ebꞌnaj,
yapni ebꞌnaj bꞌay aytikꞌako yinh isnabꞌal yapni yu iskolwal Komam.
31 ¡Aqꞌwe yuchꞌandiosal tet Komam Dios yu iskꞌulchꞌanil iskꞌul,
yebꞌ yu issaqꞌalil tzet chiswatxꞌe yinh anma!
32 ¡Aweko ismay Komam yet chiskutxbꞌaniko isbꞌa konhobꞌ.
Hakpax tuꞌ yet chiskutxbꞌaniko isbꞌa ebꞌnaj ichamta winaj yul konhobꞌ,
yalabꞌ ebꞌnaj kꞌul-la tzotiꞌ yinh Komam!
33 Ta chal iskꞌul Komam chiyaqꞌ tajolo haꞌ nime haꞌ yebꞌ isnuqꞌ ha haꞌ,
kat ismeltzoko hakaꞌ txꞌotxꞌ tajin txꞌotxꞌ.
34 Chismeltzoko Komam txꞌo txꞌotxꞌ kaw kꞌul yinh txꞌotxꞌ matzet chaqꞌa,
yu istxꞌojal anma ayayo sat txꞌotxꞌ.
35 Haxa txꞌotxꞌ desierto, haꞌlaxa chiꞌeliko txꞌotxꞌ;
haxa txꞌotxꞌ tajin txꞌotxꞌ, chiꞌahilo isnuqꞌ ha haꞌ sat txꞌotxꞌ yu Komam.b
36 Kat yehayo anma sat txꞌotxꞌ yu Komam, anma chinhochahi.
Kat iswatxꞌen anma iskonhobꞌ.
37 Chistzꞌunni ebꞌnaj istzꞌunubꞌ sat txꞌotxꞌ, chistzꞌunni teꞌ uva.
Kaw xin niman sat istzꞌunubꞌ ebꞌnaj tuꞌ chaqꞌ txꞌotxꞌ.
38 Chayo Komam isyaxil yibꞌanh ebꞌnaj
kat ispohchakanh ebꞌnaj.
Kat ispohchapaxokanh isnoqꞌ ebꞌnaj.
39 Haxa yet chikam ebꞌnaj yu isyaꞌtajil yebꞌ yu yabꞌil yebꞌ yu il
kat ispax isbꞌisil ebꞌnaj.
40 Haꞌ ebꞌnaj nime winaj chiꞌanayo isyaꞌtajil yibꞌanh anma,
chisyah Komam Dios ebꞌnaj,
kat iskꞌaykanto ebꞌnaj sat txꞌotxꞌ desierto, bꞌay machi bꞌeh chiꞌekꞌi.c
41 Haꞌ anma matzet ayko yipo iskꞌul chilo Komam isbꞌiskꞌulal,
kat yaqꞌni pohchahokanh Komam yuninal, hakaꞌ ispohcha noꞌ meꞌ.
42 Hayet chilni anma kꞌul isbꞌeybꞌal huneꞌ tuꞌ kat istzalahi.
Wal ebꞌnaj chiwatxꞌen istxꞌojal xin matxa tzet chal ebꞌnaj.
43 Haꞌ mak ay isnabꞌal isnabꞌabꞌilo hunteqꞌan tiꞌ
kat istxumniloj tato kaw kꞌulkano iskꞌul Komam Dios.