Chiqꞌanlax iskolwal Komam Dios
Salmo tiꞌ tzꞌibꞌnhebꞌilkano yu yaꞌ rey David
108
Mamin, hach inDiosalan kaw chiyoche wanmahan kach isbꞌitnheꞌ.Chachinbꞌitnhehan yebꞌ salmo yinh kaw tzalahilal.
2 ¡Ilo hewayanh hex arpa yebꞌ hex salterio.
Chꞌelpaxo inwayanhan yet chisajbꞌilo kat inbꞌitnihan!
3 Mam Wahawil, chachinbꞌitnhehan,
chiwakojan bꞌit tawet xolaj nixhte konhobꞌ yebꞌ nimeta konhobꞌ.
4 Yuto kaw hantanhekano iskꞌulal hakꞌul,
chitapalkꞌon yibꞌanh satkanh,
kat yahapno isyelal tzet chawala bꞌey satkanh.
5 Mamin, hach tiꞌ ayach yibꞌanhahto satkanh.
Sunil yul sat yibꞌanhqꞌinal tiꞌ ayayo isqꞌaqꞌal hawip.
6 Mamin pajtze tzet chikoqꞌananh tawet.
Kólonhilojanh yu hawip,
yunhe kokolchakanojanh hanhonh xahan ayonhanh hawu tiꞌ.
7 Hata yul Yatut Komam Dios yal hakaꞌ tiꞌ:
«¡Kaw yinh tzalahilal chinpohkanhan txꞌotxꞌ Siquem
kat inpohnipaxkanhan txꞌotxꞌ akꞌal Sucot!
8 Txꞌotxꞌ Galaad yebꞌ txꞌotxꞌ Manasés wetan ye txꞌotxꞌ.
Haxa txꞌotxꞌ Efraín,
hakaꞌ chꞌen kꞌowiꞌe yet howal chiꞌahto yinh inwiꞌan.
Haxa txꞌotxꞌ Judá qꞌojoch chiꞌokniko yu ebꞌnaj alkal,
hak tuꞌ ye ej txꞌotxꞌ yul inqꞌabꞌan.
9 Haxa txꞌotxꞌ Moab lahan hakaꞌ pechꞌan bꞌay chintxꞌah inqꞌabꞌan.
Haxa yibꞌanh txꞌotxꞌ Edom chiwayojan inxanhabꞌan,»
xhi Komam.
10 ¿Maktaxka chu kinyinitojan bꞌey huneꞌ konhobꞌ hoyaniko ismurayahil?
¿Maktaxka chu kinyijbꞌantojan bꞌey txꞌotxꞌ Edom?
11 Mamin, hach koDiosalanh, xakonhhabꞌejkanojanh.
Matxa ayachoko jetbꞌihojanh yet chonhtohanh yinh howal.
12 Mamin, kolonhanh tet ebꞌnaj ayko ishowal jinhanh,
yuto haꞌ iskolwal ebꞌnaj winaj matzet chiꞌoknikoj.
13 Ta chikolwa Komam Dios jinh chu kowatxꞌen nimeta kꞌaybꞌalkꞌule.
¡Haꞌ Komam chixanhnikanayo ebꞌnaj ayko ishowal jinh!