Txah chiqꞌanni iskolwal Komam Dios, istennilo ebꞌnaj chichiwa iskꞌul
Salmo Mictam tiꞌ tzꞌibꞌnhebꞌilkano yu yaꞌ rey David tet naj yahaw yinh isnuqꞌal bꞌit. Huneꞌ Salmo tiꞌ chitzotel yinh yet ok howal yinh naj Aram-Naharaim yebꞌ yinh naj Aram bꞌey Soba, yapni naj Joab, istanhtzenilo naj kabꞌlahonhebꞌ mil ebꞌnaj Edom bꞌey yul huneꞌ akꞌal chihal-lax Atzꞌamil.
60
Mamin, hach koDiosalanh, xakonhhabꞌejkanojanh yu hahowal,konhhawaqꞌni ekꞌoyaꞌanh.
Wal tinanh Mamin, ¡meltzanh kokꞌatanhanh, aqꞌ jipanh hunelxa!
2 Habꞌile txꞌo txꞌotxꞌ, ishatkanh txꞌotxꞌ.
¡Haꞌ tinanh xin lanhan isbꞌuchmoto txꞌotxꞌ,
yuxin bꞌuj ishatilal txꞌotxꞌ!
3 Kaw niman isyaꞌtajil hawaqꞌ jilaꞌanh, hanhonh konhhakonhobꞌ honhtiꞌanh.
Hakaꞌto hawaqꞌ vino kaw how jukꞌuꞌanh,
yah teꞌ yul kowiꞌanh.
4 Hawaqꞌ yechel bandera tet mak ay yelapnoj yul hasat yunhe mach chiꞌaykꞌay yinh ej isyaꞌtajil.
5 ¡Mamin, pajtze tzet chikoqꞌananh tawet!
Kólonhilojanh yu hawip, yunhe kokolchakanojanh hanhonh xahan ayonhanh hawu tiꞌ.
6 Hata yul Yatut Komam Dios yal hakaꞌ tiꞌ:
«Kaw yinh tzalahilal chinpohkanhan txꞌotxꞌ Siquem,
kat inpohnipaxkanhan txꞌotxꞌ akꞌal Sucot.
7 Txꞌotxꞌ Galaad yebꞌ txꞌotxꞌ Manasés wetan ye txꞌotxꞌ.
Haxa txꞌotxꞌ Efraín hakaꞌ chꞌen kꞌowiꞌe yet howal chiꞌahto yinh inwiꞌan.
Haxa txꞌotxꞌ Judá, qꞌojoch chiꞌokniko yu ebꞌnaj alkal,
hak tuꞌ ye txꞌotxꞌ tuꞌ yul inqꞌabꞌan.
8 Haxa txꞌotxꞌ Moab lahan hakaꞌ hunu pechꞌan bꞌay chintxꞌah inqꞌabꞌan.
Haxa yibꞌanh txꞌotxꞌ Edom chiwayojan inxanhabꞌan.
Kaw chꞌel wawan yu tzalahilal,
yuto chinqꞌojihan yinh txꞌotxꞌ Filistea,» xhi Komam.
9 ¿Mak chininitojan bꞌey konhobꞌ hoyaniko kꞌubꞌ yinh?
¿Mak chu kinyijbꞌanikꞌojan masanta bꞌey txꞌotxꞌ Edom?
10 Mamin, hach koDiosalanh, xakonhhabꞌejkanojanh.
Matxa ayachoko jetbꞌihojanh yet chonhtohanh yinh howal.
11 Mamin, kolonhanh tet ebꞌnaj ayko ishowal jinhanh,
yuto haꞌ iskolwal ebꞌnaj winaj matzet chiꞌoknikoj.
12 Ta chikolwa Komam Dios jinh, chu kowatxꞌen nimeta kꞌaybꞌalkꞌule.
¡Haꞌ Komam chixanhnikanayo ebꞌnaj ayko ishowal jinh!