Txah chiqꞌanni ta chiskolilo Komam Dios tet anma ayko ishowal yinh
Salmo tzꞌibꞌnhebꞌilkano yu yaꞌ rey David tet naj yahaw isnuqꞌal bꞌit, chitzotel yinh yet istzumbꞌelaxikꞌo yaꞌ David yok ebꞌnaj istanheꞌ teꞌ nha yu ismaqꞌlaxkamo yaꞌ
59
Mamin, hach inDiosalan, kolinan yul isqꞌabꞌ ebꞌnaj ayko ishowal winhan,kolinilojan tet ebꞌnaj chiꞌahwano winhan.
2 Kolinan tet ebꞌnaj hanhkꞌanhetikꞌa istxꞌojal chiswatxꞌe,
kolinan tet ebꞌnaj potxꞌom anma.
3 Yuto haꞌ ebꞌnaj chiꞌetanto wanmahan.
Haꞌ ebꞌnaj ay yip chiskutxbꞌa isbꞌa winhan,
yajaꞌ Mamin, mach inmulan, machipaxo intxꞌojalan.
4 Mamin, hanintiꞌan, machi inmulan,
yajaꞌ chul ebꞌnaj yinh anhe chiswatxꞌen isbꞌa ebꞌnaj yaniko howal winhan.
Ilo hawayanh, kat hawul kolwal winhan,
ilkꞌanabꞌ tzet chiwaqꞌlehan.
5 Mam Wahawil, hach tiꞌ kaw aykano hawip,
koDiosalanh hanhonh Israelonh tiꞌanh hawehi.
Ilo hawayanh, kat hawanayo hahowal yibꞌanh ebꞌnaj mach chachohtanhen tiꞌ.
Machojabꞌ chitzꞌay hakꞌul yinh hunteqꞌan ebꞌnaj txꞌoj chimeltzoko winhan.
6 Chimeltzo ebꞌnaj yinh qꞌejbꞌiyal kat yel yaw ebꞌnaj hakaꞌ metx txꞌiꞌ,
kat yekꞌ hoyla ebꞌnaj yinhla konhobꞌ.
7 Tzotiꞌ txꞌoj chꞌelti xol hujuy yul istiꞌ ebꞌnaj yet chꞌekꞌi.
Lahan yaqꞌ ebꞌnaj hakaꞌ chꞌen espada,
chal ebꞌnaj hakaꞌ tiꞌ:
«¿Maktaxka chiꞌabꞌen tzet chijalanh?» xhi ebꞌnaj.
8 Yaj wal hach tiꞌ Mamin, chachtzebꞌi yinh ebꞌnaj,
kat habꞌuchni sunil ebꞌnaj mach kach ohtanhen tuꞌ.
9 Yu yip ebꞌnaj chichiwa iskꞌul winhan,
yuxin chikawxi inkꞌulan tawinh yuto hach chinhatanhehan, Mamin.
10 Komam kaw kꞌulchꞌan iskꞌul chihul kolwal winhan,
kat yinilo istxꞌixobꞌal ebꞌnaj ayko ishowal winhan yinh insatan.
11 Yajaꞌ mach chamaqꞌkamo ebꞌnaj, haxinwal mach chachnahulnhelaxtoj yu inkonhobꞌ,
wal xin pujnahojabꞌkanto ebꞌnaj yu hawip kat hawinilo ispixan ebꞌnaj.
Mam Wahawil, hach tiꞌ ayachiko wenhelojan.a
12 Chako ismul ebꞌnaj yinh tzet chala,
yu istxꞌojal chꞌelti yul istiꞌ.
Haꞌojabꞌ isloloꞌal ebꞌnaj yebꞌ isleqꞌtiꞌal chakoj, haꞌ chꞌaqꞌni aykꞌayoj.
13 ¡Mamin, tanhtzelo ebꞌnaj yu sunil hahowal, tanhtzekanilo ebꞌnaj, matxahojabꞌ chiꞌehikꞌo ebꞌnaj yul sat yibꞌanhqꞌinal tiꞌ!
¡Hak tuꞌ chu yohtanhenilo anma tato hach Yahaw hach yinh yuninal yuninal yaꞌ Jacob,
yebꞌ Yahaw yul sunil sat yibꞌanhqꞌinal tiꞌ!
14 Meltzohojabꞌ ebꞌnaj yinh qꞌejbꞌiyalil,
kat yel yaw ebꞌnaj hakaꞌ metx txꞌiꞌ, kat yekꞌ hoyla ebꞌnaj yinhla konhobꞌ.
15 Tonhehojabꞌnhetikꞌa chꞌekꞌ sayla ebꞌnaj yinh tzet chislo.
Haxa yet mach chinoh iskꞌul ebꞌnaj xin,
qꞌajwojabꞌ ebꞌnaj sunilbꞌal aqꞌbꞌal yu wahil.
16 Wal haninan Mamin, chachinbꞌitnhehan hunun sakꞌayal,
kat walnikꞌojan yinh kaw ip iskꞌulchꞌanil hakꞌul yebꞌ hawip.
Yuto hach inkolomalan, tawinh chiꞌilcha kolbꞌanile yinh istzꞌayikal isyaꞌtajil.
17 Mamin, hach inDiosalan chinokan kach inbꞌitnhehan,
yuto hach chinhakolan yebꞌ chinhawilan.
¡Hach tiꞌ Dios hach, kaw xahan ay hinan hawu!