Txah chiqꞌanni tet Komam Dios isyaꞌtajil yibꞌanh ebꞌnaj txꞌoj
Salmo tzꞌibꞌnhebꞌilkano yu yaꞌ rey David tet naj yahawil yeko yinh isnuqꞌal bꞌit
58
Hex yahaw konhobꞌ hex tiꞌ, ¿Kaw yinhmi istoholal chexekꞌi?¿Kaw yelmi cheyala yet cheyilni yinh tzet chiꞌeliko heyet anmahil?a
2 Wal xin machoj, maxhtaj iskꞌulal ay yul heyanma.
Hex kaw hex cheyiti howal yulajla konhobꞌ.
3 Ebꞌnaj txꞌoj, txꞌojtikꞌa ebꞌnaj yet ijbꞌiliko ebꞌnaj yu ismiꞌ.
Hakpax tuꞌ ebꞌnaj leqꞌtiꞌ yet maxhto chipitzkꞌa ebꞌnaj, leqꞌtiꞌxatikꞌa ebꞌnaj.
4 Lahan ebꞌnaj hakaꞌ noꞌ labꞌa kaw how yal istiꞌ.
Lahan ebꞌnaj hakaꞌ noꞌ icham, hakaꞌtanhe mach chabꞌe.
5 Yet chaniko naj nawal isson noꞌ,
waxanhka kaw helan naj yaniko son tuꞌ mach chabꞌe noꞌ.
6 Mamin, hach inDiosalan, maqꞌilti yeh hunteqꞌan ebꞌnaj tuꞌ.
Mam Wahawil, maqꞌilti istxꞌabꞌal hunteqꞌan ebꞌnaj hakaꞌ noꞌ bꞌalam.
7 Kꞌayojabꞌkanh ebꞌnaj hakaꞌ ha haꞌ chitixhlaxtoj.
Tanhojabꞌilo ebꞌnaj hakaꞌ chu istajilo teꞌ telaj ay istiꞌla bꞌeh.
8 Kꞌayojabꞌkanh ebꞌnaj hakaꞌ chu yulito noꞌ mikꞌin.
Tanhojabꞌilo ebꞌnaj hakaꞌ chu nixhte unin kamomxa yet chipitzkꞌahi machi yil yoj tzꞌayik.
9 Yet maxhto chabꞌe txꞌotxꞌ xi yah xaj qꞌaꞌ yinh teꞌ txꞌix ayko yalanh.
Hak tuꞌ chu hatzujbꞌaniko qꞌaꞌ yinh anhe yalanhto, maxhto chiyil ebꞌnaj.
Hakaꞌojabꞌ ishokꞌlaxkanh teꞌ yaxla txꞌix,
hakaꞌojabꞌ tuꞌ chawute ebꞌnaj yu hahowal.
10 Haꞌ mak kaw yijem yinh tzet chal Komam,
kaw chitzalahi yet chiyilni yiniti Komam ishowal yinh ebꞌnaj tuꞌ,
haꞌ yoj naj chistxꞌah yu ischikꞌil ebꞌnaj txꞌoj tuꞌ.
11 Kat yalni ebꞌnaj yijem tuꞌ hakaꞌ tiꞌ:
«Kaw ekꞌbꞌalkano kꞌul koyijen yinh tzet chal Komam Dios.
Haꞌ Komam Dios chiꞌilni yinh tzet chiꞌeliko sunil anma ay yul sat yibꞌanhqꞌinal tiꞌ,» xhi ebꞌnaj.