Txah chiqꞌanni ta chiskol Komam Dios yul isqꞌabꞌ ebꞌnaj chisaynikꞌoj
Salmo tiꞌ bꞌit tzꞌibꞌnhebꞌilkano yu yaꞌ rey David tet naj yahawil isnuqꞌal bꞌit, yet yelkanh yaꞌ, yebꞌan isbꞌa yulaj nhachꞌen
57
Mamin, hach inDiosalan, tzꞌayojabꞌ hakꞌul winhan,kaw oqꞌojabꞌ hakꞌul winhan yuto tawinh chikawxi wanmahan.
Ebꞌa intojan yalanh haxikꞌ yu hakolwa winhan masanto chꞌekꞌto istzꞌayikal isyaꞌtajil.
2 Haꞌ tet Komam Dios chiꞌahwawan, Komam kaw aykano yelapnoj,
haꞌ chikolwa winhan tet sunil tzet ye tuꞌ.
3 Chati Komam Dios iskꞌulchꞌanil wetan yul satkanh,
kat kiniskolnihan tet ebꞌnaj chintzumbꞌenikꞌojan yu ishowal.
Chati Komam iskꞌulchꞌanil iskꞌul yebꞌ isyelal.
4 Ayinayojan xol ebꞌnaj chichiwa iskꞌul winhan,
ebꞌnaj hakaꞌ noꞌ bꞌalam, ebꞌnaj tuꞌ hakaꞌtanhe chisxayeti xaj qꞌaꞌ.
Lahan yeh ebꞌnaj hakaꞌ chꞌen lanza yebꞌ teꞌ isbꞌaqꞌ litꞌ,
wal yaqꞌ ebꞌnaj lahan hakaꞌ chꞌen espada kaw xixiꞌ iswiꞌ.
5 ¡Mamin, hach tiꞌ ayach yibꞌanhahto satkanh!
¡Sunil yul sat yibꞌanhqꞌinal tiꞌ ayayo isqꞌaqꞌal hawip!
6 Ebꞌnaj ayko ishowal winhan, yayo ebꞌnaj latzꞌabꞌ yul inbꞌehan,
yunhe intzabꞌchahan, yebꞌ yu ispax yip wanmahan.
Iswatxꞌen ebꞌnaj holan yul inbꞌehan,
yajaꞌ xin haꞌtikꞌa ebꞌnaj aykꞌayto yul.
7 Mamin, hach inDiosalan kaw chiyoche wanmahan kach isbꞌitnheꞌ.
Chachinbꞌitnhehan yebꞌ salmo yinh kaw tzalahilal.
8 ¡Hach wanma, ilo hawayanh!
¡Iwepaxilo hewayanh hex arpa yebꞌ hex salterio!
¡Yet sahabꞌ sakꞌayal chinahwanojan, kat inbꞌitnihan!
9 Mamin, chachinbꞌitnhehan,
chiwakojan bꞌit tawet xolaj nixhte konhobꞌ yebꞌ nimeta konhobꞌ.
10 Yuto kaw hantanhekano iskꞌulal hakꞌul,
chitaahapno satkanh, kat yahpaxapno isyelal chawala bꞌey satkanh.
11 ¡Komam Dios, aykanh yibꞌanh sunil tzet ay yul satkanh!
¡Sunil yul sat yibꞌanhqꞌinal tiꞌ nohna yu isqꞌaqꞌal ismay Komam!