Txah yinh yet chijaniko janma yinh Komam Dios
Salmo tiꞌ bꞌit Mictam, tzꞌibꞌnhebꞌilkano yu yaꞌ rey David yet istzabꞌlaxayo yaꞌ yu ebꞌnaj filisteo bꞌey konhobꞌ Gat
56
Mamin, hach inDiosalan, kaw tzꞌayojabꞌ hakꞌul winhan yuto ay mak chintzumbꞌenikꞌojan,hununnhetikꞌa tzꞌayik yah wejnahi, kat yilwen isbꞌa winhan.
2 Hununnhetikꞌa tzꞌayik kinisxanhobꞌtanhenan ebꞌnaj ayko ishowal winhan.
Kaw txꞌiꞌal ebꞌnaj chiꞌaniko ishowal winhan,
kaw xin chiyikanh isbꞌa ebꞌnaj winhan.
3 Mamin, hayet chinxiwan, tawinh chikawxi inkꞌulan.
4 Yu yip Komam Dios chinbꞌitnhehan istzotiꞌ.
Yinhnhe Komam chikawxi inkꞌulan, mach chinxiwan.
¿Tzettaxka wal kinyutenan ebꞌnaj winaj?
5 Mamin, kaw yaꞌnhetikꞌa chilow istzotiꞌ ebꞌnaj winhan hunun tzꞌayik.
Hanhkꞌanhetikꞌa istxꞌojal chiyoche ebꞌnaj iswatxꞌe winhan.
6 Chilayebꞌa isbꞌa ebꞌnaj wetan,
kat yok ebꞌnaj yilno tzet chiwuhan, chechma ebꞌnaj waykꞌayan.
7 ¡Hach inDiosal, hunteqꞌan anma tuꞌ,
mach chiꞌekꞌto yet ischahni ispaj istxꞌojal chiswatxꞌe.
Ilo ispixan ej konhobꞌ yu hahowal!
8 Mamin, hawohtaj hantaxa el chinelan tet ebꞌnaj ayko ishowal winhan.
Hach hawohta yal insatan chꞌel yu woqꞌan,
sunil hunteqꞌan tuꞌ tzꞌunbꞌilayo hawu yul hawum.
9 Hayet chinqꞌannihan tawet ta chaxhkolwa winhan,
ebꞌnaj ayko ishowal winhan chimeltzo ebꞌnaj yintaj.
Wal hanintiꞌan kaw wohtajan tato hach ayachiko wetbꞌihojan, Mamin.
10 Chikawxi inkꞌulan yinh Komam Dios, chiwanikojan ismay Istzotiꞌ.
Chikawxi inkꞌulan yinh Komam Jahawil, chiwanikojan ismay Istzotiꞌ Komam.
11 Yinhnhe Komam Dios chikawxi inkꞌulan yuxin mach chinxiwan.
¿Tzettaxka wal kinyutehan anma?
12 Mamin, hach inDiosalan,
sunil tzet waltehan tawet chinyijehan yet chinbꞌitnhenan habꞌi.
13 Yuto hakolilo wanmahan yul isqꞌabꞌ kamikal.
Mach kinachah aykꞌayojan, yu wehikꞌojan yinh issajilqꞌinal yinh hasat bꞌay ay anma itzitz.