Txah chiqꞌanni istanhtzenilo Komam Dios ebꞌnaj ayko ishowal yinh yaꞌ David
Salmo tiꞌ, Masquil, tzꞌibꞌnhebꞌilkano yu yaꞌ rey David tet naj yahawil yinh isnuqꞌal bꞌit, yu huneꞌ Neginot
55
Mamin, hach inDiosalan, abꞌe intxahan,machojabꞌ chawebꞌato habꞌa yinh tzet chinqꞌanan tawet.
2 Hajbꞌa hatxikin yinh tzet chiwalan, kat hapajtzen wetan.
Chꞌeliko wawan tawinh yinh intxahan.
Kaw chibꞌilikanh wanmahan yu xiwkilal,
3 yu tzet chiyal ebꞌnaj ayko ishowal winhan.
Kaw chinekꞌkano yaꞌan yu ebꞌnaj txꞌoj tuꞌ,
chanayo ebꞌnaj isyaꞌtajil wibꞌanhan.
Kaw chinistzumbꞌekꞌojan ebꞌnaj yu sunil ishowal.
4 Kaw chabꞌe wanmahan isyaꞌil.
Kaw chꞌok xiwkilal winhan yu naj kamikal.
5 Kaw chꞌok huneꞌ niman xiwkilal yinh wanmahan,
kaw chinluylunkanhan, kaw nohiko xiwkilal winhan.
6 Chiwalnihan hakaꞌ tiꞌ: «Ayxikꞌa ay inxikꞌan hakaꞌ noꞌ kuwis,
kat intopurpunan kat inxewninojan.
7 Ta ay inxikꞌan kaw nahatmi chintohan,
kat inkankanojan sat txꞌotxꞌ desierto.
8 Hak tuꞌ xin yinh anhemi chiwebꞌa hinbꞌahan tet nimeta jaqꞌeqꞌ yebꞌ kꞌuh chisye isbꞌa,»a kinchihan.
9 Mamin, tanhtzelo hunteqꞌan ebꞌnaj tuꞌ,
machojabꞌ chitxumchalo yu ebꞌnaj yinh tzet chal-le tet hunun,
yuto hanhkꞌanhetikꞌa istxꞌojal yebꞌ howal chiwilan yul konhobꞌ yu ebꞌnaj.b
10 Tzꞌayik aqꞌbꞌal ishoyxiko ebꞌnaj yibꞌanh iskꞌubꞌal konhobꞌ,
aynhetikꞌa istxꞌojal yebꞌ ekꞌnajil, yebꞌ eleqꞌ yul konhobꞌ tiꞌ.
11 Hakpax tuꞌ yulaj isbꞌelal konhobꞌ tiꞌ,
aynhetikꞌa istxꞌojal yebꞌ leqꞌtiꞌal yul txonhbꞌal.
12 Ta komon ebꞌnaj chinetan tuꞌan, chimtecha wuhan yinh hakaꞌ tuꞌ.
Maxhto bꞌay chinutelaxan yu ebꞌnaj chichiwako iskꞌul winhan hakaꞌ tiꞌ,
tato hak tuꞌ, chimisje webꞌanilo hinbꞌahan tet.
13 Yaj wal hach tiꞌ, yet yalanhto kinhawijbꞌahan.
¡Tawinh xin kawxi inkꞌulan, yebꞌ ayto wuh hinbꞌahan yebꞌ hach!
14 Yet yalanhto kaw jetbꞌi kobꞌa, chijalni yul kokꞌul jet hununonh,
yet jekꞌ yinh iskꞌulchꞌanil kokꞌul yul Yatut Komam Dios.
15 Aykꞌayojabꞌ ebꞌnaj chichiwa iskꞌul winhan yul isqꞌabꞌ naj kamikal.
Itzitztojabꞌ ebꞌnaj, kat yilaxto ebꞌnaj mujuj,
yuto hanhkꞌanhe istxꞌojal ay yul yatut ebꞌnaj yebꞌ yul yanma ebꞌnaj.
16 Hanintiꞌan chiꞌahwawan tet Komam Dios chiniskolnihan Komam.
17 Yet sakꞌayal, yebꞌ qꞌejbꞌiyal,
yebꞌ yet aqꞌbꞌalil chiꞌahwawan tet Komam, kat woqꞌan sataj,
kat yabꞌen tzet chiwalan.
18 Haꞌ Komam chꞌaniko aqꞌankꞌulal yul wanmahan,
chiniskolnihan xol howal, waxanhka kaw tzetkꞌa ebꞌnaj chiꞌaniko howal winhan.
19 Komam Dios yahaw yinh sunilbꞌal ej tiempo,
chiyabꞌe Komam tzet chiwalan,
kat yel istxꞌixobꞌal ebꞌnaj yu Komam, yuto maxhtikꞌa chishel ebꞌnaj isbꞌeybꞌal,
maxhtikꞌa chixiwnino ebꞌnaj tet Komam.
20 Yinikanh isqꞌabꞌ naj txꞌoj yinh ebꞌnaj akꞌankꞌulaltikꞌa ye yebꞌ naj,
ismanhkꞌon naj istrato yaqꞌ tet ebꞌnaj.
21 Kaw labꞌan istzotel naj, hakaꞌ islabꞌanil noꞌ manteca,
yajaꞌ howal chꞌekꞌ yinh isnabꞌal naj.
Kaw labꞌan istzotel naj hakaꞌ islabꞌanil teꞌ aceite,
yajaꞌ wal yaqꞌ naj xin lahan hakaꞌ chꞌen espada ahnaxati yul yatut.
22 Ta ay tzet ayko yinh hakꞌul, hal tet Komam,
haꞌ Komam chikolwa tawinh hatoholbꞌanheniko habꞌa.
Makta chiyijen tzet chal Komam,
mach chischah aykꞌayo Komam yinh hunelnhe.
23 Mamin, hach inDiosalan, haꞌ ebꞌnaj potxꞌwawom,
yebꞌ ebꞌnaj chalni leqꞌtiꞌal,
machi yiktan iskawil ebꞌnaj yul sat yibꞌanhqꞌinal tiꞌ.
Hach chawakanto ebꞌnaj yul holan yet kamikal mach istanhbꞌal,
yajaꞌ wal intiꞌan tawinh chikawxi inkꞌulan.