Txah chiqꞌanni tet Komam Dios ispahnilo ebꞌnaj ayko ishowal yinh
Salmo tiꞌ, Masquil, tzꞌibꞌnhebꞌilkano yu yaꞌ rey David tet naj yahawil yinh isnuqꞌal bꞌit, yu huneꞌ Neginot, yet apni ebꞌnaj zifeo yalno tet yaꞌ rey Saúl hakaꞌ tiꞌ: «¿Tom maxhtaj sat kotxꞌotxꞌanh ebꞌabꞌil isbꞌa yaꞌ David xin?» xhi
54
Mamin, hach inDiosalan, kolinan yu habꞌi,yebꞌ xin yu hawip chapahto mak ayko ishowal winhan.
2 Mamin, abꞌe intxahan chiwaqꞌan tawet,
hajbꞌa hatxikin yinh tzet chiwalan.
3 Yuto ay ebꞌnaj kaw chiyikanh isbꞌa chaniko ebꞌnaj ishowal winhan.
Chinissayikꞌojan ebꞌnaj yunhe kinispotxꞌnihan ebꞌnaj yalni,
yuto machi hach yul sat ebꞌnaj.
4 Haꞌ Komam chikolwa winhan.
Yu Komam yuxin itzitz hinan.
5 Haꞌ Komam Dios chipajtzen istxꞌojal tet ebꞌnaj ayko ishowal winhan.
Walnihan tet Komam:
«¡Mamin, tzokꞌilo ebꞌnaj yu isyelal chawala!
6 Chꞌel yinh wanmahan chiwaqꞌan inxahanbꞌalan tawet,
kat inbꞌitnhenan habꞌi Mamin, yuto kaw kꞌulachkanoj,» kinchihan.
7 Yuto Komam kinkolnihan yul isqꞌabꞌ isyaꞌtajil,
wilnipaxojan yu isbꞌaqꞌ insatan istanhkanilo ebꞌnaj ayko ishowal winhan.