Issukal yebꞌ istxꞌojal anma
Salmo tiꞌ, Masquil, tzꞌibꞌnhebꞌilkano yu yaꞌ rey David, tet naj yahaw bꞌit, yibꞌanhiloj Mahalat
53
Anma kaw lutꞌkanoj chal yul yanma: «Machi Dios,» xhi.Sunil anma chiwatxꞌen istxꞌojal,
hanhkꞌanhetikꞌa isyahbꞌetajil chiswatxꞌe.
Machi hunu mak tiꞌ chiwatxꞌen iskꞌulal.
2 Hata satkanh tꞌanhanayti Komam Dios yinh sunil anma,
yunhe yilni ta ay hunu mak kꞌul istxumni,
yebꞌ ta ay hunu mak chisayni Komam.
3 Yajaꞌ sunil anma, tona yul huneꞌ bꞌeh txꞌoj xayetakanto isbꞌa,
machi hunu mak tiꞌ chiwatxꞌen iskꞌulal, nitam hunuj.
4 Haꞌ hunteqꞌan mak chiwatxꞌen istxꞌojal tuꞌ mach isnabꞌal,
haꞌ ton lanhan istanhtzenilo wet konhobꞌan.
Hakaꞌ islohni ebꞌnaj tzet chislo,
hak tuꞌ chu istanhtzenilo ebꞌnaj anma;
machi xin chawte ebꞌnaj Komam Dios yinh.
5 Chiluylunkanh ebꞌnaj yu xiwkilal yuto ayko Komam yetbꞌiho makta chiwatxꞌen istoholal.
Hunteqꞌan anma tuꞌ tzebꞌi yinh tzet chiswatxꞌe ebꞌnaj mebꞌaꞌ,
yaj wal anma mebꞌaꞌ tuꞌ xin, haꞌ Komam Dios ayko yipo yanma.
6 Tzettam saqꞌal ta bꞌey tzalan Sión chitit huneꞌ mak chiꞌaqꞌni kolbꞌanile tet anma Israel.
Yet chiyanayo Komam Dios iskꞌulal yibꞌanh iskonhobꞌ Israel,
chiyaqꞌ tzalaho iskꞌul anma Israel tuꞌ,
anma titna yinh yuninal jichmam Jacob.