Nabꞌnhe kaw chikanh isbꞌa anma txꞌoj isbꞌeybꞌal
Salmo tiꞌ Masquil, tzꞌibꞌnhebꞌilkano yu yaꞌ rey David tet naj chiꞌanilo isnuqꞌal bꞌit, yet yul naj Doeg, naj edomita, yalni naj tet yaꞌ Saúl tato hulikꞌo yaꞌ David bꞌey yatut yaꞌ Ahimelec
52
Hach kaw aykano hawip, hawalni,¿tzet yinh yuxin kaw chawikanh habꞌa yinh istxꞌojal chawatxꞌe?
¡Haꞌ iskꞌulchꞌanil iskꞌul Komam Dios aynhetikꞌa yinh sunilbꞌal ej tiempo!
2 Hanhkꞌanhetikꞌa istxꞌojal ayko sat hawaqꞌ,
hanhkꞌanhetikꞌa leqꞌtiꞌal chala, lahan hakaꞌ chꞌen cuchillo kaw ayahti yeh.
3 Kaw ekꞌbꞌalto chaxhtzala yinh istxꞌojal sata iskꞌulal.
Kaw ekꞌbꞌalto chaxhtzala yinh leqꞌtiꞌal sata isyelal.
4 Wal hawaqꞌ kaw istzan yalni tzotiꞌ hakaꞌtanhe isyelal chala, yajaꞌ leqꞌtiꞌal.
Kaw chaxhtzala yinh tzotiꞌ txꞌoj chiꞌetanto hawet anmahil.
5 Yajaꞌ wal Komam Dios chaxhistanhtzekanilo yinh hunelnhe.
Chaxhtzabꞌcha yu Komam kat kaxhistzumbꞌenilo yul hawatut,
kat yinilo hakawil.
6 Anma yijem tet Komam Dios hayet chilni huneꞌ tuꞌ, kat isxiwkanh,
yaj xin chitzebꞌi yinh huneꞌ mak tuꞌ, chalni hakaꞌ tiꞌ:
7 «Hak tuꞌ chitanhkano huneꞌ naj yu mach chikawxi iskꞌul naj yinh Komam Dios,
wal xin to yinhnhe isqꞌalomal chikawxi iskꞌul,
yebꞌ hanhkꞌanhetikꞌa istxꞌojal chiswatxꞌe,» xhi.
8 Yajaꞌ wal hinan, lahan hinan hakaꞌ hunu teꞌ olivo kaw yax ayikto yul Yatut Komam.
Chikawxi inkꞌulan yinh sunilbꞌal tiempo yinh iskꞌulchꞌanil iskꞌul Komam.
9 Hach inDiosal, chaxhinbꞌitnhehan yu tzet hawatxꞌe.
Tawinhnhe chiwechmahan yinh sat sunil ebꞌnaj yijem tawet,
yuto kaw kꞌul hachkanoj.