Chisnah isbꞌa chisqꞌanni nimankꞌulal yu issajnhenkano Komam Dios
Salmo tzꞌibꞌnhebꞌilkano yu yaꞌ rey David tet naj yahaw yinh bꞌit; yinh istzujanilxa yet isway yaꞌ yebꞌ ix Betsabé, yul yaꞌ Natán, haꞌ ton yaꞌ profeta
51
Kaw tzꞌayojabꞌ hakꞌul winhan, Mamin, hakaꞌ iskꞌulchꞌanil hakꞌul,hakaꞌ kaw isnimanil hakꞌul, hokanh istxꞌojal chinwatxꞌehan.
2 ¡Txꞌahilo inmulan winhan. Kaw sajojabꞌ chinelkanikojan yinh ej inmulan yul hasat!
3 Chiwohtanhelojan ta kaw mulum hinan yul hasat,
aynhetikꞌako inmulan yinh innabꞌalan.
4 Mamin, wako inmulan, kaw tawetnhe wako inmulan,
inwatxꞌehan istxꞌojal yul hasat.
Yuxin hayet chawanayo isyaꞌtajil yibꞌanh mak manhkꞌom,
haꞌ istoholal chawatxꞌe, machi hunu mak chu iskachwa tawinh.
5 Yinh kaw yeli yettaxtikꞌa inpitzkꞌahan, mulum inxatikꞌahan.
Mulum inxatikꞌahan yet ijbꞌilintokojan yu inmiꞌan.a
6 Yinh kaw yeli chaxhtzala yinh mak chiwatxꞌen istoholal yinh sunil yanma,
yinh ewantajil kinhakuyan istxumchalo helanile wuhan.
7 Ikanilo inmulan winhan yu teꞌ hisopo,b kat insajbꞌikanojan;
txꞌahilo inmulan, ekꞌbꞌalojabꞌ issajil chinelikojan sata chꞌen chew.
8 Aqꞌ tzalahilal wetan, meltzojabꞌ tzalahilal wetan hunelxa,
waxanhka hawaqꞌ ekꞌoyaꞌ inbꞌajilan.
9 Ebꞌato hasat tet inmulan, hokanh sunil intxꞌojalan.
10 ¡Mamin, hach inDiosalan, sajojabꞌ wanmahan yul hasat.
Aqꞌ akꞌbꞌo wanmahan, Mamin,
haxinwal tohol chiwute hinbꞌahan tawet!
11 Machojabꞌ chinhawilojan yinh hasat.
Mach chawilo Komam Espíritu Santo yul wanmahan.
12 Meltzohojabꞌ huneꞌ tzalahilal aytikꞌa yul wanmahan,
huneꞌ tzalahilal yinh inkolbꞌanilan.
Kꞌubꞌa hinan yu iskꞌulchꞌanil hakꞌul.
13 Haxinwal chinyelojan habꞌeybꞌal tet anma txꞌoj,
kat ismeltzoko yul haqꞌabꞌ.
14 Mamin, hach inDiosalan, hach inKolomalan.
Aqꞌomkamo anma hinan, kolinilojan tet inmul tuꞌan.
Hak tuꞌ chu walnikꞌojan kat inbꞌitnhenan
tato kaw tohol hachkanoj.
15 Mamin, haj intiꞌan,
kat kaxhinbꞌitnhenan.
16 Ta xahanbꞌal yebꞌ no noqꞌ chinhuslax tawet chawoche,
haꞌmi chiwaqꞌan tawet,
wal xin maxhtaj chaqꞌana.
17 Haꞌ xahanbꞌal chawoche, Mamin,
haꞌ ton anma chistxumu tato mulum,
kaw xin yaꞌ chuko ismul tuꞌ yinh yanma kat yinayo isbꞌa tawet.
Haꞌ mak hakaꞌ tuꞌ Mamin, kaw chaxhtzala yinh.
18 Mamin, ayo hakꞌulal yibꞌanh Sión yu iskꞌulchꞌanil hakꞌul.
Watxꞌekanh iskꞌubꞌal Jerusalén hunelxa.
19 Ta hak tuꞌ, kaw yinh tzalahilal chachah xahanbꞌal halbꞌilkano yinh ley ta chiꞌaqꞌlax tawet,
haꞌ ton no noqꞌ kaw chitzꞌakantoj,
kat yaltelax noꞌ tzehla wakax yinh xahanbꞌalil tawet sat mexha yet xahanbꞌal.