Chiꞌapni istzꞌayikal bꞌay chil Komam Dios yinh tzet chiꞌeliko sunil anma
Salmo tiꞌ tzꞌibꞌnhebꞌilkano yu yaꞌ Asafa
50
Chitzotel Komam Dios Jahawil, Komam kaw aykano yelapnoj.Hanhe Komam Dios kaw Dioskanoj,
mach hakaꞌo hunteqꞌan chihal-lax diosal.
Chawten Komam sunil anma ay yul sat yibꞌanhqꞌinal tiꞌ, kat iskutxikoj;
anma chitit bꞌay chiꞌahilo tzꞌayik masanta bꞌay chito tzꞌayik.
2 Bꞌey konhobꞌ Sión, huneꞌ konhobꞌ kaw kꞌulchꞌankano sikꞌlebꞌil,
chitzejla isqꞌaqꞌal ismay Komam.
3 Chul koDiosal, yajaꞌ mach tonheho chꞌok tuknoj yet chihuli.
Ayko huneꞌ qꞌa qꞌaꞌ sata Komam chitanhtzeniloj sunil tzet ayko sata tuꞌ,
yebꞌ xin chimaqꞌwa kꞌuh ishoyanil Komam.
4 Hata bꞌay ay Komam chawte Komam satkanh,
chawtenpaxo Komam txꞌo txꞌotxꞌ yunhe yilni yinh tzet chꞌeliko iskonhobꞌ.
5 Chalni Komam:
«Kutxbꞌaweko anma pohbꞌililo isbꞌa xol istxꞌojal yu isyijen wetan,
anma tꞌinhbꞌankano istzotiꞌ wetan, yaqꞌni isxahanbꞌal,» xhi Komam.
6 Chalni satkanh ta kaw toholkano Komam yinh sunil tzet chiswatxꞌe.
7 Chalnipaxo Komam:
«Hex inkonhobꞌ Israelan abꞌewe tzet chiwalan,
yuto ay tzet chiwalan teyibꞌaniloj,
hanintiꞌan Dios hinan, heDiosal wehan.
8 Mach chexinkachan yu hexahanbꞌal cheyaqꞌ wetan,
yebꞌ ej no noqꞌ chenhus hunun tzꞌayik wetan.
9 Mach yilalo chinqꞌanan noꞌ tzehla wakax teyet xol noꞌ hewakax.
Mach yilalo chinqꞌanpaxojan noꞌ winaj chiw yul hepeyabꞌ xahanbꞌalil wetan.
10 Yuto wetan ye sunil ej no noqꞌ ay xolaj qꞌebꞌtaj
yebꞌ ej no noqꞌ chiꞌekꞌ yinhla wonhan.b
11 Wetan sunil ej noꞌ chꞌik chꞌekꞌ xol teꞌ qꞌebꞌtaj,
yebꞌ sunil ej no noqꞌ chꞌekꞌ sat cheqꞌanh.
12 Qꞌinaloj ta chinnhochahan, mach yilalo chinqꞌanan teyet,
yuto wetan ye sunil yul sat yibꞌanhqꞌinal tiꞌ,
yebꞌ sunil tzet ay sat.
13 ¿Tom chinkꞌuxan ischibꞌehal noꞌ winaj wakax,
kat wukꞌnihan ischikꞌil noꞌ winaj chiw?
14 Wal xin haꞌ xahanbꞌal chiwochehan,
haꞌ ton heyaqꞌni yuchꞌandiosal wetan,
kat heyijen tzet cheyalte wetan,
hanintiꞌan kaw niman welapnojan.
15 Hayet chul isyaꞌtajil teyibꞌanh,
chinheyawtenan teyinh, kat kexinkolnihan,
haxa hex xin cheyako inmayan,» xhi Komam.
16 Wal tet ebꞌnaj txꞌoj isbꞌeybꞌal chal Komam hakaꞌ tiꞌ:
«¿Tzet yinh chexok heyalaꞌ chejbꞌanile aykano wuhan?
¿Tzet yinh chexok heyalaꞌ chejbꞌanile halbꞌilkano wuhan?
17 Yuto chinheyahan yet chexinkachnihan,
kat heyanipaxti heyichinh tet intzotiꞌan.
18 Hex tiꞌ kaw chextzala yinh ebꞌnaj elqꞌom,
kat heyetbꞌinhen hebꞌa yebꞌ ebꞌnaj,
kat hehunbꞌanpaxo hebꞌa yebꞌ ebꞌnaj ixlom.
19 Kaw cheyako hetiꞌ yalni istxꞌojal,
yebꞌ hewatxꞌenayo leqꞌtiꞌal yinh heyet anmahil.
20 Kaw chexok tzꞌonhnoj,
kat heyalni isqꞌumal heyet konhobꞌ,
yebꞌ xin kaw yinhtikꞌa heyuxhta chexok heyalaꞌ istxꞌojal.
21 Sunil hunteqꞌan tuꞌ cheyute,
yajaꞌ wal hinan xin tonhe chiwilan.
Ham heyalni ta lahan hinan hakaꞌ hex tiꞌ.
¡Yaj chinkachwahan teyinh, kat walnikojan hemul tuꞌ yinh hesat!
22 Hex xakinhenahulnhetojan tiꞌ,
kaw txumchahojabꞌilo heyu yinh tzet chiwalan;
kꞌuxantaxka istit inhowalan kat kexintanhtzenkanilojan,
machi mak xin chexkolniloj.
23 Haꞌ mak chiꞌaqꞌni yuchꞌandiosal wetan, chako inmayan.
Haxa mak chibꞌelwi yinh iskꞌulal, chinyelojan kolbꞌanile tet,» xhi Komam.