Mach chu iskawxi kokꞌul yinh qꞌalomal
Salmo tiꞌ, tzꞌibꞌnhebꞌilkano yu ebꞌnaj iskꞌahol naj Coré tet naj yahawil yinh isnuqꞌal bꞌit
49
Abꞌewe tzet chiwalan hex konhobꞌ hex tiꞌ.Abꞌewe yinh tzet chiwalan sunil hex ay hex yul sat yibꞌanhqꞌinal tiꞌ.
2 Hex ay heyelapnoj yebꞌ hex machi kaw heyelapnoj,
hex qꞌalom hex, hakpax tuꞌ hex mebꞌaꞌ hex.
3 Chinokan tzotelo teyet yinh helanile,
chalnipaxo wanmahan yitzꞌatil wiꞌe.
4 Chinhajbꞌa intxikinan yinh tzet chal ej tzotiꞌ kaw aykano yelapnoj,
kat walnilojan tzettaj ewanyehi yet chiwanikojan bꞌit yebꞌ teꞌ arpa.
5 ¿Tzet yinh yuxin chinxiwan tet ej istzꞌayikal isyaꞌtajil?
¿Tzet yinh yuxin chinxiwan tet isyaꞌtajil chinhoynayojan yu ebꞌnaj ayko ishowal winhan?
6 Hunteqꞌan ebꞌnaj tuꞌ yinh isqꞌalomal ebꞌnaj chikawxi iskꞌul,
kat xin isloloꞌnhen isbꞌa ebꞌnaj yinh tzettaj aya.
7 Yajaꞌ machi hunu ebꞌnaj tuꞌ chu iskolni yuxhtaj,
mach chu istohlan ebꞌnaj Komam yunhe iskolni Komam ebꞌnaj.
8 Kaw aykanh istohol iskawil hunun anma,
yuxin mach chiqꞌoji chꞌen melyu isloqꞌni iskawil,
9 yunhe yehikꞌoj, yebꞌ ay iskawil yinh sunilbꞌal ej tiempo yul sat yibꞌanhqꞌinal tiꞌ,
machi xin chikami.
10 Kaw lahannhe chu iskam sunil anma.
Hakaꞌtikꞌa chu iskam ebꞌnaj winaj kaw helan,
hak tuꞌ chu iskampaxo ebꞌnaj suk iskꞌul.
Nanxa xin mak yul isqꞌabꞌ chikankano isqꞌalomal ebꞌnaj yet chikami.
11 Haꞌ istxumni ebꞌnaj ta haꞌ yatut ebꞌnaj ayko isbꞌi yinh sunilbꞌal tiempo tet yuninal yuninal ebꞌnaj.
¡Chanipaxiko isbꞌi ebꞌnaj yinh istxꞌotxꞌ!
12 Waxanhka kaw qꞌalom hunu naj winaj,
mach chiꞌehikꞌo naj hunelnhe yul sat yibꞌanhqꞌinal tiꞌ.
¡Chikamto naj hakaꞌ chu iskamto ej no noqꞌ!
13 Haꞌ huneꞌ isbꞌeh ebꞌnaj tuꞌ sukalnhe yehi,
haxa yuninal yuninal chitzala yinh tzet chal ebꞌnaj.
Hak tuꞌ chu istanhkanilo yuninal ayko yanma yinh tzet chiyala.
14 Hakaꞌ noꞌ meꞌ chiꞌilaxto yinh kamikal,
naj kamikal tuꞌ xin, kaw ayko naj yilni hunteqꞌan anma tuꞌ.
Hayet sahabꞌ sakꞌayal chikankano ebꞌnaj yalanh yip ebꞌnaj kꞌul isbꞌeybꞌal,
nixhtejal ispaxkanilo yip ebꞌnaj,
haꞌ xin kamikal mach istanhbꞌal haꞌ yatut ebꞌnaj.
15 Yajaꞌ wal hinan, haꞌ Komam chinkolnihan yul isqꞌabꞌ kamikal.
Chinyinitojan Komam yintaj.
16 Ta ay hunu mak chiqꞌalombꞌikanh,
yebꞌ ta kaw chiꞌahkanh tzet ay yul yatut mach chawako yinh hakꞌul.
17 Yuto hayet chikami, matzet chiyito yintaj,
mach chiyito isqꞌalomal tuꞌ yet chikami.
18 Waxanhka kaw saqꞌal chꞌekꞌ yu yul sat yibꞌanhqꞌinal tiꞌ,
kat yaqꞌlax bꞌinaho yu anma yu isqꞌalomal,
19 yajaꞌ xin chiꞌapni istzꞌayikal bꞌay chikami, hakaꞌ yu iskamto ebꞌnaj yichmam,
matxa xin chimeltzo yilaꞌ sajilqꞌinal.
20 Naj winaj mach sunilbꞌal tiempo ay iskawil,
waxanhka kaw qꞌalom, chikamtoj hakaꞌ chu iskam ej no noqꞌ.