Iskꞌulchꞌanil Sión iskonhobꞌ Komam Diosa
Huneꞌ Salmo tiꞌ tzꞌibꞌnhebꞌilkano yu ebꞌnaj iskꞌahol naj Coré
48
Kaw niman yelapno Komam Jahawil.Kaw istzan Komam yal-lax kꞌul-la tzotiꞌ yinh,
yul iskonhobꞌ Komam bꞌey wonhan Sión.
2 ¡Kaw saqꞌal jilni wonhan Sión, yinh yetkꞌulal norte aykoj!
Kaw xin sunil anma yul sat yibꞌanhqꞌinal tiꞌ chaqꞌ tzalaho iskꞌul yinh,
yuto iskonhobꞌ Komam Dios Jahawil yehi.
3 Ayko Komam yul ej palacio ay bꞌey Jerusalén,
xayaqꞌ yohtanhelo isbꞌa ta haꞌ yinh bꞌay wal kokolni kobꞌa.
4 Iskutxbꞌako isbꞌa ebꞌnaj rey yinh iskonhobꞌ Komam, ishitziko ebꞌnaj yinh.
5 Yajaꞌ yet yilni ebꞌnaj konhobꞌ tuꞌ iskꞌayilo iskꞌul ebꞌnaj, isxiwkanh ebꞌnaj, yelkanh ebꞌnaj xin.
6 Yok xiwkilal yinh ebꞌnaj, xanhe chikꞌarla yah ebꞌnaj, ay isyaꞌil yibꞌanh ebꞌnaj hakaꞌ yet chiwatxꞌi iskꞌul hunu ix ix.
7 Hakaꞌ yuchkꞌakanto teꞌ barco yet konhobꞌ Tarsis yu jaqꞌeqꞌ chitit yinh yetkꞌulal bꞌay chiꞌahilo tzꞌayik.
8 Hakaꞌ yu jabꞌenanh, hak tuꞌ yu jilnihanh yul iskonhobꞌ Komam Yahawil, kaw aykano yip.
Yul iskonhobꞌ koDiosal chistꞌinhbꞌakano Komam Jerusalén yinh sunilbꞌal ej tiempo.
9 Chikonatijanh iskꞌulchꞌanil hakꞌul, Mamin, yet ayonhanh yul hawatut.
10 Hakaꞌ yelapno habꞌi, Mamin, hak tuꞌ yal-lax kꞌul-la tzotiꞌ tawinh sunil yul sat yibꞌanhqꞌinal tiꞌ. Kaw hanhkꞌanhe istoholal chawatxꞌe.
11 Tzalahojabꞌ anma ay bꞌey wonhan Sión, kat istzalapaxo anma ay yul ismajul Judá yu istoholal chawatxꞌe, Mamin.
12 Hex ah konhobꞌ Sión, bꞌelwanhwe yinhla ishoyanil hekonhobꞌ, kat hebꞌisni hanta torre aykanh.
13 Kam cheyilkano iskꞌubꞌal ayko yinh, yebꞌ ispalacio, yunhe heyalni tet heyuninal chitohuli.
14 Yuto haꞌ Komam Dios haꞌ koDiosal yinh sunilbꞌal ej tiempo. Haꞌ xin Komam chonhijbꞌan yinh tohbꞌalqꞌinal.