Haꞌ Komam Dios yahawil yinh sunil yul sat yibꞌanhqꞌinal tiꞌ
Salmo tiꞌ, tzꞌibꞌnhebꞌilkano yu ebꞌnaj iskꞌahol naj Coré
47
¡Sunil hex konhobꞌ hex tiꞌ,poqꞌwe heqꞌabꞌ, awanhwe yinh kaw ip yu tzalahilal tet Komam Dios!
2 Yuto kaw aykano yelapno Komam Dios,
yebꞌ kaw aykano ismay.
Haꞌ Komam xin, yahaw yinh sunil txꞌo txꞌotxꞌ.
3 Sunil ej nixhte konhobꞌ chiyaqꞌako Komam yalanh jip;
yebꞌ nime konhobꞌ, chapaxikto Komam yalanh joj.
4 Haꞌ Komam Dios sikꞌlenkano komajul,
haꞌ ton txꞌo txꞌotxꞌ bꞌay ayonh tiꞌ.
Kaw tzalahojabꞌ kokꞌul hanhonh titnajonh yinh jichmam Jacob,
yuxin kaw xahan ayonh yu Komam.
5 ¡Ahto Komam Jahawil yul yehobꞌal yu tzalahilal,
yoqꞌ chꞌen trompeta!
6 ¡Bꞌitnanhwej, bꞌitnhewe bꞌit tet Komam Dios!
¡Bꞌitnanhwej, bꞌitnhewe bꞌit tet Komam Jahawil!
7 yuto yahaw Komam yinh sunil txꞌo txꞌotxꞌ.
¡Bꞌitnanhwe yebꞌ sunil yitzꞌatil hewiꞌ!
8 Haꞌ Komam yahawil yinh sunil ej nimeta konhobꞌ.
Tzꞌonhan Komam yul istzꞌonhobꞌal,
huneꞌ tzꞌonhobꞌal yetnhe Komam yehi.
9 Sunil ebꞌnaj nime winaj kaw ay yelapnoj,
kutxiko ebꞌnaj yebꞌ iskonhobꞌ Komam Dios,
isDiosal jichmam Abraham.
Yuto yet Komam sunil tzetaj ay yip yul sat yibꞌanhqꞌinal tiꞌ.
¡Komam Dios kaw aykanh yip!