Haꞌ Komam Dios chonhkolni yebꞌ xin haꞌ chꞌaqꞌni jip
Salmo tzꞌibꞌnhebꞌilkano tet naj yahaw bꞌit yu ebꞌnaj iskꞌahol naj Coré, bꞌit yinh Alamot
46
Yul isqꞌabꞌ Komam Dios chikokol kobꞌa,yinh Komam chitit jip,
haꞌ Komam chikolwa jinh yinh istzꞌayikal isyaꞌtajil.
2 Yuxin mach chonhxiwi,
waxanhka chitzikobꞌtanhelax txꞌo txꞌotxꞌ tiꞌ,
kat istokano ej witz yich haꞌ mar.
3 Waxanhka kaw chitit ishowal haꞌ mar, kat ismaqꞌni isbꞌa haꞌ,
kat isbꞌilikanh nimeta witz yu ishowal haꞌ, mach chonhxiwkanh.
4 Kaw saqꞌal jilni iskonhobꞌ Komam yu huneꞌ ha haꞌ txꞌiꞌal isqꞌabꞌ chiꞌekꞌ yul konhobꞌ.
Huneꞌ konhobꞌ tuꞌ kaw yet Komam yehi, Komam kaw aykano yelapnoj.
5 Ayko Komam yiktabꞌal iskonhobꞌ tuꞌ, istanheni.
Haꞌ Komam chikolwa yinh iskonhobꞌ yet chistzabꞌniko yah tzꞌayik.
6 Ah yaw ej nimeta konhobꞌ,
isxiwpaxokanh ebꞌnaj ayko yahawiloj,
yulito txꞌo txꞌotxꞌ yet yabꞌelax yul isnuqꞌ Komam.
7 Komam Yahawil kaw aykano yip, haꞌ ayko jetbꞌihoj.
Haꞌ Komam Dios isDiosal jichmam Jacob, haꞌ chonhkolni.
8 Katawej, kat heyilni sunil kꞌaybꞌalkꞌule xaꞌiswatxꞌe Komam Jahawil sat txꞌo txꞌotxꞌ tiꞌ.
9 Xaꞌistanhtzekanilo Komam Dios howal yul sat yibꞌanhqꞌinal tiꞌ,
iswoqꞌnikanto Komam teꞌ litꞌ chiꞌokniko yinh howal.
Hakpax tuꞌ chꞌen lanza kaw kokꞌ aykaniko chꞌen yu Komam.
Yanipaxiko Komam qꞌaꞌ yinh chꞌen carruaje yet howal.
10 Yalni Komam: «Ehanhwe yinh aqꞌankꞌulal,
ohtanheweloj tato hanintiꞌan Dios inan.
Chinilaxokanhan yu sunil ej konhobꞌ,
kat yalaxiko inmayan sat txꞌo txꞌotxꞌ tiꞌ,» xhi Komam.
11 ¡Haꞌ Komam Yahawil kaw aykano yip, haꞌ ayko jetbꞌihoj!
¡Komam isDiosal jichmam Jacob, haꞌ chonhilni!