Bꞌit yinh ismohyilal naj rey
Salmo tiꞌ, Masquil, tzꞌibꞌnhebꞌilkano yu ebꞌnaj iskꞌahol naj Coré
45
Kaw nohna wanmahan yu tzotiꞌ kꞌul,yuxin chiwaqꞌan inbꞌitan tet naj rey,
lahan waqꞌan hakaꞌ lapiz chiꞌokniko yu naj tzꞌibꞌlom kaw helan.
2 Mam rey, hachnhechꞌan kawla winaj hach xol sunil ebꞌnaj winaj.
Hanhkꞌanhetikꞌa iskꞌulal chiꞌelti yul hatiꞌ,
yuxin kaw ayayo isyaxilal Komam tawibꞌanh yinh sunilbꞌal ej tiempo.
3 Kawxeko hawespada yinh hawiktaj,
winaj kaw helan, yuto ay hamay yebꞌ ay hawelapno.
4 Kaw hatzan haqꞌoji yinh ebꞌnaj ayko ishowal tawinh, yuxin chiꞌok hawinajil.
Kaw chaxhtzala yinh isyelal, chawatxꞌen istoholal yinh anma matzet ayko yipo yanma.
Kaw hantanhe iskꞌulal chiswatxꞌe hawatxꞌqꞌabꞌ.
5 Kaw xixiꞌ iswiꞌ isbꞌaqꞌ halitꞌ,
yuxin yet chaxhlitꞌwahi chiqꞌaxponikꞌto yul yanma ebꞌnaj ayko ishowal tawinh.
Chiꞌaykꞌay ej konhobꞌ yich hawoj.
6 Mamin, Dios, yahawil hach yinh sunilbꞌal ej tiempo. Hanhkꞌanhe istoholal chawatxꞌe yu haqꞌojoch.
7 Kaw chaxhtzala yinh iskꞌulal, Mam Rey, wal istxꞌojal xin chaxhyahwa yinh,
yuxin yet yalaxayo aceite yibꞌanh hawiꞌ, sikꞌbꞌil hachilo yu Komam Dios, haDiosal.
Kaw ekꞌbꞌal tzalahilal chaqꞌ Komam Dios tawet sata sunil ebꞌnaj ay ismunil takꞌatanh,
8 kaw xuqꞌ sam sunil xil haqꞌap yu teꞌ mirra, teꞌ áloe yebꞌ teꞌ canela.
Chawaqꞌ tzalaho hakꞌul yinh bꞌit chiꞌalaxiko yinh teꞌ arpa
yul palacio marfila ayko yelawiloj.
9 Ayko ebꞌix iskutzꞌin ebꞌnaj rey xol ebꞌix qꞌopo ay yul hapalacio.
Haxa yinh hawatxꞌqꞌabꞌ ayko ix reina,
haꞌ chꞌen oro kaw kꞌul tit bꞌey txꞌotxꞌ Ofir, ayko yelawilo ix.
10 ¡Abꞌe kutzꞌin, txalbꞌa hatxikin yinh tzet chiwalan!
Matxa chanati hakonhobꞌ, yebꞌpaxo yatut hamam,
11 yuto kaw chiyoche naj rey yilaꞌ hakꞌulchꞌanil.
Yilal hawinayo habꞌa yinh sat naj, yuto haꞌ naj hawahawil.
12 Ebꞌix iskutzꞌin naj rey ay bꞌey konhobꞌ Tiro yebꞌ ebꞌnaj kaw qꞌalom yul konhobꞌ,
iqꞌbꞌil issabꞌehal tawet yu ay iskꞌulal chiꞌilchalo tawinh.
13 Kaw saqꞌalkano jilni ix iskutzꞌin naj rey,
kaw kꞌulchꞌan jilni bꞌay ay ix, ayko chꞌen oro yinhla xil isqꞌap ix.
14 Kaw toxanhe chitzejla xil isqꞌap ix aykoj yet chiꞌilaxto ix sata naj rey,
tzujaniko ebꞌix qꞌopo yinta ix, haꞌ ton ebꞌix iswalix ix tzujan yintaj.
15 Kaw yinh tzalahilal okto ebꞌix,
kaw yinh tzalahilal chibꞌelwito ebꞌix yul ispalacio naj rey.
16 Wal ebꞌnaj hakꞌahol, haꞌ ebꞌnaj chiꞌok yul istzꞌonhobꞌal ebꞌnaj hawichmam,
kat yok ebꞌnaj yahawoj. Sunil xin yul ej hakonhobꞌ bꞌay chiꞌok ebꞌnaj yahawiloj.
17 Haninan xin chiwaqꞌan isnabꞌaꞌti habꞌi tet anma hunta el chiꞌekꞌto txꞌiꞌal tiempo,
kat kach isbꞌitnhen ej konhobꞌ yinh sunilbꞌal ej tiempo.