Kol-laxilo yet yalanhtokanoj yebꞌ isyaꞌtajil tinanh
Huneꞌ Salmo tiꞌ, Masquil, tzꞌibꞌnhebꞌilkano yu ebꞌnaj iskꞌahol naj Coré
44
Mamin, hach koDiosalanh, xajabꞌehanh yu kotxikinanh,yal komamanh jetanh yinh tzet hawatxꞌe yet yalanhtokanoj.
2 Yu sunil hawip hatzumbꞌelo anma mach kaxhohtanheni sat txꞌo txꞌotxꞌ.
Hawaqꞌni iskonhobꞌ tet ebꞌnaj jichmamanh, yehayo ebꞌnaj bꞌey tuꞌ.
Hawanayo isyaꞌtajil yibꞌanh ej nimeta konhobꞌ tuꞌ, hatzumbꞌenilo sat txꞌotxꞌ.
3 Mach yuho yip ebꞌnaj yebꞌ yu yespada ebꞌnaj jichmam yuxin qꞌoji ebꞌnaj.
Mach yiqꞌ ebꞌnaj txꞌo txꞌotxꞌ yu yaqꞌle howal ebꞌnaj, machoj.
Wal xin yiqꞌ ebꞌnaj txꞌotxꞌ yu hawip, Mamin,
yu ayiko isqꞌaqꞌal hasat yinh ebꞌnaj, yuto xahan ay ebꞌnaj hawu.
4 Mamin, hach inDiosalan yebꞌ wahawan,
hawu yuxin qꞌoji jichmamanh Jacob.a
5 Yu kaxhkolwahi yuxin konhqꞌojihanh yinh ebꞌnaj ayko ishowal jinhanh.
Yinh habꞌi koxanhkanayojanh makta chichiwa iskꞌul jinh tuꞌanh.
6 Mach chu iskawxi inkꞌulan yinh teꞌ litꞌ,
yebꞌ xin maxhtaj yu chꞌen espada yuxin chinqꞌojihan.
7 Wal xin hach kaxhkolwa jinhanh,
yuxin konhqꞌojihanh yinh ebꞌnaj ayko ishowal jinhanh.
Hach tiꞌ, hawako ebꞌnaj chichiwa iskꞌul jinhanh yinh txꞌixwilal.
8 Mamin, tawinhnhe chijaqꞌ tzalaho kokꞌulanh sunibꞌal tiempo,
kat kobꞌitnhenanh habꞌi yinh sunilbꞌal ej tzꞌayik.
9 Yajaꞌ wal tinanh, xakonhhaqꞌojilojanh,
konhhawanikojanh yinh txꞌixwilal.
Matxa ayachiko jetbꞌihojanh yet chonhtohanh yinh howal.
10 Konhhawaqꞌ meltzohanh jintajanh yinh sat ebꞌnaj chiꞌaniko howal jinhanh.
Anma ayko ishowal jinhanh ok eleqꞌ jinhanh, yinito tzet choche iskꞌul.
11 Konhhawakojanh yul isqꞌabꞌ ebꞌnaj, hakaꞌ chu yilaxto noꞌ meꞌ kamoj.
Konhhapujbꞌankantojanh xolaj konhobꞌ bꞌay ay anma mach ohtabꞌilo hach yu.
12 Konhhatxonhkantojanh hanhonh konhhakonhobꞌ honhtiꞌanh yinh isnabꞌnhehal,
machi xin kotoholanh haqꞌana.
13 Konhhawakojanh hakaꞌ hunu tzet ye tuꞌ machi yelapnoj,
yinh sat ej konhobꞌ ayko kokawilalanh. Kotzeyelaxanh,
yaqꞌlax tako kokꞌulanh yu anma tuꞌ.
14 Hawinilo kopixananh tet ej konhobꞌ mach ohtanhebꞌilo hach yu.
Hayet konhyilnihanh isyumni iswiꞌ, isbꞌuchwa jinhanh.
15 Hunun tzꞌayik innanitijan intxꞌixobꞌalan,
chisomchakanh yul inwiꞌan,
16 yu ebꞌnaj chinpitnikojan yebꞌ chꞌaqꞌni tako inkꞌulan; ebꞌnaj chiꞌaniko howal winhan.
17 Sunil hunteqꞌan tiꞌ hul jibꞌanhanh,
yajaꞌ machi kaxhjilojanh yinh konabꞌalanh,
machi xin konahulnhetojanh hatrato.
18 Mach ayoko yinh konabꞌalanh kach konahulnhentojanh,
yebꞌ kobꞌejnikanojanh habꞌeh.
19 Yajaꞌ konhhaqꞌojtojanh xol isyaꞌtajil bꞌay ayto no noqꞌ,
konhhawanikojanh xol qꞌejholo kaw ay ismay.
20 Mamin, ta kach konahulnhetojanh,
ta konhokanh kolebꞌanhto koqꞌabꞌanh tet ej tioxh,
21 ixtanh ye huneꞌ tuꞌ yul hasat Mamin,
yuto hach tiꞌ hawohta sunil tzet chꞌekꞌ yinh janmahanh.
22 Wal xin yu ayonhikojanh yul haqꞌabꞌ,
yuxin hunun tzꞌayik jilikojanh kokamanh.
Hakaꞌ chiꞌutelax noꞌ meꞌ yet chiꞌilaxto noꞌ kamoj, hak tuꞌ chonhutelaxanh.
23 ¡Ilo hawayanh! ¿Tzet yinh yuxin hakaꞌtanhe chaxhwayi?
¡Ilo hawayanh! Mach chonhhanahulnhetojanh yinh hunelnhe.
24 ¿Tzet yinh yuxin chawebꞌato hasat jetanh?
¿Tzet yinh yuxin chanahulnheto sunil isyaꞌtajil yebꞌ bꞌiskꞌulal chijaqꞌlehanh?
25 Yuto haꞌ janmahanh nhohankanayo xol pojoj.
Kaw xaꞌelkano kopixananh, kaw ayonhkanayojanh sat txꞌotxꞌ.
26 ¡Mamin, ahanhwanoj, kat hawul kolwa jinhanh,
kat konhhakolnihanh yu iskꞌulal hakꞌul!