Chiqꞌanlax kolbꞌanile tet Komam Dios
43
Mamin, hach inDiosalan, watxꞌe istoholal winhan,yeloj ta machi inmulan, kolinan yul isqꞌabꞌ anma mach kach ohtanheni,
anma txꞌoj yebꞌ leqꞌtiꞌ.
2 Yuto hach tiꞌ inDiosalan yebꞌ mak chinkolnihan.
¿Tzet yinh yuxin makinhahitzilojan takꞌatanh?
¿Tzet yinh yuxin bꞌiskꞌulal wehan chinekꞌan,
yebꞌ chitak inkꞌulan yu ebꞌnaj ayko ishowal winhan?
3 Yelo sajilqꞌinal yebꞌ isyelal wetan,
yunhe kinisyenihan yinh bꞌeh chininitojan bꞌey wonhan hawet yehi,
bꞌay ayach.a
4 Hak tuꞌ chu wapnihan bꞌay ay mexha yet xahanbꞌal,
kat inbꞌitnhenan habꞌi yu teꞌ arpa.
Yuto hach tiꞌ Mamin, hach inDiosalan chawaqꞌ tzalahilal yul wanmahan.
5 ¿Tzet yinh yuxin chikabꞌkonkanh wanmahan?
¿Tzet yinh yuxin chiwako yinh inkꞌulan?
Wal xin haꞌ Komam Dios ayko yipo wanmahan,
chito inbꞌitnhehan isbꞌi Komam,
yuto haꞌ Komam inKolomalan yebꞌ inDiosalan.