LIBRO 2
(Salmos 42–72)
Haꞌ Komam ayko yipo wanmahan
Salmo tiꞌ, Masquil, tzꞌibꞌnhebꞌilkano yu ebꞌnaj iskꞌahol naj Coréa
42
Hakaꞌ chu issayni noꞌ miꞌe sajche ha haꞌ yet kaw chitaj istiꞌ noꞌ,hak tuꞌ chu kach insaynilojan Mamin, hach inDiosal,
yet wanmahan hawehi.
2 Haꞌ wanmahan chachochen Mamin, Dios itzitz,
¿bꞌaqꞌinh xin chinmeltzohan, kat xin inyeni hinbꞌahan tasataj?
3 Tzꞌayik aqꞌbꞌal chinoqꞌan, haꞌ yal insatan, haꞌ ayko wochojan.
Hunun tzꞌayik xin isqꞌambꞌelax wetan: «¿Bꞌaytuꞌwal ay haDiosal?» xhi wetan.
4 Hayet chinnanitijan hunteqꞌan tiꞌ,
chiꞌok bꞌiskꞌulal yinh wanmahan, chinnatijan yet ayinan xol anma,
chiwijbꞌantojan yul Yatut Komam Dios.
Sunil mak chiꞌawi yinh kaw ip yu tzalahilal,
chaqꞌni yuchꞌandiosal tet Komam hakaꞌ tiꞌ:
«Tzet saqꞌal yinh huneꞌ tzꞌayik tiꞌ,» xhixanhe anma.
5 ¿Tzet yinh yuxin chikabꞌkonkanh wanmahan?
¿Tzet yinh xin kaw chiwakanikojan yinh inkꞌulan?
Wal xin haꞌ Komam Dios ayko yipo wanmahan,
yuto chito inbꞌitnhehan isbꞌi Komam.
¡Haꞌ Komam inDiosalan yebꞌ inKolomalan!
6 Walnipaxojan tet Komam: «Hach inDiosalan, kaw chiwabꞌehan bꞌiskꞌulal yinh wanmahan, yuxin chaxhinnatijan yet ayinan yul ismajul txꞌotxꞌ ayayo istiꞌ haꞌ Jordán, yebꞌ bꞌey witz Hermón yebꞌ wonhan Mizar,» kinchihan.
7 Kaw chiꞌabꞌelax isbꞌili ha haꞌ yulaj nimeta xabꞌ,
haꞌ ton haꞌ nimeta haꞌ chitit satla pahaw.
Nanxa islow ishowal ha haꞌ yati Komam, ekꞌto xin haꞌ wibꞌanhan.
8 Yet tzꞌayikal chayo Komam iskꞌulal iskꞌul wibꞌanhan.
Haxa yet aqꞌbꞌalil, mach chinbꞌejan inbꞌitnhenan Komam,
mach chinbꞌejpaxojan intxahlihan tet Komam, isDiosal inkawilan.
9 Chiwalnihan tet Komam Dios:
«Hach inKolomalan,b ¿tzet yinh yuxin makinhanahulnhekantojan?
¿Tzet yinh yuxin chꞌok bꞌiskꞌulal yinh inkꞌulan,
kat wokpaxojan yinh kꞌaykꞌulal yu ebꞌnaj ayko ishowal winhan?» kinchihan.
10 Kaw chiwabꞌehan isyaꞌil, hakaꞌtanhe chimaqꞌlaxpoho inbꞌajilan
yet chinetalaxan yu ebꞌnaj ayko ishowal winhan,
yuto kaw aynhetikꞌako ebꞌnaj isqꞌambꞌen wetan hakaꞌ tiꞌ:
«¿Bꞌaytuꞌwal ay haDiosal?» xhi ebꞌnaj wetan.
11 ¿Tzet yinh yuxin chikabꞌkonkanh wanmahan?
¿Tzet yinh yuxin chiwako yinh inkꞌulan?
Wal xin haꞌ Komam Dios ayko yipo wanmahan,
yuto chito inbꞌitnhehan isbꞌi Komam.
¡Haꞌ Komam inKolomalan, haꞌ Komam inDiosalan!