Istxah huneꞌ mak yaꞌay
Salmo tzꞌibꞌnhebꞌilkano yu yaꞌ rey David tet naj yahawil yinh isnuqꞌal bꞌit
41
Saqꞌal yet mak chinaniti anma mebꞌaꞌ matzet ayko yipo iskꞌul,yuto Komam Dios chikolni huneꞌ mak tuꞌ yinh istzꞌayikal yet ayko yinh isyaꞌtajil.
2 Haꞌ Komam Jahawil chiꞌilni,
chaqꞌni Komam iskawil yebꞌ tzalahilal tet yul sat yibꞌanhqꞌinal tiꞌ.
Machi xin chisbꞌejtzoko Komam yul isqꞌabꞌ mak ayko ishowal yinh.
3 Haꞌ Komam Jahawil chꞌaqꞌni yip yanma istecha isyaꞌil yu yet hilanto sat txꞌat,
chaqꞌni Komam iskawil, chanhten Komam.
4 Hanintiꞌan xawalan tet Komam hakaꞌ tiꞌ:
«Mam Wahawil, kaw tzꞌayojabꞌ hakꞌul winhan, anhte hinan,
xawako inmulan tawet,» kinchihan.
5 Ebꞌnaj ayko ishowal winhan choche ebꞌnaj istxꞌojal winhan, chalni ebꞌnaj hakaꞌ tiꞌ:
«¿Bꞌaqꞌinh chikam huneꞌ naj tiꞌ kat istanhkanilo isbꞌi naj?» xhi ebꞌnaj.
6 Chul ebꞌnaj kinyilaꞌan, yajaꞌ mach yinh sunilo yanma ebꞌnaj.
Sunil tzet chiliko ebꞌnaj winhan chiskꞌubꞌa ebꞌnaj yinh isnabꞌal,
haxa yet chiꞌelto ebꞌnaj yul bꞌeh kat yok ebꞌnaj yalnokꞌoj.
7 Ebꞌnaj ayko ishowal winhan chiskutxbꞌa isbꞌa ebꞌnaj,
kat yok ebꞌnaj tzotelo winhan, chistxumni ebꞌnaj ta yu inmulan,
yuxin chinekꞌyaꞌan.
8 Chalni ebꞌnaj hakaꞌ tiꞌ: «Huneꞌ yabꞌil ayko yinh huneꞌ naj tiꞌ,
tit tet ischejabꞌ naj machiswalil; wal tinanh matokano naj sat pop,
matxa xin chiꞌahwanoj,» xhi ebꞌnaj.
9 Hakpax tuꞌ naj kaw wamigohan,
naj bꞌay chitikꞌa kawxi inkꞌulan,
naj huneꞌnhe chiwaꞌ yebꞌ hinan, tit naj, ismeltzoko naj winhan.
10 Yajaꞌ wal hach tiꞌ Mam Wahawil,
chitzꞌay hakꞌul winhan, anhte hinan, kat wahwanojan sat inpopan,
kat xin inpajtzenan tet ebꞌnaj.
11 Haꞌ yinh tiꞌ xin chintxumilojan ta chitzala hakꞌul winhan,
yu matxa chibꞌitni ebꞌnaj ayko ishowal winhan yu tzalahilal ta xaqꞌoji ebꞌnaj winhan.
12 Wal hinan Mamin, mach inmulan yul hasat,
aqꞌinikojan yul haqꞌabꞌ, ayinnhehojabꞌikojan yinh hasat.
13 ¡Jalaꞌwe tzotiꞌ kꞌul yinh Komam Jahawil tinanh,
yebꞌ yinh sunilbꞌal ej tiempo! Komam isDiosal konhobꞌ Israel.
¡Yubꞌojabꞌi! ¡Yubꞌojabꞌi!