Tzalahilal yu iskolwal Komam Dios
Salmo tzꞌibꞌnhebꞌilkano yu yaꞌ rey David tet naj yahawil isnuqꞌal bꞌit
40
Kaw niman wute inkꞌulan wechmahan iskolwal Komam Jahawil,ishajbꞌan Komam istxikin, yabꞌen Komam wawihan.
2 Kinyihtijan Komam yul huneꞌ holana kaw aykano ismay,
kinyihtijan Komam xol tzꞌotzꞌew kaw nahat yehayto yich.
Kinislinhbꞌanikojan Komam yibꞌanh huneꞌ niman chꞌen,
istoholbꞌanheniko Komam wojan.
3 Yaniko Komam akꞌ bꞌit yul intiꞌan, inbꞌitnhenan isbꞌi koDiosal.
Kaw xin txꞌiꞌal mak chiꞌilni huneꞌ tiꞌ kat isxiwkanh,
chiyaniko Komam Dios yipo yanma.
4 ¡Saqꞌal yet naj winaj chikawxi iskꞌul yinh Komam,
yebꞌ mak mach chako isbꞌa xol ebꞌnaj chiyikanh isbꞌa,
yebꞌ xol mak chiꞌoktzujno yinta leqꞌtiꞌal!
5 Mam Wahawil, hach inDiosalan, hantaxa iskꞌulal xahawatxꞌe,
yebꞌ hanta iskꞌulchꞌanil hakꞌul chayelo jinhanh, machi hunu mak hakaꞌ hach.
Chiwochehan chiwalikꞌojan hakꞌulal tuꞌ,
yajaꞌ kaw mach chinqꞌojihan inbꞌisnihan yuto kaw txꞌiꞌalkanoj.
6 Mach chaxhtzala yinh ej xahanbꞌal yebꞌ yebꞌalqꞌabꞌe chiꞌaqꞌlax tawet,
mach chaqꞌanpaxo ej no noqꞌ chinhuslax yinh xahanbꞌalil yunhe yinilo ismul anma,
wal xin haj intxikinan,b
7 yu huneꞌ tuꞌ yuxin walan hakaꞌ tiꞌ: «Mamin, ayinan lah,
yijabꞌ isbꞌa winhan hakaꞌ tzet tzꞌibꞌnhebꞌilkano winhan yul hum.
8 Mamin, hach inDiosalan, kaw chintzalahan chinyijenan tzet choche hakꞌul.
Kaw chinkꞌubꞌahan chejbꞌanile yiktabꞌal wanmahan.»c
9 Mam Wahawil, kaw hawohtaj ta mach kinkantuknojan,
wal xin walikꞌojan istoholal sata hakonhobꞌ kaw nimajalkanoj.
10 Mach kinok tuknojan sata istoholal hawatxꞌe,
wal xin walikꞌojan ta chawatxꞌe tzet chawala, yebꞌ kolbꞌanile chawaqꞌa.
Mach hunelo tiꞌ webꞌahan sata hakonhobꞌ iskꞌulchꞌanil hakꞌul yebꞌ isyelal chawala.
11 Mam Wahawil, mach chamanhkꞌoto iskꞌulchꞌanil hakꞌul winhan.
Haꞌojabꞌ iskꞌulchꞌanil hakꞌul yebꞌ isyelal chinilnihan yinh sunilbꞌal ej tiempo.
12 Hantaxa isyaꞌtajil xahul wibꞌanhan, matxa chinqꞌojihan inbꞌisnihan.
Lanhan wekꞌyaꞌan yu inmulan wakojan, lanhanxa istanhpaxilo inmujlubꞌalan.
Ekꞌbꞌal isbꞌisil isyaꞌtajil xahul wibꞌanhan sata isbꞌisil xil inwiꞌan.
Kaw matxa yip wanmahan chiwabꞌehan.
13 Mam Wahawil, kaw chinqꞌanan tawet, hulanh kinhakoloꞌan.
Mam Wahawil, ako yinh hakꞌul hawul yinh anhe, kat hakolwa winhan.
14 Haꞌ mak choche kinistanhtzelojan, elojabꞌkano ispixan,
kat xin issomchakanh yul iswiꞌ.
Haꞌ mak choche iswatxꞌeꞌ istxꞌojal winhan, elojabꞌkanh yu txꞌixwilal.
15 Ebꞌnaj chibꞌuchwa winhan elojabꞌpaxkanh ebꞌnaj yu txꞌixwilal.
16 Yajaꞌ wal sunil mak chaxhsayni kaw tzalahojabꞌi.
Sunil mak chiꞌechman kolbꞌanile yalabꞌ yinh sunilbꞌal ej tiempo:
«Komam Jahawil, kaw niman yelapnoj,» xhihojabꞌi.
17 Mam Wahawil, hanintiꞌan kaw kꞌanchꞌan hinan, yebꞌ kaw ay inbꞌiskꞌulalan,
mach chinhanahulnhetojan. Hachnhechꞌan chu hakolwa winhan yebꞌ chu kinhakolnihan.
¡Mamin, hach inDiosalan, kolwahanh yinh anhe!d