Chiqꞌanlax kolbꞌanile tet Komam
Salmo tzꞌibꞌnhebꞌilkano yu yaꞌ rey David tet naj yahaw isnuqꞌal bꞌit
70
Mam Wahawil, kaw chinqꞌanan tawet,hulanh kinhakoloꞌan.
Ako yinh hakꞌul hawul yinh anhe, kat hakolwa winhan.
2 Haꞌ mak choche kinistanhtzelojan, elojabꞌkano ispixan,
yebꞌ xin somchahojabꞌkanh yul iswiꞌ.
Haꞌ mak choche iswatxꞌeꞌ istxꞌojal winhan, elojabꞌkanh yu txꞌixwilal.
3 Ebꞌnaj chibꞌuchwa winhan elojabꞌpaxkanh ebꞌnaj yinh txꞌixwilal.
4 ¡Yajaꞌ wal sunil mak chaxhsayni kaw tzalahojabꞌi!
Sunil mak chiꞌechman kolbꞌanile yalabꞌ yinh sunilbꞌal ej tiempo:
«¡Komam Jahawil, kaw niman yelapnoj!» xhihojabꞌi.
5 Mamin, Dios hach, hanintiꞌan kaw kꞌanchꞌan hinan,
yebꞌ kaw ay inbꞌiskꞌulalan, hulanh yinh anhe.
Hachnhechꞌan chu hakolwa winhan yebꞌ chu kinhakolnihan.
¡Mam Wahawil, kolwahanh yinh anhe!a