Huneꞌ niman aw yet bꞌiskꞌulal
Salmo tzꞌibꞌnhebꞌilkano yu yaꞌ rey David, tet naj yahawil isnuqꞌal bꞌit, yibꞌanh teꞌ Lirios
69
¡Mamin, hach inDiosal, kolinan yuto lanhan inhiqꞌnitojan ha haꞌ!2 Lanhan intosutsunan yich huneꞌ niman tzꞌotzꞌew kaw nahat yehayto yich.
Machi bꞌay kꞌul wanayo wojan.
Kaw lanhan intokanojan yich ha haꞌ chiwabꞌehan, kat kinyijnitojan yojomal haꞌ.
3 Kaw sikom inxahan wawihan, kaw tajinxa yul innuqꞌan.
Kaw matxa yip isbꞌaqꞌ insatan yu wechmanan Komam Dios, inDiosalan.
4 Kaw txꞌiꞌal mak tonhe ayko ishowal winhan, machi xin inmulan tet,
ekꞌbꞌal isbꞌisil ebꞌnaj sata isbꞌisil xil inwiꞌan.
Kaw chiꞌahkanokanh yip ebꞌnaj ayko ishowal winhan,
ebꞌnaj chiyoche kinistanhtzelojan yinh isnabꞌnhehal.
¿Tom xin chintohlahan tzet mach elqꞌabꞌilo wuhan?a
5 Mamin, hach inDiosal,
kaw hawohtaj issukal chinwatxꞌehan,
mach chu webꞌan inmulan tasataj.
6 Mamin, Yahawil yinh sunil.
Machojabꞌ chikan yinh txꞌixwilal yu inmulan makta chikawxi iskꞌul tawinh, hach isDiosal Israel.
Machojabꞌ chisomchakanh yul iswiꞌ makta chaxhsayni.
7 Mamin, yu ayko wanmahan tawinh yuxin chiwaqꞌtechahojan bꞌahwal tzotiꞌ,
kaw chinalaxikojan yinh txꞌixwilal.
8 Hakaꞌtanhe mach ohtabꞌilo hinan,
yebꞌ hakaꞌ komon anma chinutelaxan yu wuxhtajan.
9 Kaw ayko yinh wanmahan inyaꞌilnhenan hawatut,
yuto kaw xahan ay wuhan.
Hayet chaxhbꞌahlaxi han huninan chiꞌaqꞌlax tako inkꞌulan.b
10 Hayet chinoqꞌan yebꞌ yet mach chinwaꞌan yu winayo hinbꞌahan tawet,
chitzebꞌi anma winhan.
11 Yet wanikojan xil inqꞌapan yet bꞌiskꞌulal,
sunil anma tzebꞌi winhan.
12 Ayinnhetikꞌaltijan yul istiꞌ anma,
hakpax tuꞌ ebꞌnaj ukꞌum teꞌ,
kinyaqꞌ bꞌinahojan ebꞌnaj yinh isbꞌit,
istzebꞌipaxo ebꞌnaj winhan.
13 Yajaꞌ wal hinan Mam Wahawil,
tawet chintxahlihan yu iskꞌulal hakꞌul.
Yu hanta chitzꞌay hakꞌul, yuxin chachkolwahi, Mamin,
yu isyelal kolbꞌanile chawaqꞌa, abꞌe tzet chinqꞌanan tawet.
14 Iqꞌinahtijan xol tzꞌotzꞌew. Machojabꞌ chintokanojan yich tzꞌotzꞌew.
Kolinilojan yul isqꞌabꞌ ebꞌnaj chichiwako iskꞌul winhan,
yunhe mach chintokanojan yich haꞌ nime haꞌ.
15 Mach chinhachah yijaꞌtojan yojomal ha haꞌ.
Machojabꞌ chintokanojan yich nimeta xabꞌ, kat inmujitojan yalanh.
16 Mam Wahawil, pajtze tzet chinqꞌanan tawet,
hach tiꞌ kaw kꞌulachkanoj yebꞌ kaw xahan ayinan hawu.
Okanh tꞌanhno winhan yu hanta iskꞌulal hakꞌul.
17 Hanin hachejabꞌ intiꞌan,
mach chinhawintanhekaniltojan,
pajtze tzet chinqꞌanan yinh anhe,
yuto kaw ayayo ej isyaꞌtajil wibꞌanhan.
18 ¡Mamin, hitzanhiko inkꞌatanhan,
kat kinhakolnihan!
¡Kolinilojan yul isqꞌabꞌ ebꞌnaj ayko ishowal winhan!
19 Hawohta tzet chu yaqꞌlax tako inkꞌulan,
yebꞌ tzet chu wetalaxan yebꞌ tzet chu yilaxilo inpixanan.
Hawohtaj mak anmahil ebꞌnaj ayko ishowal winhan.
20 Sunil takkꞌulal aqꞌlax wilaꞌan,
lanhan yetanto wanmahan. Matxa nino tzalahilal yinh wanmahan.
Insayan mak chitzꞌay nino iskꞌul winhan,
kat yaqꞌni yaqꞌlobꞌal inkꞌulan, yajaꞌ machi maka.
21 Yet kaw kinnhochahan, aqꞌlax kꞌahla tzet ye tuꞌ wetan.
Hayet istaj intiꞌan, pahla vinagre aqꞌlax wukꞌuꞌan.
22 Haꞌ nime qꞌinh yet wah chiyekꞌtze ebꞌnaj meltzohojabꞌiko yinh latzꞌabꞌil bꞌay chiꞌaykꞌay ebꞌnaj.
23 Aqꞌ tanho ismujlubꞌal ebꞌnaj, kat ismeltzoko ebꞌnaj tzꞌopsatil.
Tonhehojabꞌ chichuychon yoj ebꞌnaj.
24 Ayo hahowal yibꞌanh ebꞌnaj.
Tzujchahojabꞌayo ebꞌnaj yu hahowal.
25 Kaw tzꞌinanojabꞌ chiꞌelkaniko ispalacio ebꞌnaj.
Matxahojabꞌ hunu mak chiꞌehayo yul yatut ebꞌnaj.
26 Haꞌ mak chawayo isyaꞌtajil yibꞌanh,
kaw chislahiko ebꞌnaj yaqꞌni ekꞌoyaꞌ yanma,
kat yok ebꞌnaj bꞌuchwal yinh mak chawako islahwilal.
27 ¡Haꞌojabꞌ istxꞌojal chiswatxꞌe ebꞌnaj,
haꞌtikꞌa chawaqꞌ ispajo tet ebꞌnaj.
Machojabꞌ chꞌok ebꞌnaj xol istoholal chawatxꞌe!
28 ¡Hokanh isbꞌi ebꞌnaj yul teꞌ hum yet kawile!
¡Mach chawako isbꞌi ebꞌnaj yinh istxolal isbꞌi anma chiwatxꞌen istoholal!c
29 Hanintiꞌan kaw yaꞌay hinan, yebꞌ kaw bꞌiskꞌulal wehan.
Mamin, hach inDiosalan, iqꞌinkanhan, kat kinhakolnihan.
30 Chinbꞌitnhehan isbꞌi Komam yu tzalahilal.
Chiwakojan ismay Komam yu ej bꞌit chiwakojan tet Komam.
31 Kaw xin ekꞌna chitzala Komam sata waqꞌnihan hunu noꞌ wakax yinh xahanbꞌalil,
maka hunu noꞌ tzehla wakax yebꞌ yukꞌaꞌ yebꞌ yisqꞌaj.
32 Hayet chiꞌil-lax huneꞌ tiꞌ,
kaw chitzalakanh iskꞌul makta bꞌiskꞌulal yehi,
kat yiqꞌni yip yanma makta chisayni Komam.
33 Yuto chabꞌe Komam tzet chisqꞌan anma mebꞌaꞌ.
Mach xin chiyintanhekanilto Komam makta yetxa Komam ayko preso.
34 ¡Sunilojabꞌ tzet ay yul satkanh bꞌitnojabꞌ tet Komam,
yebꞌ sunil tzet ay sat txꞌo txꞌotxꞌ yebꞌ xol haꞌ mar!
35 Haꞌ Komam chikolnilo konhobꞌ Sión,
kat iswatxꞌenkanh Komam ej konhobꞌ ay yul ismajul Judá,
kat yehayo anma yul konhobꞌ tuꞌ, kat yokkano txꞌotxꞌ yu.
36 Haꞌ yuninal ischejabꞌ Komam chiꞌok hunteqꞌan konhobꞌ tuꞌ ismajuloj.
Haꞌ mak chitzala yinh isbꞌi Komam,
haꞌ chiꞌehayo sat txꞌotxꞌ.d