IsDiosal Sinaí yebꞌ Yatut Komam xol anma Israel
Salmo tzꞌibꞌnhebꞌilkano yu yaꞌ rey David tet naj yahawil isnuqꞌal bꞌit
68
Mamin, ahanhwano, sajlemojabꞌto ebꞌnaj ayko ishowal tawinh.Elojabꞌkanh ebꞌnaj chichiwa iskꞌul tawinh tasataj.
2 Hakaꞌ chu iskꞌaykanh nhubꞌ yu jaqꞌeqꞌ,
hak tuꞌ chu iskꞌayilo ebꞌnaj.
Hakaꞌ chu yulikanh noꞌ ixkabꞌ yu qꞌaꞌ,
hak tuꞌ chu istanhilo ebꞌnaj txꞌoj sata Komam Dios.
3 Yajaꞌ wal ebꞌnaj chiwatxꞌen istoholal,
kaw tzalahilalnhetikꞌa ye ebꞌnaj.
Kaw nohnanhetikꞌa yanma ebꞌnaj yu tzalahilal sata Komam Dios.
¡Kaw chꞌah tꞌujla ebꞌnaj yu tzalahilal!
4 Bꞌitnhewe isbꞌi Komam Dios, bꞌitnhewe salmo tet Komam.
Iwekanh isbꞌi Komam chꞌekꞌ yulaj satkanh.
Komam Jahawil isbꞌi. Tzalahanhwe sata Komam.
5 Komam Dios ismam makta matxa ismam yebꞌ matxa ismiꞌ.
Haꞌ Komam chikolwa yinh ebꞌix hunix.
Aykꞌo Komam yul yatut, huneꞌ nha kaw mach istxꞌojal yinh.
6 Haꞌ mak bꞌejbꞌilkanoj, chaqꞌ Komam bꞌay chiꞌehi.
Haꞌ mak ayko preso, chiskolilo Komam kat yaqꞌni Komam iskꞌulal tet.
Yaj wal ebꞌnaj manhkꞌom, chꞌehayo ebꞌnaj sat txꞌo txꞌotxꞌ bꞌay mach chaqꞌ sat tzꞌunubꞌ.
7 Mamin, hach koDiosalanh, yet hawekꞌ sata hakonhobꞌ yet yekꞌ bꞌey txꞌotxꞌ desierto,
8 isbꞌili txꞌotxꞌ, istit haꞌ nhabꞌ yul satkanh,
isbꞌili witz Sinaí tasataj, hach isDiosal anma Israel.
9 Mamin, hach koDiosalanh, kaw niman haꞌ nhabꞌ hawatij yu ischakꞌanbꞌi sat txꞌotxꞌ.
Hayet matxa yip txꞌotxꞌ ismunlahi hawaqꞌni yip txꞌotxꞌ hunelxa.
10 Haꞌ xin sat txꞌotxꞌ tuꞌ ehayo hakonhobꞌ,
yu iskꞌulchꞌanil hakꞌul hawaqꞌnipaxo tzet chiꞌokniko yu anma mebꞌaꞌ.
11 Yet chaqꞌni Komam Istzotiꞌ, txꞌiꞌal ebꞌix halnikꞌo hakaꞌ tiꞌ:
12 «Elkanh ebꞌnaj yahawil ej konhobꞌ yebꞌ ebꞌnaj aqꞌom howal,» xhi ebꞌix.
Wal ebꞌix ix aykano yul nha, ispohkanh ebꞌix yinh tzettaj isbꞌejkano ebꞌnaj,
13 haꞌ ton hunteqꞌan yechel noꞌ kuwis ayko plata yinh xikꞌ,
haꞌ xil noꞌ xin qꞌantzaqꞌtzonhe yu chꞌen oro kaw kꞌul.
Yajaꞌ ay ebꞌnaj kankano xol noꞌ meꞌ,a
14 yet issajlemito ebꞌnaj yahaw konhobꞌ yu Komam,
Komam kaw aykano yip, lahan hakaꞌ yet ayayo chꞌen chew bꞌey witz Salmón.b
15 Kaw nahat yekanokanh hunteqꞌan witz ay bꞌey txꞌotxꞌ Basán.
Kaw nahat yekanokanh iswiꞌ hunteqꞌan witz tuꞌ.
16 Hex ay hex iswiꞌla hunteqꞌan witz kaw nahat yekanh tuꞌ.
¿Tzet yinh yuxin kaw ayko hehowal yinh huneꞌ witz yet Komam yehi,
huneꞌ sikꞌbꞌililo yu Komam yu yok yetoj?
Wal xin haꞌ bꞌey tuꞌ ay Komam yinh sunilbꞌal ej tiempo.
17 Mach isbꞌi hanta isbꞌisil iscarruaje Komam yet howal.
Haꞌ bꞌey witz Sinaí, haꞌ tuꞌ tit Komam yul iscarruaje,
yapni Komam bꞌey yatut.c
18 Nahat kaxhah Mamin, hawinito makta preso yehi.
Alaxiko hamay yu ebꞌnaj winaj, yinipaxayo isbꞌa ebꞌnaj manhkꞌom tawet.d
19 ¡Kaw niman yelapno Komam!
¡Hunun tzꞌayik yaqꞌni iskꞌulal jet,
haꞌ Komam koDiosal yebꞌ koKolomal!
20 Haꞌ Komam Dios, koDiosal haꞌ chonhkolni.
Haꞌ Komam Jahawil chonhkolni yul isqꞌabꞌ kamikal.
21 Haꞌ Komam chiqꞌaxponto iswiꞌ ebꞌnaj ayko ishowal yinh Komam,
yebꞌ makta chislahiko yaniko ismul.
22 Haꞌ Komam halni hakaꞌ tiꞌ: «Haꞌ bꞌey txꞌotxꞌ Basán chexwaqꞌ meltzohojan.
Haꞌ bꞌey isqꞌaxebꞌikꞌto haꞌ mar nahat yehayto yich chexwaqꞌtijan,e
23 yuto kajyolyonhe chiꞌeliko heyoj yu ischikꞌil ebꞌnaj yako ishowal teyinh.
Hakpax tuꞌ hetxꞌiꞌ, kajyolyonhe chꞌelkaniko yaqꞌ metx yu isleqꞌni ischikꞌil ebꞌnaj,»f xhi Komam.
24 ¡Mamin, hach inDiosalan yebꞌ Wahawilan,
il-lax isto bꞌulbꞌon anma yul bꞌeh chiꞌapni hawatut!
25 Bꞌabꞌel ebꞌnaj chibꞌitni,
tzujan ebꞌnaj chiꞌaniko teꞌ arpa yebꞌ teꞌ lira.
Haxa xolbꞌal ebꞌnaj tuꞌ ayko ebꞌix qꞌopo, chiyaniko ebꞌix pandereta.
26 ¡Sunil hex kutxanexikoj, halwe kꞌul-la tzotiꞌ yinh Komam Dios,
sunil hex titna yinh yaꞌ Israel!
27 Sata sunil anma tuꞌ ayko hunmajan anma titna yinh yaꞌ Benjamín, yaꞌ islahobꞌal unin.
Aypaxiko txꞌiꞌal ebꞌnaj iswiꞌehal titna yinh yaꞌ Judá,
yebꞌ ebꞌnaj iswiꞌehal yeko yinh ebꞌnaj Zabulón yebꞌ ebꞌnaj iswiꞌehal yeko yinh ebꞌnaj Neftalí.g
28 Mamin, hach inDiosalan, yelo hawip tinanh,
hakaꞌ tzet hawatxꞌe jinhanh yet yalanhtokanoj.
29 Yuto kaw kꞌulchꞌankano hawatut bꞌey Jerusalén,
yuxin chiyiti ebꞌnaj rey sabꞌehal tawet.
30 Chawayo isyaꞌtajil yibꞌanh ebꞌnaj chiskutxbꞌa isbꞌa yinh howal,
masanto chiyiyo isbꞌa ebꞌnaj, kat yinito ebꞌnaj chꞌen plata tawet.
¡Hunteqꞌan ebꞌnaj tuꞌ, kaw txꞌiꞌal ebꞌnaj,
hakaꞌ noꞌ winaj wakax yebꞌ lahan hakaꞌ noꞌ tzehla wakax ay yulaj konhobꞌ.
Mamin, tanhtzelo ej konhobꞌ chitzala yinh howal!
31 Bꞌey Egipto chitit ebꞌnaj iswiꞌehal konhobꞌ,
yebꞌ ebꞌnaj ah Etiopía chitit ebꞌnaj yinh anhe,
kat ismohbꞌankanh isqꞌabꞌ tawet Mamin.h
32 ¡Hex yahaw hex konhobꞌ sat txꞌo txꞌotxꞌ tiꞌ,
bꞌitnanhwe tet Komam Dios, aweko bꞌit tet Komam Jahawil.
33 Komam chꞌekꞌ yibꞌanhahto satkanh ayxatikꞌa yet payat!
Haꞌ Komam chaqꞌ ohtanhelo yul isnuqꞌ huneꞌ kaw ay yip.
34 Ohtanheweloj ta kaw ay yip Komam,
kaw sunil yibꞌanh konhobꞌ Israel tiꞌ chisye Komam huneꞌ niman ismunil kaw ay yelapnoj.
Aypaxo yip Komam yul satkanh.
35 Mamin, hach koDiosalanh, hayet ayach yul hawatut kaw chikꞌaykano kokꞌulanh.
Haꞌ Komam isDiosal konhobꞌ Israel, chaqꞌni yip yebꞌ kawil tet iskonhobꞌ Israel.
¡Hal-laxojabꞌ kꞌul-la tzotiꞌ yinh Komam!