Istxah huneꞌ naj icham winaja
71
Mam Wahawil, hachnhechꞌan chachinsayikꞌojan yu hakolwa winhan.Machojabꞌ hunelo chꞌel inpixanan.
2 Kolwahanh winhan, kolinilojan yu istoholal chawatxꞌe.
Abꞌe tzet chiwalan, kat kinhakolnihan.
3 Hach tiꞌ lahan hach hakaꞌ hunu chꞌen nime chꞌen bꞌay chinkol hinbꞌahan,
bꞌay chilannhetikꞌa webꞌan hinbꞌahan.
Hawaqꞌkano chejbꞌanile, yunhe kiniskolnihan.
Hach tiꞌ, hach innhachꞌenan yebꞌ incuartelan.b
4 Mamin, hach inDiosalan, kolinan yul isqꞌabꞌ ebꞌnaj chiwatxꞌen istxꞌojal,
yebꞌ ebꞌnaj mulum, yebꞌ yul isqꞌabꞌ ebꞌnaj potxꞌom anma.
5 Mam Wahawil, hachnhechꞌan ayachiko yipo wanmahan,
kaw tꞌinhan wehikojan yul haqꞌabꞌ yettaxtikꞌa tzeh hinan.
6 Yettaxtikꞌa maxhto chinpitzkꞌahan,
tawinh wiqꞌ wipan.
Hak tuꞌ el yinh hakꞌul, yuxin kinpitzkꞌahan yinh inmiꞌan.
Yu huneꞌ tuꞌ xin chachinbꞌitnhehan sunilbꞌal ej tiempo.
7 Txꞌiꞌal mak chikꞌay iskꞌul yilni tzet wehikojan,
yuto hachnhetikꞌa chinhakolilojan, yu kaw aykano hawip.
8 Bꞌitnhehojabꞌnhetikꞌa chꞌelti yul intiꞌan.
Hununojabꞌ tzꞌayik wanikojan hamay.
9 Machojabꞌ chinhanahulnhetojan yet icham inxahan.
Machojabꞌ chinhabꞌejkanojan yet matxa wipan.
10 Yuto ebꞌnaj ayko ishowal winhan,
chitzotel ebꞌnaj winhan, chislahtiꞌnhen isbꞌa ebꞌnaj kinispotxꞌnikamojan.
11 Chalni ebꞌnaj hakaꞌ tiꞌ:
«Bꞌejbꞌilxakano huneꞌ naj tiꞌ yu Komam Dios,
tzumbꞌewekꞌoj, kat hetzabꞌnayoj,
yuto matxa mak chikolnilo naj,» xhi ebꞌnaj.
12 ¡Mamin, hach inDiosalan, mach chachhitzilo inkꞌatanhan!
¡Hulanh yinh anhe, kat hakolwa winhan!
13 Sunil ebꞌnaj ayko ishowal winhan kanojabꞌkano ebꞌnaj yinh txꞌixwilal, tanhojabꞌilo ebꞌnaj.
Ebꞌnaj chiyoche kinyaqꞌakojan yinh isyaꞌtajil,
okojabꞌkano ebꞌnaj yinh txꞌixwilal yebꞌ yinh kꞌaykꞌulal.
14 Yajaꞌ wal hanintiꞌan Mamin,
sunilbꞌal tiempo ayinikojan kach wechmanan,
yebꞌ xin chilannhetikꞌa kach inbꞌitnhenan.
15 Chinpujbꞌakꞌojan istoholal hakꞌulal hawatxꞌe winhan,
yebꞌ sunilbꞌal tzꞌayik chiwalikꞌojan kolbꞌanile hawaqꞌa.
Mach chiqꞌoji innabꞌalan isbꞌisni hakꞌulal.
16 Chiwalikꞌojan sunil tzet kaw ay yelapno hawatxꞌe.
Chiwalikꞌojan tato hachnhechꞌan chawatxꞌe istoholal.
17 Mamin, hach inDiosalan,
hataxtikꞌa yet tzeh hinan kinhakuynikanojan.
Haꞌ tinanh xin ayinnhetikꞌakojan walnihan iskꞌulchꞌanil hawatxꞌe.
18 Mamin, hach inDiosalan,
machojabꞌ chinabꞌejkanojan yet kaw icham inxahan,
yet kaw sajxa sunil xil inwiꞌan.
Yuto kaw ayto tzet chito walikꞌojan yinh tzettaj kaw ay yelapno hawatxꞌe tet anma tiꞌ,
yebꞌ tet anma chitohuli.
19 Mamin, haꞌ istoholal chawatxꞌe kaw nimankanoj,
masanta chiꞌapni satkanh.
¡Kaw hantanhekano tzet kaw aykano yelapno hawatxꞌe!
¡Mamin, machi hunu mak hakaꞌ hach tiꞌ!
20 Waxanhka kaw txꞌiꞌal ej bꞌiskꞌulal yebꞌ isyaꞌtajil chawaqꞌ wilaꞌan,
yajaꞌ chawaqꞌ inkawilan hunelxa.
Chinhawihtijan yul xabꞌ ay sat txꞌo txꞌotxꞌ.
21 Kaw chawaqꞌ tzet kaw ay yelapno wetan,
kat hawaqꞌni yaqꞌlobꞌal wanmahan hunelxa.
22 Wal hanintiꞌan chachinbꞌitnhehan yebꞌ teꞌ salterio.
Mamin hach inDiosalan chinbꞌitnihan yebꞌ teꞌ arpa.
Machi nino istxꞌojal tawinh, hach isDiosal ebꞌnaj Israel.
23 Kaw chitzala intiꞌan kach inbꞌitnhenan yebꞌ wanmatiꞌan,
yuto hach kinhakolan.
24 Chiwalnipaxojan yinh sunilbꞌal tzꞌayik tato hach tiꞌ istoholalnhe chawatxꞌe.
Sunil ebꞌnaj yoche kinyilaꞌan yinh isyaꞌtajil,
xakankano ebꞌnaj yinh txꞌixwilal yebꞌ yinh kꞌaykꞌulal.