Yet chiꞌok hunu yaꞌ rey kaw tohol isbꞌeybꞌal yinh reyal
Salmo tiꞌ tzꞌibꞌnhebꞌilkano tet yaꞌ rey Salomón
72
Mamin, hach inDiosalan,aqꞌ iskꞌulal hanabꞌal tet yaꞌ rey,
kat hawaqꞌni hatoholal tet iskꞌahol yaꞌ.
2 Haxinwal yinh istoholal chiyil yaꞌ tzet chiꞌeliko hakonhobꞌ,
kat iswatxꞌen yaꞌ istoholal yinh makta chiꞌekꞌyaꞌ.a
3 Ayojabꞌ aqꞌankꞌulal yebꞌ istoholal yul konhobꞌ.
Yaqꞌabꞌ ej witz aqꞌankꞌulal tet konhobꞌ,
kat yaqꞌni wonhan istoholal.
4 Haꞌ istoholal chiswatxꞌe yaꞌ rey tuꞌ yinh anma chꞌekꞌyaꞌ,
kat iskolni yaꞌ yuninal makta ayko yinh manhtzetal,
kat isxanhnikanayo yaꞌ makta mach kꞌulo chil yet anmahil.
5 Sunilojabꞌ tiempo chixiw anma tawet,
yulbꞌal ay tzꞌayik yebꞌ ixahaw.
6 Lahanojabꞌ yaꞌ rey tuꞌ hakaꞌ haꞌ nhabꞌ chꞌay yibꞌanh teꞌ telaj kꞌupbꞌilxakanh,
yebꞌ hakaꞌ yal chew chꞌay yibꞌanh txꞌo txꞌotxꞌ.
7 Hayet chiꞌok yaꞌ yahawilo tuꞌ,
kaw aykano aqꞌankꞌulal yebꞌ istoholal,
hak tuꞌ chu masanta matxa ixahaw.
8 ¡Chiꞌok yaꞌ rey yahawilo yinh sunil konhobꞌ ayko istiꞌla haꞌ mar,
masanta chꞌapni istiꞌ hunxa haꞌ mar,
kat yichipaxti yinh haꞌ niman Éufrates,
masanta yinh islahobꞌal sunil yul sat yibꞌanhqꞌinal tiꞌ!b
9 Sunil makta ay bꞌey txꞌotxꞌ desierto chiyiyo isbꞌa tet yaꞌ.
Wal mak ayko ishowal yinh yaꞌ xin pojoj chisleqꞌa.
10 Ebꞌnaj rey ay bꞌey txꞌotxꞌ Tarsis,
yebꞌ ebꞌnaj rey yinh ej konhobꞌ ayko istiꞌla haꞌ mar,
chul ebꞌnaj kat yaqꞌni ebꞌnaj issabꞌehal tet yaꞌ rey tuꞌ.
Hakpax tuꞌ ebꞌnaj rey ay bꞌey txꞌotxꞌ Sabá yebꞌ Seba chul ebꞌnaj kat yaqꞌnipaxo ebꞌnaj issabꞌehal tet yaꞌ.
11 Sunil ebꞌnaj rey ay yul sat yibꞌanhqꞌinal,
chul ebꞌnaj, kat yay jahno ebꞌnaj sata yaꞌ.
Sunil anma ay yul hunun konhobꞌ chisyije tzet chal yaꞌ.
12 Haꞌ yaꞌ rey tuꞌ, chikolni anma matzet aya chiꞌah yaw tet yaꞌ,
kat iskolnipaxo yaꞌ makta chiꞌekꞌyaꞌ,
machi hunu mak chikolwa yinh.
13 Chitzꞌay iskꞌul yaꞌ yinh anma mebꞌaꞌ yebꞌ yinh mak matzet aya,
kat iskolnipaxo yaꞌ anma mebꞌaꞌ.
14 Haꞌ yaꞌ chikolnilo yul isqꞌabꞌ leqꞌtiꞌal yebꞌ tet mak maqꞌomkamo anma,
yuto haꞌ isqꞌinal hunteqꞌan mak chiꞌekꞌyaꞌ tuꞌ kaw aykano yelapno yul sat yaꞌ.
15 Itzitzojabꞌnhetikꞌa yaꞌ rey tuꞌ,
kat yaqꞌlax chꞌen oro ay bꞌey txꞌotxꞌ Sabá tet yaꞌ,
kat istxahli anma yinh yaꞌ hunun tzꞌayik tet Komam Dios.
Sunilojabꞌ tiempo ayayo iskꞌulal yibꞌanh yaꞌ.
16 Kaw nimanojabꞌ ixim trigo sat txꞌo txꞌotxꞌ.
Kaw tzetkꞌahojabꞌ ixim yinhla istzalanil witz.
Kaw saqꞌal yok yul, kat isbꞌili ixim hakaꞌ bꞌey txꞌotxꞌ Líbano,
kat isxumakli ixim ayko yul konhobꞌ,
hakaꞌ isxumakil teꞌ telaj.
17 Chibꞌinaho isbꞌi yaꞌ yinh sunilbꞌal ej tiempo,
kat isnahlaxti yaꞌ yulbꞌal ay tzꞌayik yul sat yibꞌanhqꞌinal tiꞌ.
Sunil anma ay yul sat yibꞌanhqꞌinal tiꞌ chichahni isyaxilal yu yaꞌ.
Sunil anma ay yul sat yibꞌanhqꞌinal chihalni ta kaw saqꞌal yet yaꞌ.
18 Hal-laxojabꞌ kꞌul-la tzotiꞌ yinh Komam Dios,
Komam yahawil yebꞌ isDiosal anma Israel,
hanhechꞌan chiyeni nimeta kꞌaybꞌalkꞌule.
19 ¡Hal-laxojabꞌ kꞌul-la tzotiꞌ yinh isbꞌi Komam Dios yinh sunilbꞌal ej tiempo!
¡Sunil yul sat yibꞌanhqꞌinal tiꞌ ayayo isqꞌaqꞌal yip Komam!
¡Hakojabꞌ tuꞌ! ¡Hakojabꞌ tuꞌ!
20 Haꞌ bꞌey tiꞌ chilahwi istxah yaꞌ David,
iskꞌahol yaꞌ Isaí.c