LIBRO 3
(Salmos 73–89)
Yinhbꞌal anma txꞌoj
Salmo tiꞌ tzꞌibꞌnhebꞌilkano yu yaꞌ Asafa
73
Yinh kaw yeli kꞌulkano Komam Dios yinh anma Israel,yinh mak sajxa ye yanma.
2 Wal hanintiꞌan kaw nichꞌanxanhe mach kinaykꞌayan,
kaw nichꞌanxanhe mach elto sulna wojan,
3 yuto kaw chíwa inkꞌulan wilnihan yahkanh isqꞌalomal anma kaw loloꞌ yebꞌ kaw txꞌoj.
4 Hunteqꞌan anma tuꞌ mach ayoko yinh iskꞌul ta chikami, yuto kaw kawnhetikꞌa.
5 Machi bꞌay chiꞌekꞌyaꞌ ebꞌnaj hakaꞌ yet anmahil,
mach chaqꞌlepaxo ebꞌnaj isyaꞌtajil hakaꞌ hunteqꞌanxa anma.
6 Yuxin haꞌ isloloꞌal ebꞌnaj hakaꞌ iscorona ebꞌnaj yekoj,
haxa istxꞌojal ebꞌnaj hakaꞌ xil isqꞌap ebꞌnaj yepaxikoj.
7 Kaw nahat yehilti isbꞌaqꞌ sat ebꞌnaj yu bꞌaqꞌichal,
kaw istxꞌojalnhetikꞌa chiꞌekꞌ yinh yanma ebꞌnaj.b
8 Kaw loloꞌ chiyute ebꞌnaj kat isbꞌuchwa ebꞌnaj,
chalni ebꞌnaj txꞌojla tzotiꞌ yet chiswatxꞌen ebꞌnaj istxꞌojal yebꞌ ismachiswalilal.
9 Chibꞌawa ebꞌnaj yinh Komam ay yul satkanh,
kaw loloꞌ chute isbꞌa ebꞌnaj yet chaqꞌni ebꞌnaj chejbꞌanile tet anma.c
10 Yuxin chiyaqꞌ meltzoho Komam Dios iskonhobꞌ bꞌey tiꞌ,
kat yilaxti ha haꞌ yinh kaw niman tet.
11 Chisqꞌambꞌen ebꞌnaj hakaꞌ tiꞌ:
«¿Tom chohtanhelo Komam Dios huneꞌ tiꞌ?
¿Tom chil Komam kaw aykano yip?» xhi ebꞌnaj.
12 Haꞌ ebꞌnaj kaw txꞌoj tiꞌ,
machi hunu tzet ye tuꞌ yul sat yibꞌanhqꞌinal tiꞌ chipitni ebꞌnaj,
wal xin kaw saqꞌal ischꞌibꞌ isqꞌalomal ebꞌnaj.
13 ¡Yinh kaw isyelal hanintiꞌan kaw nabꞌnhe saj wanmahan,
yebꞌ nabꞌnhe kaw kꞌul wute hinbꞌahan!
14 Yuto kaw hunun tzꞌayik wijnihan,
yebꞌ hunun sakꞌayal yay isyaꞌtajil wibꞌanhan.
15 Qꞌinalo ta chiwalan: «Chintzotelan hakaꞌ istzotel ebꞌnaj tuꞌ,» kinokmihan waqꞌaꞌ subꞌchahojan hawuninal.
16 Kaw wochehan intxumilojan huneꞌ tiꞌ,
yajaꞌ xin kaw yaꞌta istxumcha wuhan.
17 Hato xin yet woktojan yul hawatut, Mamin,
istxumcha wuhan yinh tzet chitanhkano ebꞌnaj.
18 Yinh kaw isyelal, hach chawako ebꞌnaj bꞌay kaw yolan,
kat hawaqꞌni aykꞌay ebꞌnaj bꞌay chitanhtzelaxiloj.d
19 ¡Hunepnhechꞌan chawuchkꞌato tzet ay ebꞌnaj!
¡Kat istanhkanilo ebꞌnaj yu xiwkilal!
20 Mamin, hakaꞌ yet chiꞌel kowayanh yet chonhahwanoj,
hak tuꞌ chawute ebꞌnaj yet chachahwanoj,
mach chiyelapno chiꞌelkaniko ebꞌnaj hawu.
21 Kaw ok inhowalan yinh inkꞌulan,
yebꞌ xin kaw yaꞌ yuko yinh wanmahan,
22 yuto kaw lutꞌ wute hinbꞌahan,
yebꞌ mach yu intxumnihan.
Lahan wute hinbꞌahan hakaꞌ hunu no noqꞌ yul hasat.
23 Yajaꞌ ayinnhetikꞌakojan takꞌatanh,
tzabꞌil inwatxꞌqꞌabꞌan hawu.
24 Kinhawijbꞌahan yu kinhakuynihan,
haxa yinh islahobꞌal xin chinhachahan, yinh iskꞌulchꞌanil bꞌay ayach.
25 Machi mak bꞌay wal iskawxi inkꞌulalan yul satkanh, hachnhechꞌan, Mamin.
Tawinhnhe ayko wanmahan, machi hunuxa tzet chiwochehan sat txꞌo txꞌotxꞌ tiꞌ.
26 Haꞌ innimanilan yebꞌ wanmahan chitanhilo chiwabꞌehan,
yajaꞌ hach tiꞌ Mamin, chawaqꞌ yip wanmahan.
Hach inmajulan yinh sunilbꞌal ej tiempo.
27 Kaw yeli haꞌ mak chihitzilo tawinh,
chikami, kat hatanhtzenilo mak chishekꞌilo isbꞌa tawinh.
28 Mamin, yajaꞌ wal hanintiꞌan chinhitzikojan takꞌatanh,
yuto hanhe huneꞌ tuꞌ iskꞌulal. Hach tiꞌ Wahawilan yebꞌ inDiosalan,
hachnhechꞌan ayko yipo wanmahan,
kat inpujbꞌanikꞌojan sunil tzet hawatxꞌe.