Chiqꞌanlax tet Komam ta chiskolilo iskonhobꞌ
Salmo tiꞌ tzꞌibꞌnhebꞌilkano yu yaꞌ Asaf
74
Mamin, hach koDiosalanh,¿tzet yinh yuxin chonhhabꞌejkanojanh yinh hunelnhe?
¿Tzet yinh yuxin kaw ahkanokanh hahowal jinhanh,
hanhonh hakonhobꞌonh tiꞌanh?
2 Nati hakonhobꞌ tiꞌ, huneꞌ hawako haweto yettax kaw payat.
Huneꞌ majan anma hakoliloj yunhe yokkano hamajuloj.
Napaxti witz Sión bꞌay kaxhehi.
3 Hulanh kat hawilni hanta tzet mach isbꞌisil xaꞌuchkꞌalaxto tiꞌ.
Ebꞌnaj ayko ishowal tawinh mayuchkꞌakanto ebꞌnaj hawatut.
4 Ebꞌnaj ayko ishowal tawinh tuꞌ,
kaw el yaw ebꞌnaj yul hawatut, yuto qꞌoji ebꞌnaj jinhanh.
Yanikanh ebꞌnaj isbandera, hunteqꞌan mach jetoj.
5 Hakaꞌta tzokꞌo siꞌ chu ebꞌnaj xolaj qꞌebꞌtaj.
6 Ismaqꞌilo ebꞌnaj teꞌ aqꞌinteꞌ ayko yelawilo yul hawatut yu chꞌen eche yebꞌ chꞌen martillo.a
7 Isnhusnito ebꞌnaj hawatut, yinilo ebꞌnaj ispixan,
yuchkꞌakanto ebꞌnaj yaykano wuyna sat txꞌotxꞌ.
8 Yalni ebꞌnaj yul yanma: «Kokꞌaytzekanilo yinh hunelnhe,» xhi ebꞌnaj.
¡Isnhusnikanto ebꞌnaj sunil hawatut ay sat kotxꞌotxꞌanh Mamin,
bꞌay chikokutxbꞌa kobꞌahanh yu jinayo kobꞌahanh tawet!b
9 Matxa chijilanh hunteqꞌan yechel kaw ay yelapnoj.
Matxa bꞌay chijilanh yinh hunu ischejabꞌ Komam Dios.
Machi hunu mak koxolanh ohtanhe hanta tiempo chiꞌekꞌ huneꞌ isyaꞌtajil tiꞌ jibꞌanhanh.c
10 Mamin, hach Kodiosalanh,
¿hantato tzꞌayik chonhaqꞌlax ekꞌoyaꞌanh yu ebꞌnaj chonhetan tiꞌanh?
¿Bꞌaqꞌinh chisbꞌej ebꞌnaj isbꞌuchwa tawinh?
11 ¿Tzet yinh xin chawebꞌato haqꞌabꞌ kaw aykano yip jetanh?
¿Tzet yinh xin tonhe chalaqꞌ haqꞌabꞌ chawilni tzet chijaqꞌletiꞌanh?
12 Wal Komam Dios, haꞌ Wahawilan yettax kaw payat,
kaw txꞌiꞌal bꞌay qꞌoji yinh ebꞌnaj ayko ishowal yinh yul sat yibꞌanhqꞌinal tiꞌ.
13 Hapoh haꞌ mar yu hawip,
hamaqꞌni poho ej iswiꞌ noꞌ nime noqꞌ ay xol ha haꞌ.
14 Haxanhni poho iswiꞌ noꞌ Leviatán,
hawaqꞌni noꞌ iskꞌuxuꞌ ej no noqꞌ ay bꞌey txꞌotxꞌ desierto.d
15 Hach hawaqꞌ hajchahoj ej isnuqꞌ ha haꞌ,
yebꞌ ha haꞌ chꞌel yojomal;
hawaqꞌni tajolo haꞌ nime haꞌ, kaw ay yip.
16 Hawet ye tzꞌayik, hawetpaxo ye aqꞌbꞌal.
Hach hawakaniko tzꞌayik yebꞌ ixahaw yul yehobꞌal.
17 Hach hawakaniko ismohonal yul sat yibꞌanhqꞌinal tiꞌ.
Hach anhekano waresma yebꞌ nhabꞌil.e
18 Mamin, mach chito nahul hawu ta kaw chachispitiko ebꞌnaj ayko ishowal tawinh,
yebꞌ chachisbꞌahni anma suk.
19 ¡Hanhonhtiꞌanh, lahanonhan hakaꞌ noꞌ kuwis,
mach chu kokolni kobꞌahanh, mach chonhhawaktojanh yul istiꞌ noꞌ howla noqꞌ!
¡Mach chanahulnheto hamebꞌaꞌ yinh hunelnhe!
20 ¡Mamin, nati hatzotiꞌ hatꞌinhbꞌakano jetanh,
yuto bꞌay ayayo qꞌejholo yul ismajul txꞌotxꞌ Israel tiꞌ nohna yu istxꞌojal!
21 Matxa chachah elo ispixan makta xaꞌaqꞌlax ekꞌoyaꞌ yanma.
¡Bꞌitnhelaxojabꞌ habꞌi yu anma mebꞌaꞌ yebꞌ makta matzet ayko yipo yanma!
22 ¡Mamin, hach koDiosalanh! ¡Ahanhwanoj kat hakolni habꞌa!
¡Natij ta kaw naunhe chachisbꞌahni ebꞌnaj kaw suk!
23 Mach chanahulnheto iswejcha ebꞌnaj ayko ishowal tawinh,
yebꞌ ebꞌnaj chiꞌahkanh yel yaw yu ismanhkꞌomal tawet.