Komam Dios chiꞌinayo ebꞌnaj txꞌoj, kat yinikanh ebꞌnaj tohol isbꞌeybꞌal
Salmo tiꞌ tzꞌibꞌnhebꞌilkano yu yaꞌ Asaf
75
Chijaqꞌanh yuchꞌandiosal tawet Mamin,chijaqꞌanh yuchꞌandiosal tawet.
Kawil haweko kokꞌatanhanh, chijalikꞌojanh kꞌaybꞌalkꞌule chawatxꞌe.
2 Haꞌ Komam chihalni: «Haꞌ yinh huneꞌ tzꞌayik halbꞌilkano wuhan,
chiwilan yinh tzet chiꞌeliko anma yinh kaw istoholal.
3 Yet chibꞌili txꞌo txꞌotxꞌ,
yebꞌ sunil tzet ay sat txꞌotxꞌ,
haninan iqꞌnhe xeꞌ txꞌotxꞌ.
4 Walan tet makta chiwatxꞌen issukal:
“Machojabꞌ cheyikanh hebꞌa,” kinchihan. Walnipaxojan tet makta chiwatxꞌen istxꞌojal:
“Machojabꞌ cheyako hewinajil,” kinchihan.
5 “Machojabꞌ cheloloꞌnhe hebꞌa yu heyip.
Machojabꞌpaxo loloꞌ cheyute hetzoteli,” kinchihan,» xhi Komam.
6 Yuto maxhtaj bꞌay chiꞌahilo tzꞌayik maka bꞌay chito tzꞌayik,
maka bꞌey txꞌotxꞌ desierto chitit mak chonhinikanh.
7 Wal xin haꞌ Komam Dios, Jahawil yehi,
ay mak chiyiyoj, aypaxo mak chiyikanh.
8 Ay huneꞌ vaso ayko yul isqꞌabꞌ Komam,
ayayto ishowal Komam yul; nohna yu vino sombꞌil, yebꞌ vino kaw how.
¡Hayet chisjobꞌnayo Komam huneꞌ vino tuꞌ,
sunil anma txꞌoj ay sat txꞌo txꞌotxꞌ tiꞌ chiꞌukꞌni,
masanto chiyukꞌilo yich vaso tuꞌ!a
9 Yajaꞌ wal intiꞌan chilannhetikꞌa walnikꞌojan Komam Dios,
isDiosal yaꞌ Jacob, kat wanikojan bꞌit tet Komam.
10 Yuto haꞌ Komam chitanhtzenilo yip ebꞌnaj istxꞌojalnhetikꞌa chiswatxꞌe,
yajaꞌ wal ebꞌnaj kꞌul chiswatxꞌe, haꞌ Komam chiꞌaqꞌni yaqꞌbꞌil yip ebꞌnaj.