Haꞌ Komam Dios kaw ay yip isqꞌoji yebꞌ haꞌ chiꞌilni yinh tzet chiꞌeliko anma
Salmo tiꞌ tzꞌibꞌnhebꞌilkano yu yaꞌ Asaf
76
Komam Dios, kaw ohtabꞌil bꞌey konhobꞌ Judá.
Kaw niman yelapno isbꞌi Komam yul konhobꞌ Israel.
2 Haꞌ bꞌey Salem ay Yatut Komam.
Haꞌ bꞌey tuꞌ ay wonhan Sión bꞌay ay Komam.a
3 Haꞌ bꞌey tuꞌ istanhtzelo Komam teꞌ litꞌ, chꞌen escudo,
yebꞌ chꞌen espada yebꞌ hunteqꞌanxa chꞌen chiꞌokniko yinh howal.
4 Mamin, kaw kꞌulchꞌan hachkanoj, aykano ismay haqꞌaqꞌal,
ekꞌbꞌal niman hawelapno sata hunteqꞌan witz bꞌay chiꞌustelax no noqꞌ.
5 Ebꞌnaj winaj kaw ay yip yanma,
ilaxilo tzet ay yul isqꞌabꞌ ebꞌnaj, waykanh ebꞌnaj yinh hunelnhe.
Ebꞌnaj kaw ay yip matzet yu iswatxꞌen ebꞌnaj yu isqꞌabꞌ.
6 Mamin, isDiosal yaꞌ Jacob, hayet hamaywahi matxatikꞌa chu isbꞌili chꞌen carruaje yebꞌ noꞌ cheh.
7 ¡Mamin, kaw aykano hamay! Hayet chitit hahowal machi hunu mak chu islinhbꞌan isbꞌa tasataj.
8 Hata satkanh hawaqꞌ ohtanhelaxoj ta chawil yinh tzet chiꞌeliko anma.
Wal txꞌo txꞌotxꞌ, kaw xiwkanh txꞌotxꞌ yok linhno txꞌotxꞌ,
9 yet hawahwanoj hawatxꞌen istoholal,
hakolni makta chewchotanhe yute isbꞌa yul sat yibꞌanhqꞌinal tiꞌ.
10 Hayet chichiwa iskꞌul ebꞌnaj winaj, chimeltzoko yinh kꞌul-la tzotiꞌ tawinh.
Haꞌ nixhte bꞌay chichiwa iskꞌul ebꞌnaj chimeltzoko hamayoj.
11 Yijewe tzet cheyalte tet Komam Dios, koDiosal. Sunil anma hoyaniko yinh iskonhobꞌ Komam,
yilal chiyito isyebꞌalqꞌabꞌ tet Komam, Komam kaw ayko ismay.
12 Haꞌ Komam chikꞌotzbꞌan yoj iskawil ebꞌnaj yahaw ej konhobꞌ,
kat yaniko Komam xiwkilal yinh yanma ebꞌnaj rey ay yul sat yibꞌanhqꞌinal tiꞌ.