Konabꞌaweti tzetaj kaw ay yelapno iswatxꞌe Komam Dios
Salmo tiꞌ tzꞌibꞌnhebꞌilkano yu yaꞌ Asaf
77
Haꞌ tet Komam Dios chiꞌahwawan.Chinawihan tet Komam yuto chabꞌe Komam tzet chinqꞌanan.
2 Yinh istzꞌayikal inbꞌiskꞌulalan insayan Komam,
intxahlihan hunun aqꞌbꞌal, winikanh inqꞌabꞌan tet Komam,
machi xin kinxewan. Wal wanmahan mach chischah yaqꞌlobꞌal iskꞌul.
3 Hayet chinnanitijan Komam Dios,
kat woqꞌan, yet wabꞌenan isyaꞌtajil ispax yip wanmahan.
4 Mamin, maxhtikꞌa kinachah wayojan.
Kaw bꞌiskꞌulal wehan, maxhtikꞌa isje nino inkꞌulan tzoteloj.
5 Innatijan hunteqꞌan tzꞌayik yebꞌ hunteqꞌan habꞌil yet yalanhtokanoj.
6 Tit yinh inkꞌulan yet chinbꞌitnihan yet aqꞌbꞌalil,
intxumnihan inchukilan, walnihan:
7 «¿Tom sunilbꞌal tiempo aynhetikꞌayo ishowal Komam Dios?
¿Tom matxa bꞌaqꞌinh chitzꞌay iskꞌul Komam Dios jinh?
8 ¿Tom xalahwi iskꞌulchꞌanil iskꞌul Komam Dios jinh?
¿Tom xatanhkano tzettaj yalte Komam Dios jet yinh hunelnhe?
9 ¿Tom xaꞌisnahulnheto istzꞌay iskꞌul Komam Dios jinh?
¿Tom kaw aykanayo ishowal Komam jibꞌanh,
machi xin nino chitzꞌay iskꞌul Komam jinh?» kinchihan.
10 Yuxin chiwalan: «Haꞌ huneꞌ inyabꞌiltiꞌan;
haꞌ chiꞌaqꞌni intxumulojan ta matxa lahano chute iskꞌul Komam jinh tinanh hakaꞌ yet yalanhtokanoj,
Komam kaw aykano yelapnoj,» kinchihan.
11 Chinnatijan tzettaj iswatxꞌe Komam.
Yinh kaw yeli chinnatijan yinh kꞌaybꞌalkꞌule isye Komam yet yalanhtokanoj.
12 Kat intxumnihan yinh sunil tzet hawatxꞌe Mamin,
kat walnikꞌojan.
13 Mamin, hach inDiosalan machi nino istxꞌojal chiꞌilchalo yinh habꞌeh.
¿Aymi hunuxa dios kaw ay yelapno hakaꞌ koDios? Mach maka.
14 Hach tiꞌ, isDiosal kꞌaybꞌalkꞌule hawehi,
hayelo hawip tet ej konhobꞌ.
15 Yu haqꞌabꞌ hakolilo hakonhobꞌ,
hakolnipaxilo yuninal yaꞌ Jacob yebꞌ yaꞌ José.
16 Mamin, hayet kach yilni ha haꞌ,
isxiwkanh haꞌ tawet. Hakpax tuꞌ nime xabꞌ bꞌilikanh.
17 Isbꞌejnayti moyan nime nhabꞌ,
isjepla yul satkanh, isnhirla kꞌuh.
18 Yabꞌelax isbꞌili kꞌuh xol nime jaqꞌeqꞌ.
Sunil yul sat yibꞌanhqꞌinal tiꞌ sajbꞌikanilo yet isjepla kꞌuh;
isyukyunkanh txꞌo txꞌotxꞌ yu txixkabꞌ.
19 Hapolto habꞌeh xol haꞌ mar,
txꞌiꞌal ha haꞌ haqꞌaxpoh, yajaꞌ machi hunu mak ilchanti hawojlen.
20 Hawijbꞌakꞌo hakonhobꞌ, hakaꞌ chu yijbꞌanikꞌo naj tanhem meꞌ ismeꞌ.
Haꞌ yaꞌ Moisés yebꞌ yaꞌ Aarón haqꞌan yijbꞌanikꞌo hakonhobꞌ tuꞌ.a